හිටපු නිර්වින්දන වෛද්‍යවරුන් දෙදෙනාම රට අතහැර ගිහින්…  රාජකාරී පීඩනය දරාගන්න බැරිව ඇඹිලිපිටි රෝහලේ හිටපු එකම නිර්වින්දන වෛද්‍යවරිය කාටවත් නොකියා සේවය අතහැර යයි

හිටපු නිර්වින්දන වෛද්‍යවරුන් ‌දෙදෙනාම රට හැර යාම හේතුවෙන් වැඩ රාජකාරී අධික වීම නිසා ඇඹිලිපිටිය මහ රෝහලේ සේවය කළ එකම නිර්වින්දන විශේෂඥ වෛද්‍යවරියද දින කිහිපයක් තිස්සේ සේවයට වාර්තා නොකර සේවය හැරයාමට පියවර ගෙන ඇති බව වාර්තා වේ.

එම විශේෂඥ වෛද්‍යවරිය වෙනත් අයෙකුගේ වට්ස්ඇප් අංකයකින් රෝහල් බලධාරීන් වෙතට දැනුම්දීමක් සිදුකර ඇත්තේ නැවත සේවයට නොපැමිණෙන බවය.

පසුගිය සිකුරාදා දින සිට විශේෂඥ වෛද්‍යවරිය රෝහල වෙත වාර්තා නොකිරීම හේතුවෙන් මේ වනවිට ඇඹිලිපිටිය මහ රෝහලේ හදිසි ශල්‍යකර්ම නතරකිරීමට සිදුවීම හේතුවෙන් අර්බුදයක් නිර්මාණය වී තිබේ.

මෙම තත්ත්වය ඇඹිලිපිටිය මහ රෝහලේ දැඩි සත්කාර ඒකකයට සහ ශල්‍යාගාර දෙක සඳහා දැඩි බලපෑමක් එල්ලකර ඇතිබව ආරංචි මාර්ග සඳහන් කරයි.

මීට පෙර මෙම රෝහලේ සිටි නිර්වින්දන වෛද්‍යවරයෙකු 2022.10.01 දින විදේශගතව ඇත අනතුරුව 2023.04.10 දින තවත් නිර්වින්දන වෛද්‍යවරයෙකු විදෙස්ගතව ඇත.

එම වෛද්‍යවරුන් මේ දක්වා යළි මෙරටට පැමිණ නොමැති බව වැඩිදුරටත් වාර්තාවෙයි.

මේ හේතුවෙන් නේවාසිකව ප්‍රතිකාර ලබන රෝගීන්ගේ ශල්‍යකර්ම සිදුකිරීම සඳහා රත්නපුර සහ කරාපිටිය රෝහල් වෙත මාරුකර යැවීමට සිදුව ඇත.

මේ අතර පසුගිය අගෝස්තු මාසයේදී හම්බන්තොට දිස්ත්‍රික් මහරෝහලේ එකම නිර්වින්දන විශේෂඥ වෛද්‍යවරයාද රට හැර ගොස් ඇති බව පසුව අනාවරණය විය.

The post හිටපු නිර්වින්දන වෛද්‍යවරුන් දෙදෙනාම රට අතහැර ගිහින්…  රාජකාරී පීඩනය දරාගන්න බැරිව ඇඹිලිපිටි රෝහලේ හිටපු එකම නිර්වින්දන වෛද්‍යවරිය කාටවත් නොකියා සේවය අතහැර යයි appeared first on ColomboXnews.