කොළඹ එක වෙන්න රොජර්ගෙන් පලිගත් විමල් කොළඹ දෙක වුන හැටි ජනිපෙ හිටපු ලේකම් පැහැදිලි කරයි.

කොළඹ දිස්ත්‍රික්කයේ ප්‍රථමයා ලෙස දිගටම මනාප ලබාගැනීමට විමල් වීරවංශ තුල පැවති ආසාව නිසා ඔහු විසින් දෙවන පෙළ නායකයෙක් ලෙස කැපී පෙනෙන වැඩ කොටසක් කල ජනප්‍රිය රංගන ශිල්පී රොජර් සෙනවිරත්න හට පක්ෂය තුල නොයෙකුත් කෙනෙහිලිකම් කල බව ජනිපෙ හිටපු ලේකම් ප්‍රියන්ජිත් විතාරණ මහතා සදහන් කරයි.

තම මුහුණු පොත හරහා සටහනක් තබමින් ඔහු ප්‍රකාශ කරන්නේ එසේ ප්‍රථඹයා වීමට අනෙකාට ඉදිරියට ඒමට නොදුන් විමල් වීරවංශ අදවනවිට දෙවෙනියා බවට පත්වී ඇති බවයි.

ප්‍රියන්ජිත් විතාරණ මහතා‍ගේ සටහන පහතින්..

රොජර්ගෙන් පලිගත් විමල්ගේ දේශපාලන කුමන්ත්‍රණය,

ජාතික නිදහස් පෙරමුණ බිහිවීමෙන් පසු එය එක්සත් ජනතා නිදහස් සන්ධානය සමඟ මැතිවරණ එකඟතාවයක් ඇති කර ගත්තේය.ඒ අනුව ජානීපෙ මුහුණ දුන් පළමු මැතිවරණය වූයේ 2009 වසරේ පැවති බස්නාහිර හා වයඹ පලාත් සභා මැතිවරණයයි.එම මැතිවරණයේදී අප මුහුණ දුන් ප්‍රධාන අභියෝගය වූයේ මැතිවරණය සදහා ප්‍රභල අපේක්ෂකයින් සොයා ගැනීමයි. මෙහිදී කොළඹ දිස්ත්‍රික්කයේ පැවති ඒ අඩුව සම්පූර්ණ කරනු ලැබුවේ ප්‍රවීන රංගන ශිල්පී රොජර් සෙනවිරත්න සහෝදරයා විසිනි.ප්‍රතිභා පූර්ණ රංගන ශිල්පියකු මෙන්ම බොහෝ සංවේදී පුද්ගලයෙකු වූ ඔහු පළමු මොහොතේම අපගේ ඉල්ලීම ඉමහත් ගෞරවයෙන් බාර ගත්තේය.රොජර් සෙනවිරත්න සහෝදරයාගේ මැතිවරණ ව්‍යාපාරය මෙහෙයවීම් වගකීම ජානීපෙ දේශපාලන මණ්ඩලය විසින් පැවරුවේ මාහටය.

එතෙක් මෙතෙක් ඉතිහාසයේ ජානීපෙ මුහුණ දුන් අති දුෂ්කරම මැතිවරණය එයයි.ඊට ප්‍රධාන හේතුව වූයේ ජවිපෙ විසින් ජානීපෙ ඉළක්ක කර ප්‍රහාරයන් රැසක් දියත් කිරීමයි.ඒ වනවිට ජානීපෙට කොළඹ දිස්ත්‍රිකය සදහා අඩුම තරමේ දිස්ත්‍රික් කම්ටුවක්වත් තිබුණේ නැත.මේ සියලු දුෂ්කරතා මැද්දේ තලවතුගොඩ පුංචි කාමර කීපයක් සහිත නිවසක් අපගේ මැතිවරණ කාර්යාලය බවට පත් කරමින් අපද මැතිවරණ සටන ඇරඹුවේය.රාත්‍රී කාලය මා එහි ගතකළ අතර රොජර් සහෝදරයා සිය පුංචි පුතා සමග පැමිණි මා නිදාගන්නා පැදුරේ වාඩිවී හෙට දවසේ මැතිවරණ සටන සැලසුම් කළේය.ඒ සාකච්ඡාව අවසන් වන විට පොඩි එකා හොදටම නිදිය.

තමන් මුහුණ දුන් පළමු මැතිවරණයෙන්ම ඡන්ද පනස්දාහකටත් වඩා වැඩි ප්‍රමාණයක් ලබා ගනිමින් රොජර් මැතිවරණය ජයග්‍රහණය කළේ ජයග්‍රාහී ලයිස්තුවේ ඉහළ තැනක් සටහන් කර ගනිමින්ය.එම ඡන්ද ප්‍රමාණය ලබා ගැනීමට අවශ්‍ය ජනප්‍රියත්වය හා දක්ෂතාවය රොජර් සෙනවිරත්න සතුවිය.ඒ වන විට කොළඹ දිස්ත්‍රික් ජානීපෙ නායකයා ලෙස කටයුතු කළේ අචල ජාගොඩ සහෝදරයායි.පසුව පැවති 2010 පාර්ලිමේන්තු මැතිවරණයෙන් කොළඹ දිස්ත්‍රික්කයෙන් තරඟ කිරීමට ජාගොඩ සහෝදරයා තුළද අදහසක් තිබිණි.නමුත් විමල් ඊට කැමති වූයේ නැත. පසුව ජාගොඩ සහෝදරයා ජාතික ලයිස්තුවට යවා විමල් තනිවම කොළඹට තරඟ කළේය. විමල් ජානීපෙන් වෙනත් කිසිවෙකු කොළඹ දිස්ත්‍රික්කයෙන් තරඟ කරනවාට කැමති වූයේ නැත.පක්ෂයට මන්ත්‍රී ධූර දෙකක් ගන්නවාට වඩා විමල් සිතුවේ කොළඹින් වැඩිම මනාප ලබා ගැනීමේ කිරුළ සදාකාලිකව තමා වෙත තබා ගැනීමටය.ඊට ජාගොඩ සහෝදරයා ජානීපෙන් ඉවත්වීමද විමල්ට මහත් පිටුවහලක් විය.

නමුත් විමල්ට තවත් අභියෝගයක් කොළඹ දිස්ත්‍රික්කයෙන් නිර්මාණය වෙමින් තිබිණි.ඒ දෙවන වරටත් බස්නාහිර පලාත් සභාව ජයගනිමින් තමන් පළමුවර ලබාගත් ඡන්දවලට වඩා වැඩි ඡන්ද දහස් ගණනක් ලබා ගත් රොජර් සෙනවිරත්නය.කුමන්ත්‍රණය ඇරඹෙන්නේ එතන සිටය.රොජර් ලබාගත් ඡන්ද සියල්ල විමල්ගේ ඡන්ද බව පළමු මොහොතේම අර්ථකථනය කෙරිනි.නමුත් ජානීපෙ ඉදිරිපත් කළ අනෙක් අපේක්ෂකයා රොජර් ඡන්ද 54000 ක් පමණ ලබා ගන්නා විට ලබා ගත්තේ ඡන්ද 11000 කට වඩා අඩු ඡන්ද ප්‍රමාණයකි.එහෙත් විමල්ගේ ඡන්ද ටික ඔහුට නොදුන්නේ මන්දැයි විග්‍රහයක් සිදුවූයේ නැත.විමල්ට අවශ්‍ය වූයේ රොජර් සෙනවිරත්න නම්වූ රටම දන්නා ප්‍රතිභා පූර්ණ රංගන ශිල්පියා පොල්කට්ටකින් වසා තැබීමටය.ඒ සදහා ඊළඟ කුමන්ත්‍රණය දියත් වූයේ රොජර්ට දේශපාලනය තේරෙන්නෙ නෑ කියමිනි.

මෙම සහාසික කුමන්ත්‍රණ සිදුකරන කුමන්ත්‍රණ මඩුව බවට පත්වූයේ විමල්ගේ කොළඹ දිස්ත්‍රික්ක් කමිටුවයි.විමල් තොරාගත් එම කුමන්ත්‍රණ මඩුවේ සිටි සියලු දෙනා අභ්‍යන්තරිකව රොජර්ට එරෙහිව මෙහෙයවීම විමල් ඒ වනවිටත් අරඹා තිබිණි.රොජර් බස්නාහිර පලාත් සභාවෙන් ලබා ගන්නා ප්‍රතිපාදන කොළඹ දිස්ත්‍රික් කමිටුවට ගෙනත් ආසන මට්ටමින් බෙදා දීමට උත්සහ කළත් ඒවා බාර ගැනීමට කිසිවෙකු ඉදිරිපත් වුයේ නැත.පසුව රොජර්ගේ ශක්තියෙන් ප්‍රජාව සමඟ එක්ව වැඩ කළවිට කීවේ රොජර් තනි ගමනක් යනවා කියායි.වැඩ කළත් වැරදි, නොකළත් වැරදි තැනට රොජර් තල්ලු කර දමා තිබිණි.විටක බස්නාහිර පලාත් සෞඛ්‍ය අමාත්‍යාංශය මන්ත්‍රීවරුන් පදනම් කර ගනිමින් ප්‍රජා සෞඛ්‍ය සේවා වැඩසටහනක් දියත් කළේය.සෑම ආසනයකටම එක බැගින් සෞඛ්‍ය සායන වැඩසටහනක් රොජර් සහෝදරයාට හිමිව තිබිණි.රොජර් එයත් රැගෙන ආවේ කොළඹ දිස්ත්‍රික් කමිටුවටය. නමුත් ඒවා බාර ගන්න කෙනෙක් එක ආසනයකවත් හිටියේ නැත.

අවසානයේ රොජර් සහෝදරයා ඒවා රැගෙන මා හමුවීමට පැමිණියේය.පැමිණ ඉල්ලා සිටියේ පක්ෂය ප්‍රධාන ලේකම්වරයා ලෙස මැදිහත් වී එම සෞඛ්‍ය සායන සදහා දින කොළඹ දිස්ත්‍රික් කමිටුවෙන් ලබා දෙන ලෙසය. මා එය බාරගෙන විමල් සමඟ කතා කළවිට විමල් මට එම ආසනවලට දින ලබා දෙන බවට පොරොන්දු වී මාහට රොජර් ලබාදුන් ලේඛණ ගල් කළේය.තවමත් කොළය විමල් ළගය. හමුවූ දිනයක් නම් තවම නැත.කෙසේ නමුත් මෙම කෙනිළිකම් ක්‍රමයෙන් රොජර්ටත් දැනෙන්නට විය.ඔහු වසා තැබීමට විමල් ගෙනා කොළඹ දිස්ත්‍රික් කමිටුව නැමති පොල්කටුවට එය කිරීමට බැරිවිය.රොජර් ඊට වඩා ලොකු මිනිසෙක් බව ඔවුන්ගේ ලපටි මොළවලට හිතෙන්නට නැතිව ඇත .මේ සියලු කලකිරීම් සම්බන්ධව රොජර් සහෝදරයා කතා කළේ මා සමගය.මා ඔහුත් සමඟ විමල්ගේ ඇමති නිළ නිවසට අවස්ථා කිහිපයක්ම ගියේය.එහෙත් විමල් දෙන පොරොන්දු කඩ වීමට පැය විසි හතරක්වත් ගියේ නැත.

මා අවස්ථාව ගණනාවකදී රොජර් සහෝදරයාගේ නිවසට ගොස් ඔහු හා කතා කරමින් මේ කෙනෙහිලිකම්වලට වසර කීපයක්ම උත්තර සෙව්වේය.කිනම් ප්‍රශ්න තිබුණද ජනතාව පිලිගත්තේය රොජර් සෙනවිරත්න යනු විමල්ගේ කොළඹ දිස්ත්‍රික් අනුප්‍රාප්තිකයා ලෙසයි.දහසක් කළකිරීම මැද වුවද රොජර් ඒම යුතුකම ඉටු කළේය.මහින්ද සුළග,නුගේගොඩ රැළියේ කොළඹ දිස්ත්‍රික් වගකීම බාර ගත්තේ රොජර්ය.පාර්ලිමේන්තු මැතිවරණයක් පැමිණි පසු වෙනත් දිස්ත්‍රික්කවලින් ඉදිරිපත් කිරීමට නළු නිළියන් සෙවීම විමල්ගේ සාමාන්‍ය සිරිතකි.(බුද්ධදාස විතානාරච්චි,උදිදික ප්‍රේමරත්න,කමල්)නමුත් තමන් අසළම සිටි රොජර් සෙනවිරත්න නැමති රංගන ශිල්පියා විමල්ට බැරිවෙලාවත් පෙනුනේ නැත.එහෙත් රොජර් තමන්ට අවස්ථාව නොදුන් විමල්ගේ වේදිකාවේ ප්‍රධාන කථිකයා විය.විමල්ට කොළඹ දිස්ත්‍රික් මනාප ලයිස්තුවේ පළවෙනියා වීමට තිබුණේ ඒ හයියයි.එහෙත් අද රොජර්ලා විමල්ට නැත.ඒ වේදිකාවේ අද විමල් නිකම්ම දෙවනි තැනට තල්ලුවී හමාරය.රොජර්ගේ බෙල්ල කපා රැක ගැනීමට උත්සහ කළ කොළඹ දිස්ත්‍රික් වැඩිම මනාප කිරුළ විමල්ගෙන් දැන් ගැලවී ගොසිනි.

දිනක් රොජර් පක්‍ෂයෙන් ඉල්ලා අස්වීමට යන බව විමල්ට ආරංචි වී තිබිණි.විමල් මට කතා කර කිවේ ප්‍රියන්ජිත් කොහොම හරි රොජර් බැලන්ස් කරන්න කියායි.මා රොජර් සහෝදරයා හමුවීමට ඔහුගේ නිවසට ගියේය. එහිදී ඔහු ඉල්ලා අස්වීමේ ලිපිය මා අත තැබූවේය.රොජර් නැමති නළුවා කළ රංගනයන්වලදී මා ඔහුගේ ඇස්වල කඳුළු දැක තිබේ.එහෙත් එදා මා රොජර් සහෝදරයාගේ ඇත්තම කදුළු දුටුවේය.මා ඔහුගේ ඉල්ලා අස්වීමේ ලිපිය බාර ගැනීම ප්‍රතික්ෂේප කළේය. රොජර්ගේ බිරිඳ සහ නැගණියද මගෙන් ඉල්ලා සිටියේ එය බාර ගෙන ඔහු ඔවුන්ට නිදහස් කර දෙන ලෙසය.එහෙත් මා ලිපිය බාර නොගෙන රොජර් සහෝදරයා මුහුණ දෙන ප්‍රශ්න දේශපාලන මණ්ඩලයට යොමු කර විසදුම් ලබා දෙන වගකීම බාර ගෙන පිටත්ව ආවේය.නමුත් ඊට පෙර 2017/11/21 දින අනපේක්ෂිත පරිධි මට පක්ෂයෙන් ඉල්ලා අස්වීමට සිදුවිය.පසු දින රොජර් සහෝදරයා මට කතා කර කියූ කතාව මට තවමත් මතකය.ඔහු කීවේ ” ප්‍රියන්ජිත් සහෝදරයා ඉල්ලා අස්වෙන්න හිටිය මාව නතර කරලා ඔයා ඉල්ලා අස්වෙලා.මොකද්ද මේ කළේ ” කියාය.

මා දන්නා පරිදි ඊට ටික කළකට පසු රොජර් සෙනවිරත්න සහෝදරයාද පක්ෂයෙන් ඉල්ලා අස්විය.එහෙත් ඉන්පසු මා ඔහු දේශපාලන වේදිකාවක දුටුවේද නැත.කෙසේ නමුත් දකෂ දේශපාලනය චරිතයක් විමල් විසින් රටට අහිමි කළේ එලෙසින්ය.

ප්‍රියන්ජිත් විතාරණ

The post කොළඹ එක වෙන්න රොජර්ගෙන් පලිගත් විමල් කොළඹ දෙක වුන හැටි ජනිපෙ හිටපු ලේකම් පැහැදිලි කරයි. appeared first on ColomboXnews.