රුසියාවේ ශ්‍රී ලංකා තානාපතිනිය සිය ධූරයේ වගකීම් පැහර හරිමින් පුද්ගල ව්‍යාපාර කටයුතුවල නියැලෙමින් සිටින බව සඳහන් කරමින් ඇය එම තනතුරෙන් ඉවත්කර විදේශ සේවයේ පළපුරුදු පුද්ගලයෙකු රුසියාවේ තානාපති ධූරය සඳහා පත්කරන ලෙස ඉල්ලමින් මගෙන් රටට සංවිධානය විසින් ජනාධිපති රනිල් වික්‍රමසිංහ වෙත ලිපියක් බාර දී තිබෙනවා.
අදාළ ලිපිය…
එම්.එම් සංජය මහවත්ත,
සභාපති – මගෙන් රටට සංවිධානය,
අංක 50 මුවර් පාර,
වැල්ලවත්ත.
ගරු ජනාධිපති රනිල් වික්‍රමසිංහ මැතිතුමා,
ජනාධිපති ලේකම් කාර්යාලය,
කොළඹ.
2022/09/22
රුසියාවේ ශ්‍රී ලංකා තානාපතිනි ජනිතා ලියනගේ මහත්මිය සිය තනතුරේ වගකීම් පැහැර හැර, පුද්ගලික ව්‍යාපාර ප්‍රවර්ධනය කිරීම සම්බන්ධව සිදුකරන පැමිනිල්ලයි.
ගරු ජනාධිපති තුමනි,
ලෝකයේ බලවත්ම රටක් වන රුසියාවේ තානාපතිධූරය සඳහා විදේශ සේවයේ පළපුරුදු පුද්ගලයෙකු වෙනුවට විදේශ සේවයට ආදුනික ආයුර්වේද වෛද්‍යවරියක් වන ජනිතා ලියනගේ මහත්මිය පත්කිරීමට හිටපු ජනාධිපතිවරයා කටයුතු කිරීම ඉතාමත්ම අධුරදර්ශි ක්‍රියාවක් ලෙස හැඳින්විය හැකිය.
ශ්‍රී ලංකා ජනතාව ඉතා දුෂ්කර කාලසීමාවක් පසුකරමින් සිටින අවස්ථාවක, දීර්ඝකාලීන මිත්‍ර රාජ්‍යයක් වන රුසියාවේ සහයෝගය ලබා ගැනීමට එරට ශ්‍රී ලංකා තානාපතිනිය අපොහොසත්ව ඇත. රුසියාව ලොව ප්‍රමුඛතම ගෑස් සහ ඉන්දන නිෂ්පාදනය කරන රටක් වුව ද, එරටින් සහයෝගය ලබාගැනීමට කිසිදු උත්සහයක් නොගනිමින්, ශ්‍රී ලංකාවේ ජනතාව පෝලිම්වල රැදී සිටීමට ඉඩ හරිමින් තානාපතිනිය විසින් වගකීම් විරහිතව කටයුතු කර ඇත. හිටපු ජනාධිපතිවරයාට සිය ධුරයෙන් ඉවත්විමට මෙවැනි නොගැලපෙන පුද්ගලයින්ට වගකීම් පැවරීම ද එක් හේතුවකි.
නිශ්ශංක විජේවර්ධන, සමන් වීරසිංහ, ආචාර්ය දයාන් ජයතිලක, උදයංග වීරතුංග යන මහත්වරුන් රුසියාවේ තානාපතිවරු ලෙස කටයුතු කරමින්, ශ්‍රී ලංකාවට සිදුකල අතිමහත් සේවයේ ප්‍රතිඵලයක් ලෙස අපේ රටේ ප්‍රමුඛතම “තේ” ගැනුම්කරු බවට පත්වූවේ රුසියාවයි. ශ්‍රී ලංකාවට වැඩිම සංචාරකයන් පැමිණෙන රට වුවේ ද රුසියාවයි. එම තත්වයන් දිගටම පවත්වාගෙන යාමට වර්තමාන තානාපතිනිය කිසිදු ක්‍රියාමාර්ගයක් ගෙන නැත. රාජ්‍යතාන්ත්‍රික අර්බුදයකට තුඩුදුන් Aeroflot ගුවන් යානා ගැටලුවේදී රුසියාවේ ශ්‍රී ලංකා තානාපතිනිය ලෙස ඇයගෙන් අවශ්‍ය සහයෝගය ශ්‍රී ලංකා රජයට ලැබුනේ ද නැත. තවද, එක්සත් ජාතීන්ගේ මානව හිමිකම් සැසියේදී ශ්‍රී ලංකාවට විරුද්ධව ගෙන ඒමට නියමිත යෝජනාවලට විරුද්ධව රුසියානු රජයේ සහයෝගය ලබා ගැනීම සඳහා ජනිතා ලියනගේ මහත්මිය සාධනීය මැදිහත්වීමක් කරනු ඇතැයි බලාපොරොත්තු තැබිය නොහැකිය. ශ්‍රී ලංකා ජනතාවගේ බදු මුදලින් මෙවැනි අකාර්යක්ෂම තානාපතිනියක් තවදුරටත් නඩත්තු කරනවාද? යන ගැටලුව අප හමුවේ ඇත.
එපමණක් නොව රුසියාවේ ශ්‍රී ලංකා තානාපතිනිය, ජනිතා ලියනගේ මහත්මිය තම තනතුරේ බලය අවභාවිතා කරමින් REC Campus නැමති පුද්ගලික ව්‍යාපාරයක් ප්‍රවර්ධනය කරමින් සිටියි. REC Campus ආයතනය යනු රුසියාවේ වෛද්‍ය අද්‍යාපනය සඳහා ශ්‍රී ලංකික සිසුන් යොමු කරන තැරව්කාර ආයතනයකි. අදාළ ආයතනය විසින් ප්‍රධාන වශයෙන්ම Tver State Medical University වෙත මෙරට සිසුන් යොමු කරමින් සිටියි. කෙසේ වෙතත් අදාළ විශ්වවිද්‍යාලය වෛද්‍ය උපාධියේ අවම ප්‍රමිතිය පවත්වාගෙන යාමට අපොහොසත් වීම හේතුවෙන් ශ්‍රී ලංකාවේ පිලිනොගනීමට ශ්‍රී ලංකා වෛද්‍ය සභාව විසින් තීරණය කර 2020/10/20 දින සෞඛ්‍ය අමාත්‍යවරයාගේ අනුමැතියට යොමු කර ඇත. නමුත්, මොනයම් හෝ හේතුවක් මත සෞඛ්‍ය අමාත්‍යංශයේ නිලධාරීන් විසින් අදාළ ලේඛන යටගසා ඇති අතර වසර දෙකක් යනතුරුත් සෞඛ්‍ය අමාත්‍යවරයාට අත්සන තැබීමට නොහැකි වී ඇත. වෛද්‍ය සභාවේ මෙම තීරණය ආපසු හැරවීම සඳහා පසුගිය කාලය පුරා විවිධ කුමන්ත්‍රණ දියත්වූ අතර, එම කුමන්ත්‍රණ පිසුපස REC Campus තැරව්කාර ආයතනය සිටින බවට පැහැදිලි සැකයක් ඇත. අදාළ කුමන්ත්‍රණයට මෙවර රුසියාවේ තානාපතිය සහ ඇයගේ ස්වාමිපුරුෂයා ද හවුල් කරගෙන ඇත. තානාපතිනියගේ ස්වාමීපුරුෂයා වන ශ්‍රී ජයවර්ධනපුර විශ්වවිද්‍යාලයේ උප කුලපති මහාචාර්ය සුදන්ත ලියනගේ රුසියාවට ගෙන්වාගෙන, ඉතා උසස් තත්වයේ ශ්‍රී ලංකා වෛද්‍ය සභාව අනුමත කරන ලද විශ්වවිද්‍යාල විශාල ප්‍රමාණයක් තිබියදී, ප්‍රමිතියෙන් තොර වෛද්‍ය උපාධි ලබා දෙන ආයතනයක් ලෙස ශ්‍රී ලංකා වෛද්‍ය සභාව නම්කර ඇති Tver State Medical University සමග අවබෝධතා ගිවිසුමකට එළඹ ඇත. අදාළ කටයුතු සංවිධානය කර ඇත්තේ REC Campus නැමති තැරව්කාර පුද්ගලික ආයතනය විසින් වන අතර අවබෝධතා ගිවිසුම අත්සන් කිරීම සඳහා අදාළ තැරව්කාර ආයතනයේ අධ්‍යක්ෂකවරු සහබාගී විය. එම අවස්ථාවේ ඡායාරුප Embassy of Sri Lanka in Moscow ෆේස්බුක් පිටුවට 2022 සැප්තැම්බර් 15 දින එක් කර ඇත. මෙහි පිටුපස ඇති අරමුණ නම් ශ්‍රී ජයවර්ධනපුර විශ්වවිද්‍යාලයේ අවබෝධතා ගිවිසුම පෙන්වා ශ්‍රී ලංකා වෛද්‍ය සභාවේ නිර්දේශය ආපසු හැරවීමයි.
දැනගන්නට ලැබෙන පරිදි තානාපතිනියගේ පුත්‍රයා රුසියාවේ විශ්වවිද්‍යාලයක් වෙත ඇතුලත් කිරීම සඳහා මුදල් ගෙවා ඇත්තේ මෙම තැරව්කාර ආයතනය වන අතර තානාපතිනියගේ ස්වාමිපුරුෂයාට කිහිප වතාවක් රුසියාවට යාම සඳහා අනුග්‍රහය දක්වා ඇත්තේ ද අදාළ තැරව්කාර සමාගමයි. අදාළ කාරණය පිළිබඳව පරීක්ෂණයක් සිදුකර අල්ලස් හෝ දුෂණ පනත ප්‍රකාරව ක්‍රියාමාර්ග ගන්නා ලෙස තවදුරටත් ඔබතුමාගෙන් ඉල්ලා සිටීමට කැමැත්තෙමි.
Tver State Medical University වෙත ශ්‍රී ලංකික සිසුන් යැවීමේදී REC Campus තැරව්කාර ආයතනය සිදුකරන මූල්‍ය වංචා පිළිබඳව අප විසින් ශ්‍රී ලංකා වෛද්‍ය සභාව, ශ්‍රී ලංකා මහ බැංකුව, ශ්‍රී ලංකාවේ රුසියානු තානාපති කාර්යාලය යන ආයතනවලට ද මීට ඉහතදී පැමිණිලි කර ඇත. Tver State Medical University හී වසර 6ක වෛද්‍ය උපාධි පාඨමාලාව සඳහා වසරක පාඨමාලා ගාස්තුව වන්නේ ඩොලර් 2750 කට ආසන්න ප්‍රමාණයක් නමුත් REC Campus තැරව්කාර ආයතනය පළමු වසර සඳහා ඩොලර් 9500 කට අසන්න මුදලක් සිසුන්ගෙන් අයකරමින් සිටින අතර දෙවන වසරේ සිට ඩොලර් 5500 ක මුදලක් අය කරමින් සිටියි. ශ්‍රී ලංකා වෛද්‍ය සභාව Tver State Medical University විසින් ලබාදෙන වෛද්‍ය උපාධිය අවම ගුණත්වයකින් හෝ නොමැති බවට නිර්දේශ කර තිබුන ද ශ්‍රී ජයවර්ධනපුර විශ්වවිද්‍යාලය වැනි ශ්‍රී ලංකාවේ ප්‍රමුඛතම විශ්වවිද්‍යාලයක් සමග අවබෝධතා ගිවිසුම්වලට එළඹීම මගින් අපේ රටේ සිසුන් මුලාවී ගුණත්වයෙන් බාල මෙම විශ්වවිද්‍යාලයේ අධ්‍යාපනය ලැබීමට පෙළඹවීමක් ඇතිවිය හැකිය.
රුසියාවේ ශ්‍රී ලංකා තානාපතිනිය ජනිතා ලියනගේ මහත්මිය REC Campus තැරව්කාර ආයතනය ප්‍රවර්ධනය කිරීම සඳහා දායක වූ ප්‍රථම සහ එකම අවස්ථාව මෙය නොවේ. මීට ඉහතදී ද ශ්‍රී ලංකාවේ සිසුන් රුසියාවට ගෙන්වීම සඳහා සිදුකල ප්‍රවර්ධන වැඩසටහන් සඳහා දායක වී ඇත. ශ්‍රී ලංකාව ඩොලර් අර්බුදයක සිරවී සිටින අවස්ථාවක, ශ්‍රී ලංකාවේ ඩොලර් රුසියාවට ගෙනයන පුද්ගලික ව්‍යාපාර ප්‍රවර්ධනය කිරීම අනුමත කල හැකිද? ශ්‍රී ලංකා මහජනතාවගේ මුදලින් නඩත්තුවන තානාපතිනිය, ඇය පත්වූ දා සිට එකම හෝ රුසියානු ආයෝජණයක් ශ්‍රී ලංකාවට ගෙනවිත් තිබේද? අර්බුදකාරී කාලසීමාව තුල ලෝක බලවත් රාජ්‍යය දෙකෙන් එක් රාජ්‍යයක තානාපතිනිය ලෙස දැක්වූ දායකත්වය කෙබදු ද? තම බලය අවබවිතා කරමින් පුද්ගලික ව්‍යාපාරයක් ප්‍රවර්ධනය කිරීමට ඇති බලය කුමක්ද? යන කාරණා පිළිබඳව සැලකිල්ලට ගෙන රුසියානු තානාපති ලෙස විදේශ සේවයේ පළපුරුදු රාජ්‍ය තාන්ත්‍රිකයකු පත්කිරීමට කටයුතු කළහොත් එය ජනාධිපති තුමා විසින් ශ්‍රී ලංකාව නැවත ගොඩනැගීමට ගෙනයන මෙහෙයුමට යහපත් ලෙස බලපානු ඇති බව අපගේ විශ්වාසයයි.
ස්තුතියි,
මෙයට,
විශ්වාසී,
සංජය මහවත්ත.
සභාපති – මගෙන් රටට සංවිධානය
Source From colombotoday
Author: colombotoday.com
#SriLanka #News #lka