යකඩ කූරක් ඇණුනා කී විදුලිබල සේවකයා මියගියේ ආසාවට පොලිස් පිස්තෝලයක් අතගාන්න ගිහිං

අම්බලන්ගොඩ සීනිගොඩ පිහිටි විදුලිබල මණ්ඩලයට අයත් නඩත්තු ඒකකයේ සේවය කළ පුද්ගලයෙකුගේ මරණය සැකසහිත වීම නිසා පසුගියදා පොලීසිය පරීක්ෂණ ආරම්භ කර තිබුණා.

ඒ අනුව එම විමර්ශනවලදී අනාවරණ වී ඇත්තේ මෙම විදුලි සේවකයාට පොලිස් නිලධාරියෙකුට අයත් ගිනි අවියකින් වෙඩි වැදී ඇති බවයි.

එහිදී විදුලි සේවකයා සහ ඔහු සමඟ සිටි තවත් සේවකයින් කිහිපදෙනෙකු මිතුරු පොලිස් නිලධාරියෙකුට අයත් නිවසකට පැමිණි අවස්ථාවේදී එහි තිබූ ගිනි අවියක් පරීක්ෂා කරමින් සිටියදී වෙඩි වැදීම සිදුව තිබෙනවා.

සිද්ධිය සම්බන්ධයෙන් අදාළ පොලිස් නිලධාරියා ඇතුළු 6 දෙනෙකු සැකපිට අත්අඩංගුවට ගෙන තිබෙනවා.

24 හැවිරිදි ප්‍රියදර්ශන් පුෂ්පකුමාර නැමති කළුතර, දොඩංගොඩ ප්‍රදේශයේ පදිංචි මොහු විදුලි කම්බි ඇදීමේ කටයුතු සඳහා ඌරගස්මංහන්දිය, යටගල වල්ඉඟුරුකැටිය ප්‍රදේශයට ගොස් සිටිය දී සිදුවු තුවාලයක් හේතුවෙන් රෝහල් ගත කර තිබුණා.

ඔහු රෝහල්ගත කරන විට සෙසු සේවකයින් රෝහලට පවසා ඇත්තේ යකඩ කූරක් ඇනීම හේතුවෙන් අදාළ පුද්ගලයාගේ බඩ ප්‍රදේශය තුවාල වී ඇති බවයි.

වෛද්‍යවරු තුවාලකරු ශල්‍යකර්මයක් සඳහා යොමුකර ඇති නමුත් පැය කිහිපයකට පසුව ඔහු ජීවිතක්ෂයට පත්ව තිබෙනවා.