තමා ජනාධිපති ධුරයේ කටයුතු කරන සමයේ දී අත්සන් කළ ඇතැම් ගැසට් නිවේදන තවමත් ක්‍රියාත්මක වී නැතැයි හිටපු ජනාධිපති මෛත්‍රීපාල සිරිසේන මහතා පවසයි.
පරිසරයේ ආරක්ෂාව වෙනුවෙන් තමන් එම ගැසට් නිවේදන අත්සන් කළ බවද ඔහු සදහන් කරයි.
කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේ පැවති උත්සවයකට එක්වෙමින් හිටපු ජනාධිපතිවරයා සඳහන් කළේ වත්මන් ආණ්ඩුව යටතේ පස් සහ වැලි ප්‍රවාහන බලපත්‍ර ඉවත් කිරීම පිළිබඳ තමන් පුදුමයට පත්වු බවය.
“මම ජනාධිපති ධූරය දරන කාලයේ පරිසරය ආරක්ෂාවට එක් දිනකදී ගැසට් නිවේදන 65ක් අත්සන් කළා. ඉන් මාස 3කට පමණ පසුව ජනාධිපති ධුරයෙන් මම සමුගත්තා.”
“ඒ අත්සන් කරපු ගැසට් නිවේදනවලින් ඇතැම් ගැසට් නිවේදන තවමත් ක්‍රියාත්මක වී නැහැ. ගෙවල්වල තිබෙන විදුලි කියත් ලියාපදිංචි කරන්න නිවේදනයක් නිකුත් කළේ මම. සමහරු මට හිනා වුණා. සමාජ වෙබ් අඩවිවලින් මට කුඩුවෙන්න ගැහුවා. මට පිස්සු කියලා. මගේ ශරීරයේ කෑලි ගැලෙව්වේ නැති ටික විතරයි සමාජ මාධ්‍ය.”
“වඩුමඩු නව බලපත්‍ර නවත්වන්න නියෝග කළා. සියල්ල කළේ පරිසරය අරක්ෂා කරගන්න. ජාවාරම් කරුවන් පරිසරය විනාශ කරනවා. දේශපාලකයින්ද සම්බන්ධයි.”
“පසුගිය කාලයේදී පස් සහ වැලි ප්‍රවාහන බලපත්‍ර ඉවත් කිරීම ගැන මම හරි පුදුමයට පත්වුණා ඇයි මේ වගේ තීරණයක් ගත්තේ කියලා.”
Source From colombotoday
Author: ctadmin
#SriLanka #News #lka