කටුගස්තොට පස් මහල් ගොඩනැගිල්ලක් ගිලා බසියි

කටුගස්තොට – කුරුණෑගල මාර්ගයේ නැවත දැනුම් දෙන තුරු බර වාහන ධාවනය කිරීමෙන් වළකින්නැයි, ජාතික ආපදා කළමනාකරණ මධ්‍යස්ථානය දැනුම් දෙයි.

ඒම මධ්‍යස්ථානය උපුටා දක්වමින් රජයේ ප්‍රවෘත්ති දෙපාර්තමේන්තුව පැවසුවේ, කටුගස්තොට මංසන්ධියට කිලෝමිටර් 0 2 ක් පමණ දුරින් ඉදි කෙරෙමින් පවතින පස් මහල් වාණිජ ගොඩනැගිල්ලක් ඊයේ (12)දින සවස 5.30 ට පමණ හදිසියේ ගිලා බැස ඇති බවයි.

ගොඩනැගිල්ල ගිලා බැසීමෙන් කිසිදු ජීවිත හානියක් සිදුව නොමැත.

මේ අතර පොලීසිය පැවසුවේ බර වාහන ධාවනය සඳහා විකල්ප මාර්ග කිහිපයක් හඳුන්වා දී ඇති බවයි.

ඒ අනුව මහනුවර සහ මාතලේ දෙස සිට කටුගස්තොට මාර්ගය ඔස්සේ කුරුණෑගලට ගමන් කරන බර වාහන ගොහාගොඩ මාර්ගයෙන් වමට හැරී බරිගම මාර්ගයට පිවිස කුරුණෑගල දෙසට ධාවනය කළ හැකියි.

මීට අමතරව කුරුණෑගල සිට කටුගස්තොට දෙසට ධාවනය කරන බර වාහන බරිගම මාර්ගයෙන් පැමිණ ගොහාගොඩ මාර්ගය ඔස්සේ කටුගස්තොටට ධාවනය කළ හැකි බව ද පොලිසිය සඳහන් කළේ ය.