ෆොන්ටෙරා සමාගම කිරි ගොවීන් සමග එක්වී බිම් මට්ටමින් විසඳුම් සොයයි සත්ත්ව ආහාර හා උපකරණ ද පරිත්‍යාග කෙරේ

ෆොන්ටෙරා සමාගම කිරි ගොවීන් සමග එක්වී බිම් මට්ටමින් විසඳුම් සොයයි සත්ත්ව ආහාර හා උපකරණ ද පරිත්‍යාග කෙරේ

ෆොන්ටෙරා බ්‍රෑන්ඞ්ස් ලංකා සමාගම, තමන් සමග අත්වැල් බැඳගෙන සිටින කිරි ගොවීන් සමග එක්වී, කිරි වල තත්ත්වය හා ප්‍රමාණය වැඩි කිරීම සම්බන්ධයෙන් විසඳුම් හඳුනාගෙන ක්‍රියාත්මක කිරීම සඳහා විශේෂ සාකච්ඡා මාලාවක් ආරම්භ කිරීමට පසුගියදා කටයුතු කළේ ය. මෙහිදී සත්ත්ව ආහාර සහ, කිරි ගොවිතැනට අවශ්‍ය උපකරණ බෙදාදීමක්ද සිදුවිය. 

ශ්‍රී ලංකාවේ දේශීය කිරි කර්මාන්තයේ ජීවනාලිය වන්නේ සුළු පරිමාණ කිරි ගොවීන් ය. මෙරට කිරි සැපයුමෙන් 90% ක්ම ලැබෙනුයේ ඔවුන් වෙතිනි. ඔවුන්ට දැනුම හා පුහුණුව ලබාදීම, ප්‍රායෝගික ව්‍යාපාර ආකෘතියක් හඳුන්වා දීම සහ කිරි කර්මාන්තයට සම්බන්ධ විශේෂඥ දැනුම ඔස්සේ ඔවුන්ට පැහැදිලි මගපෙන්වීමක් ලබාදීම වැනි ක්‍රියාමාර්ග ඔස්සේ ඔවුන්ගේ කුසලතා වැඩිදියුණු කරමින්, ඔවුන්ගේ ජීවනෝපාය මාර්ගයන්හි ක්‍රියාකාරීත්වය සහ එමගින් ඔවුන්ට ලැබෙන ආදායම ඉහළ නැංවිය හැකි වේ.

මෙම අරමුණ මූලික කරගෙන, ෆොන්ටෙරා සමාගමේ ශ්‍රී ලංකාව සහ ඉන්දියානු අර්ධද්වීපය සඳහා කළමනාකාර අධ්‍යක්ෂිකා විද්‍යා සිවරාජා මහත්මියගේ මූලිකත්වයෙන්, කුරුණෑගල බිංගිරිය ප්‍රදේශයේ කිරි ගොවීන් සහ ෆොන්ටෙරා සැපයුම්කරු සම්බන්ධතා නිලධාරීන් පිරිසක් සම්බන්ධ කරගනිමින් මෙම කිරි ගොවි සාකච්ඡා වැඩසටහන ආරම්භ කරන ලදි.

“හොඳම අදහස් හා යෝජනා පැමිණෙන්නේ බිම් මට්ටමිනුයි. පසුගිය ජූලි මාසයේදී අප ආරම්භ කළ කිරිගොවි සංවාද වැඩසටහන ඔස්සේ, අපගේ කිරි ගොවීන් මුහුණු දෙන විවිධාකාරයේ ගැටලු සම්බන්ධයෙන් පැහැදිලි අවබෝධයක් ලබාගන්නට අපට හැකියාව ලැබුණා. කිරි වල තත්ත්වය හා ප්‍රමාණය වැඩිකිරීම සඳහා අවශ්‍ය විසඳුම් ඔවුන් සමග එක්ව නිර්මාණය කිරීම සඳහා අප ගන්නා උත්සාහයේදී මෙවැනි සාකච්ඡා අතිශයින් වැදගත්. ඒ වගේම අප හඳුනාගෙන ක්‍රියාත්මක කරන විසඳුම්, ආර්ථික පුනර්ජීවනය හා දරිද්‍රතාව තුරන් කිරීම පිළිබඳ ජනාධිපති කාර්ය සාධක බලකාය මගින් ඉදිරිපත් කර ඇති නිර්දේශ වලට සමගාමී බවත් මෙහිදී විශේෂයෙන් සඳහන් කළ යුතුයි.

“අපගේ රට සම්පත්, කුසලතා සහ නිර්මාණශීලීත්වය නොඅඩුව ඇති රටක්. රටේ ප්‍රමුඛතාවන්ට සමගාමීව මේ ගුණාංග වලින් උපරිම ප්‍රයෝජන ලබමින් ඉදිරියට යාමට අප සූදානම්.” විද්‍යා සිවරාජා මහත්මිය පැවසුවා ය.

මේ ආකාරයේ කිරි ගොවි සාකච්ඡා වැඩසටහනක් පසුගියදා ෆොන්ටෙරා සමාගමට කිරි සපයන කිරි ගොවියෙකු වන ධර්මශ්‍රී තෙන්නකෝන් මහතාගේ ගොවිපොළ පරිශ්‍රයේදී පැවැත්විණි. මෙම සාකච්ඡාවට ඒ අවට පදිංචි තවත් කිරිගොවීහු පිරිසක් සහභාගී වූහ. මෙහිදී අදහස් දක්වමින් ධර්මශ්‍රී තෙන්නකෝන් මහතා මෙසේ පැවසී ය. “මෙම සාකච්ඡාව තුළින් අපි වටිනා දේවල් රාශියක් ඉගෙනගත්තා වගේම අත්දැකීමතුත් ලැබුවා. මේ සියල්ලම දැන් අපට අපේ කර්මාන්තයට යොදා ගැනීමේ හැකියාව තිබෙනවා. මෙහිදී සත්ත්ව ආහාර කළමනාකරණය පිළිබඳවත් සාකච්ඡා කෙරුණා. ඒ වගේම, මෙම වැඩසටහන අවසානයේ තණකොළ කපන උපකරණ පිරිනැමීමට කටයුතු කිරීම සම්බන්ධයෙනුත් මා ස්තූතිවන්ත වනවා. ඉදිරියේදීත් ෆොන්ටෙරා සමාගම මෙවැනි වැඩසටහන් සංවිධානය කරනු ඇතැයි යන්න මගේ බලාපොරොත්තුවයි. එමගින් අපට ප්‍රජාවක් ලෙස එක්වී ඉදිරියට යමින්, ගැටලු වලට විසඳුම් සොයාගැනීමට හැකියාව ලැබේවි.”

තවද ෆොන්ටෙරා සමාගම පන්නල පිහිටි සිය පුහුණු හා ආදර්ශන ගොවිපළෙන් ගොවීන්ට නොමිලේ සත්ත්ව ආහාර ලබාගැනීමේ පහසුකම්ද සලසා දී තිබිණි.

“සත්ත්ව ආහාර ලබාගැනීම දුෂ්කර වගේම ඒවා මිලෙන් අධික වී ඇති මෙවැනි කාලයක, ෆොන්ටෙරා වෙතින් මේ ආකාරයට අතිරේක සත්ත්ව ආහාර ලබාගැනීමට හැකිවීම මට විශාල සහනයක් වුණා.” මෑතකදී ෆොන්ටෙරා ගොවිපළෙන් වෙතින් සත්ත්ව ආහාර ලබාගත්, කුලියාපිටිය ප්‍රදේශයේ කිරි ගොවියෙකු වන ඉන්ද්‍ර ජයසිංහ මහතා පැවසී ය.

ඇන්කර් සහ ඇන්කර් නිව්ඬේල් යන සන්නාම යටතේ පැමිණෙන සෙට් යෝගට්, ස්ටර්ඞ් යෝගට්, පානීය යෝගට්, නැවුම් කිරි, ඹ්‍යඔ කිරි සහ රසකළ කිරි වැනි නිෂ්පාදන නිපදවනු ලබන්නේ, ෆොන්ටෙරා බ්‍රෑන්ඞ්ස් ලංකා සමාගම සමග අත්වැල් බැඳගෙන සිටින සුළු පරිමාණ කිරි ගොවීන් විසින් සපයනු ලබන කිරි වලිනි.

Source FromBusiness AM
Author:
#SriLanka #News #lka