ඉන්දියන් සාගර කලාපයේ ආරක්ෂාව ගැන පාත්ෆයින්ඩර් තෙදින සමුළුව අද ඇරඹේ

ඉන්දියන් සාගර කලාපයේ ආරක්ෂාව ගැන පාත්ෆයින්ඩර් තෙදින සමුළුව අද ඇරඹේ

ඉන්දියන් සාගර කලාපයේ ආරක්ෂාව සම්බන්ධයෙන් අවධානය යොමු කරන දින තුනක විශේෂ ඔන්ලයින් සංවාදයක් පැවැත්වීමට පාත්ෆයින්ඩර් පදනම කටයුතු සංවිධානය කර තිබේ. අද නොවැ.10 මධ්‍යහ්න 12.00ට ඇරඹෙන පළමු සැසිය පස්වරු 3.00 දක්වා පැවැත්වෙන අතර අතර රටවල් තිස් හයක රාජ්‍ය නියෝජිතයෝ, රාජ්‍ය තාන්ත්‍රික නිලධාරීන්, ක්ෂේත්‍රයේ විශේෂඥයන්, බුද්ධි මණ්ඩල නියෝජිතයන් සහ තෝරා ගත් සංවිධානවල නියෝජිතයන් සියයකට වඩා සහභාගීවීමට නියමිතය.

රටවල් සහ සංවිධාන ගණනාවක් සහභාගී වූ මුලික වටයේ සමුළු කිහිපයක් පසුගිය කාලයේ සාර්ථකව සංවිධානය කළ පාත්ෆයින්ඩර් පදනම මෙම අන්තර් ජාල සමුළුව වඩා පුලුල් සහ තීරණාත්මක කරුණු ගණනාවක් ඉලක්ක කර කරුණු සාකච්ඡා කරන්නට වෙන් කර ඇති බව දක්වයි. විදේශ ලේකම් අද්මිරාල් මහාචාර්ය ජයනාත් කොළඹගේ, ඇමරිකානු තානාපතිනි අලෙයිනා ටෙප්ලයිට්ස්, ජපානයේ තානාපති අකිරා සුගියාමා, මෙම සමුළුවේ සම සභාපති ධුරය හොබවන, ඉන්දීය ජාතික ආරක්ෂක උපදේශක ශිවශන්කර් මෙනන් සහ පාත්ෆයින්ඩර් පදනමේ සභාපති බර්නාඞ් ගුණතිලක පළමු දිනයේ දී සාකච්ඡාවලට සහභාගීවීමට නියමිතය.

තෙදින සමුළුව දිනපතා පැය එකහමාර බැගින් පවත්වන අතර සමුද්‍රීය ආරක්ෂාව හා නාවික ගමනාගමනයේ නිදහස තේමාව කරගෙන සිංගප්පුරු විශ්ව විද්‍යාලයේ දකුණු ආසියානු අධ්‍යයන අංශයේ මහාචාර්ය සී රාජමෝහන් මහතා පළමු සැසිය මෙහෙයවන අතර දෙවැනි සැසිය, ආසියානු කලාපයේ සබදතා තරකිරීම මැයෙන් දකුණු ආසියානු වැඩසටහනේ අධ්‍යක්ෂක ආචාර්ය ෆෙඩි්‍රක් ග්‍රෙයා මහතා ද තුන්වන සැසිය ජාත්‍යන්තර සාමය බලවත් කිරීම මැයෙන් හිටපු තානාපති සහ දකුණු හා මධ්‍යම ආසියානු රටවල් සඳහා වූ ඇමරිකානු සහකාර ලේකම් රොබට් ඕ බ්ලේක් මහතා මෙහෙයවන්නට නියමිතය.

ඉන්දියාව, රැසියාව, ඇමරිකාව, සිංගප්පුරුව, දකුණු අප්‍රිකාව, ඔස්ටේ්‍රලියාව, චීනය, ජපානය සහ ශ්‍රී ලංකාවේ නියෝජිතයෝ මෙම සැසි වල දී සජීවී අන්තර්ජාල සම්බන්ධතා වලින් සිය වාර්තා ඉදිරිපත් කරනු ඇත.

Source FromBusiness AM
Author:
#SriLanka #News #lka