NIVEA නිෂ්පාදන මෙරට වෙළඳපොළ තුළ තවත් ප්‍රචලිත කිරීමට NIVEA  සහ Hemas Consumer එක්වෙයි

චර්ම සත්කාර සම්බන්ධයෙන් ජාත්‍යන්තර කීර්තියක් දිනා ඇති, වසර 100 කට අධික උරුමයක් හිමි, ලොව වඩාත්ම විශ්වාසය දිනූ Skin Care  සන්නාමය ලෙස සැලකෙන NIVEA, ශ්‍රී ලාංකික වෙළඳපොළ තුළ තවතවත් ව්‍යාප්ත වීමේ අරමුණින්, මෙරට Home Care සහ Personal Care ක්ෂේත්‍ර වල ප්‍රමුඛතම නිෂ්පාදකයා ලෙස සැලකෙන Hemas Consumer සමග අත්වැල් බැඳගැනීමට පසුගියදා කටයුතු කළේ ය. මෙම හවුල්කාරීත්වය ඔස්සේ ලොව Skin Care කාණ්ඩයේ ජාත්‍යන්තර මට්ටමේ ප්‍රමුඛතම නිෂ්පාදන පෙළක් මිලදී ගැනීමට ශ්‍රී ලාංකිකයන්ට අවස්ථාව ලැබෙනු ඇත.

NIVEA නිෂ්පාදන මේ වනවිට රටවල් 173 කට අධික සංඛ්‍යාවක ව්‍යාප්ත වී ඇති අතර, එම නිෂ්පාදන දශක ගණනාවක පාරිභෝගික අත්දැකීම් වලින් පන්නරය ලබමින්, ජාත්‍යන්තර ප්‍රමිතීන්ට අනුව, දේශීය තත්ත්වයන්ට ගැළපෙන පරිදි සැකසූ නිෂ්පාදන එකතුවක් ලෙස හැඳින්විය හැකි වේ. මේ නිසාම සිය අඛණ්ඩ නිෂ්පාදන සංවර්ධන හා නවෝත්පාදන ක්‍රියාවලිය ඔස්සේ සෑම පාරිභෝගිකයෙකුටම ගැළපෙන නිෂ්පාදන එකතුවක් හඳුන්වා දීමට NIVEA සමත් වී ඇත. මෙහි ඉදිරි පියවරක් ලෙස, Hemas Consumer සමග ඇතිකරගත් හවුල්කාරීත්වය ඔස්සේ ශ්‍රී ලාංකිකයන් වෙත තවතවත් සමීප වීම Hemas Consumer හි අපේක්ෂාව වී තිබේ.

මෙම හවුල්කාරීත්වය සම්බන්ධයෙන් අදහස් දක්වමින් NIVEA India හි සහකාර අධ්‍යක්ෂ (ජාත්‍යන්තර ව්‍යාපාර) සුධාන්ෂු ක්‍රිෂ්ණා මහතා මෙසේ පැවසී ය. “NIVEA මෙන්ම පාරිභෝගිකයන් පිළිබඳව පුළුල් අවබෝධයක් ඇති සුප්‍රකට බෙදාහැරීම් සමාගමක් වන Hemas Consumer සමග මෙලෙස අත්වැල් බැඳගැනීමට හැකිවීමට අපට මහත් සතුටක්. අපගේ පාරිභෝගිකයන්ට අගය එකතු කළ වටිනාකම් හා විසඳුම් හඳුන්වා දීමේදී Hemas Consumer සතු අත්දැකීම් විශාල පිටිවහලක් වනු ඇතැයි කියා අප සිතනවා. NIVEA යනු කාලාන්තරයක් තිස්සේ උසස්ම ප්‍රමිතියෙන් යුත් නිෂ්පාදන හඳුන්වා දෙමින් ජාත්‍යන්තර Skin care නිෂ්පාදන වෙළඳපොළේ ප්‍රමුඛතම ස්ථානයක් හිමිකර ගැනීමට සමත් වූ සන්නාමයක්. දකුණු ආසියාවේ ආර්ථික සංවර්ධනය සහ ශ්‍රී ලංකාවේ වෙළඳපොළ තුළ ඇති අවස්ථාවන් සැලකිල්ලට ගත් විට, මේ හවුල්කාරීත්වය ඔස්සේ වඩාත් පුළුල් පරාසයක් ආවරණය කරමින් විශිෂ්ට පාරිභෝගික සේවාවක් ලබාදීමට අපට හැකිවනු ඇතැයි කියා අප විශ්වාස කරනවා.”

Hemas Consumer හි කළමනාකාර අධ්‍යක්ෂ සහ Hemas සමූහ ව්‍යාපාරයේ විධායක අධ්‍යක්ෂ ශ්‍රියාන් ද සිල්වා මහතා අදහස් දැක්වූයේ මෙසේ ය. “NIVEA සමග නව ගමනක් ආරම්භ කරමින්, එම නිෂ්පාදන වඩාත් පුළුල් පාරිභෝගික පිරිසක් වෙත සමීප කරවන්නට අප සූදානම්. මේ ආකාරයට ජාත්යන්තර වශයෙන් අතිශයින් ජනප්‍රිය සන්නාමයක් සමග අත්වැල් බැඳගැනීමට හැකිවීම ගැන අප බෙහෙවින් සතුටු වනවා. NIVEA වගේම Hemas සමාගමත් ‘Personal Care’ කාණ්ඩය තුළ ක්‍රියාත්මක වන නිසා මේ හවුල්කාරීත්වය වඩාත් ශක්තිමත් වන අතරම, මෙම කාණ්ඩය තුළ වැඩි වැඩියෙන් අවස්ථා හඹා යන්නට දෙපාර්ශ්වයටම අවස්ථාව ලැබේවි.  Hemas Consumer මේ වනවිට සුවිශේෂී නව ගමනක් ආරම්භ කර තිබෙනවා. ඒ ගමන තුළදී මෙවැනි නව හවුල්කාරීත්වයන් අප පිළිගන්නේ ඉමහත් සතුටින්. ඒ වගේම අප ගැන විශ්වාසය තැබීම සම්බන්ධයෙන් NIVEA කළමනාකාරීත්වයට අපගේ ස්තූතිය හිමිවනවා.”

Hemas Consumer හි අධ්‍යක්ෂිකා (ව්‍යාපාර සංවර්ධන සහ නවෝත්පාදන) සබ්රිනා එසුෆලි මහත්මිය මෙසේ සිය අදහස් දැක්වූවා ය. “නවීනතම Personal care විසඳුම් ශ්‍රී ලංකාවට හඳුන්වා දීමට ලැබීම අපට මහත් සතුටක්. අප බෙදාහරින නිෂ්පාදන අතරට NIVEA නිෂ්පාදනත් එක්කර ගැනීමට හැකිවීම ඔස්සේ අපගේ නිෂ්පාදන එකතුව වඩාත් පුළුල් වන අතරම, තවත් ලොව පිළිගත් Skin Care සන්නාමයක් ශ්‍රී ලාංකික පාරිභෝගිකයන් වෙත සමීප කරවීමට අපට අවස්ථාව ලැබී තිබෙනවා.”

මෙම හවුල්කාරීත්ව නිසා මින් ඉදිරියට මෙරට සාමාන්‍ය අලෙවිසැල්, තොග අලෙවිසැල් සහ අන්තර්ජාල අලෙවිසැල් වෙතින් NIVEA නිෂ්පාදන සියල්ල මිලදී ගැනීමට මෙරට පාරිභෝගිකයන්ට අවස්ථාව ලැබෙනු ඇත. මීට සමගාමීව අලෙවිසැල් වල ප්‍රචාරක පුවරු, අන්තර්ජාල දැන්වීම් සහ පාරිභෝගික ප්‍රවර්ධන වැඩසටහන් ඇතුළුව ප්‍රචාරණ හා ප්‍රවර්ධන වැඩසටහන් රාශියක්ද ක්‍රියාවට නැංවීමට සැලසුම් කර තිබේ.

The post NIVEA නිෂ්පාදන මෙරට වෙළඳපොළ තුළ තවත් ප්‍රචලිත කිරීමට NIVEA  සහ Hemas Consumer එක්වෙයි appeared first on Adaderana Biz Sinhala | Sri Lanka Business News.

Source From biz.adaderana
Author: Biz Editor
#SriLanka #News #lka