Medicare 2023 ප්‍රදර්ශනය සඳහා ප්‍රධාන අනුග්‍රාහකත්වය ආසිරි හෙල්ත් වෙතින්

ශ්‍රී ලංකාවේ ප්‍රමුඛතම පෞද්ගලික රෝහල් සමූහයක් වන ආසිරි සමූහය Medicare 2023 ප්‍රදර්ශනය සඳහා නිල ප්‍රධාන අනුග්‍රාහකයා වශයෙන් සිය සහයෝගය ලබා දීමට ඉදිරිපත්ව ඇත. ශ්‍රී ලංකාවේ සුවසේවා ක්ෂේත්‍රයේ දැවැන්තම ඉසව්වක් වන Medicare 2023 ප්‍රදර්ශනය මාර්තු 3, 4 සහ 5 යන දිනයන්හිදී කොළඹ BMICH හි සිරිමාවෝ බණ්ඩාරණායක අනුස්මරණ මධ්‍යස්ථානයේදී පැවත්වීමට නියමිතය.

Medicare 2023 ප්‍රදර්ශනය එහි සංවිධායක මණ්ඩලය Aitken Spence Events & Exhibitions ආයතනය සහ විශේෂඥ වෛද්‍ය සංවිධානවල සහය ඇතිව සෞඛ්‍ය අමාත්‍යංශයේ මාර්ගෝපදේශනය යටතේ සංවිධානය කෙරෙන අතර Medicare 2023 ප්‍රදර්ශනය සඳහා ආසිරි සමූහය මින් පෙර අවස්ථාව ගණනාවකදීද විවිධ අයුරින් අනුග්‍රාහකත්වය දක්වා ඇත.

Medicare 2023 ප්‍රදර්ශනය සඳහා ඖෂධ, වෛද්‍ය උපකරණ සහ රෝහල් යන ප්‍රධාන සුවසේවා ක්ෂේත්‍ර නියෝජනය කරමින් දෙස් විදෙස් ප්‍රදර්ශකයින් රැසක් සහභාගී වීමට නියමිත වන අතර ප්‍රදර්ශන කුටි 100 කට අධික ප්‍රමාණයකින් සමන්විත ප්‍රදර්ශන භූමිය වෙත 10,000 කට අධික නරඹන්නන් පිරිසක් ආකර්ෂණය වනු ඇතැයි සංවිධායකයෝ අපේක්ෂා කරති.

ආසිරි රෝහල් සමූහය පෙර අවස්ථාවලදී මෙන් මෙවරද දක්ෂ වෛද්‍යවරුන් සහ සුවසේවා වෘත්තිකයින් පිරිසක් සමඟින් ප්‍රදර්ශනයට සහභාගී වන පිරිස සඳහා නොමිලේ මූලික සෞඛ්‍ය තත්ත්ව ඇගයීම් ලබා දීම සහ උපදේශනය සිදු කරනු ඇත. එමෙන්ම ප්‍රදර්ශන භූමියේ පිහිටා ඇති ආසිරි සමූහයේ කුටිය හරහා ආසිරි සාඵල්‍යතා මධ්‍යස්ථානය, පිළිකා මධ්‍යස්ථානය, හදවත්, මොළය සහ කොඳු ඇටපෙළ සම්බන්ධ ප්‍රතිකාර මධ්‍යස්ථාන, අවයව බද්ධ කිරීම පිළිබඳව මධ්‍යස්ථානය සහ ආසිරි පර්යේෂණාගාර සේවාවන් පිළිබඳව නරඹන්නන් දැනුවත් කිරීමට කටයුතු යොදා ඇත.

වසර 35කට වැඩි කාලයක් පුරා නවීන තාක්‍ෂණය තුළින් සදාචාරාත්මක සෞඛ්‍ය ආරක්ෂණ විසඳුම් සපයන ආසිරි හෙල්ත් මිනිසත් බවේ වටිනාකම රැකගැනීමේ මෙහෙය වෙනුවෙන් කැප වී සිටින ආයතනයකි. ආසිරි සමූහය වර්තමානයේදී ජාත්‍යන්තරව පිළිගත් රෝහල් 6ක් සමඟින් දිවයිනේ කලාප 3ක් පුරා ව්‍යාප්තව සේවා සපයන අතර, ඔවුන්ගේ රසායනාගාර ජාලය පර්යේෂණාගාර 19ක් සහ ඔවුන්ගේම සාම්පල එකතු කිරීමේ මධ්‍යස්ථාන 78කින් සමන්විතය. ශ්‍රී ලාංකිකයන්ට උසස් තත්ත්වයේ වෛද්‍ය ප්‍රතිකාර ලබාදීම සිය දැක්ම කොටගත් ආසිරි හෙල්ත්  Medicare 2023 වැනි ජාතික සෞඛ්‍ය සේවා වැඩසටහන් සඳහා සිය සහයෝගය අඛණ්ඩව දක්වනු ඇත.

The post Medicare 2023 ප්‍රදර්ශනය සඳහා ප්‍රධාන අනුග්‍රාහකත්වය ආසිරි හෙල්ත් වෙතින් appeared first on Adaderana Biz Sinhala | Sri Lanka Business News.

Source From biz.adaderana
Author: Bizweb2 Bizweb2
#SriLanka #News #lka