HNB ජෙනරල් ඉන්ෂුවරන්ස් 2024 SLIM ජාතික විකිණුම් සම්මාන උළෙලේදී ඉහළම සම්මාන ත්‍රිත්වයක් දිනා ගනී

සාමාන්‍ය රක්ෂණ ක්ෂේත්‍රය තුළ සිය සවිමත් ස්ථාවරත්වය තව දුරටත් විදහා දක්වමින් HNB ජෙනරල් ඉන්ෂුවරන්ස් සමාගම (HNBGI) පසුගියදා පැවති 2024 ජාතික විකිණුම් සම්මාන උළෙලේදී ඉහළම සම්මාන ත්‍රිත්වයකට හිමිකම් කීමට සමත් විය. ශ්‍රී ලංකා අලෙවිකරණ ආයතනය (SLIM) විසින් වාර්ෂිකව පවත්වන ජාතික විකිණුම් සම්මාන උළෙල ශ්‍රී ලංකාවේ සියළුම ව්‍යාපාර ක්ෂේත්‍රවල විකිණුම් වෘත්තිකයින්ගේ සාර්ථකත්වය ඇගයීමට ලක් කරන ජාතික වේදිකාවකි.

2023/24 කාල පරිච්ඡේදය තුළ HNB ජෙනරල් ඉන්ෂුවරන්ස් සමාගම විකිණුම් අංශයෙන් ලැබූ සාර්ථකත්වය වෙනුවෙන් ලද සම්මානයන් අතර ප්‍රමුඛ වන්නේ HNB ජෙනරල් ඉන්ෂුවරන්ස් සමාගමේ ව්‍යාපාර සංවර්ධන කළමනාකරු දනිඳු ටී. ගලප්පත්ති මහතා විසින් දිනාගත් ‘හොඳම ජාතික විකිණුම් කළමනාකරු’ කාණ්ඩයේ රිදී සම්මානයයි. HNB ජෙනරල් ඉන්ෂුවරන්ස් සමාගමේ සාර්ථකත්වයට දනිඳුගේ දායකත්වය අංශ ගණනාවකින් හිමි වූ අතර ඊට සමාගමේ ක්‍රියාකාරී විකිණුම් කණ්ඩායම සිය ඉලක්ක සපුරා ගැනීම සඳහා දක්ෂ ලෙස මෙහෙයවීම, නව්‍යකරණ තාක්ෂණය යොදා ගැනීම, නව වෙළඳපොළ කොටස් ජයගැනීම සඳහා නිෂ්පාදන විවිධාංගීකරණය සහ නිෂ්පාදන ඒකාබද්ධ කිරීම වැනි උපාය මාර්ග භාවිතය අයත් වේ.

HNB ජෙනරල් ඉන්ෂුවරන්ස් සමාගමේ මාළඹේ ශාඛා කළමනාකරු පුලස්ති බණ්ඩාර මහතා ‘හොඳම කලාපීය කළමණාකරු’ කාණ්ඩය යටතේ රන් සම්මානය දිනා ගැනීමට සමත් වූ අතර විකිණුම් ඉලක්ක සපුරා ගැනීමට ඉවහල් වූ ඔහුගේ උපාය මාර්ගික හැකියාවන්, මූල්‍යකරණ දක්ෂතාවය සහ සන්නිවේදන හැකියාවන් මෙම සම්මානය ලබා දීමේදී සළකා බලා තිබිණි.

HNB ජෙනරල් ඉන්ෂුවරන්ස් සමාගමේ කොළඹ දකුණ සමූහ කළමනාකරු රංග දේශාන් මහතාද ‘හොඳම කලාපීය කළමණාකරු’ කාණ්ඩය යටතේ මෙරිට් සම්මානයකට හිමිකම් කී අතර සිය කළමනාකාරීත්වය යටතේ පැවති ශාඛාවන් ඉහළ විකිණුම් ඉලක්ක සපුරා ගැනීම සඳහා සාර්ථකව මෙහෙයවීම ඔහුට මෙම සම්මානය හිමිවීමට මූලික වශයෙන් හේතු විය. ශාඛා මට්ටමේ උපාය මාර්ග සැකසීම, විකිණුම් ඉලක්ක සපුරා ගැනීම, විකිණුම් කණ්ඩායම් සංවර්ධනය වැනි අංශවලින් රංග දේශාන් මහතා දැක්වූ දායකත්වය HNB ජෙනරල් ඉන්ෂුවරන්ස් සමාගම පසුගිය වසර තුළ අත්පත් කරගත් සාර්ථකත්වයට විශාල දායකත්වයක් දක්වා ඇත.

HNB ජෙනරල් ඉන්ෂුවරන්ස් සමාගමේ ප්‍රධාන විධායක නිලධාරී සිතුමිණ ජයසුන්දර මහතා මෙම ජයග්‍රහණය පිළිබඳව අදහස් දක්වමින් මෙසේ පැවසීය, “HNB ජෙනරල් ඉන්ෂුවරන්ස් සමාගම පසුගිය කාලසීමාව තුළ අත්පත් කරගත් සාර්ථකත්වයට මූලික හේතුව වන්නේ අපේ විකිණුම් කණ්ඩායමේ කැපවීම සහ දක්ෂතාවයයි. HNB ජෙනරල් ඉන්ෂුවරන්ස් සමාගම වශයෙන් අපි නිරන්තරයෙන්ම ඔවුන්ගේ දායකත්වය ඉහළින් සමරනවා. නමුත් මේ ආකාරයට ජාතික වේදිකාවක් මත ඔවුන්ගේ දක්ෂතාවය ඇගයීමට පාත්‍ර වීම ඉතාම සුවිශේෂී ජයග්‍රහණයක්. HNB ජෙනරල් ඉන්ෂුවරන්ස් සමාගම වෙනුවෙන් මම අප සියළු දෙනාගේම ශුභාශිංසන එක් කරනවා” යැයි පැවසීය.

2024 SLIM ජාතික විකිණුම් සම්මාන උළෙලේදී HNB ජෙනරල් ඉන්ෂුවරන්ස් සමාගම ලැබූ සාර්ථකත්වය නව්‍යකරණය, විශිෂ්ටත්වය මූලික කරගත් ආයතනික සංස්කෘතියක් නිර්මාණය කිරීම සහ අඛණ්ඩ වර්ධනය කෙරෙහි සමාගම දක්වන කැපවීම විදහා දක්වන්නකි. එමෙන්ම HNB ජෙනරල් ඉන්ෂුවරන්ස් සමාගම 2024 SLIM ජාතික විකිණුම් සම්මාන උළෙලේදීි ලද සාර්ථකත්වය සාමාන්‍ය රක්ෂණ ක්ෂේත්‍රය තුළ අත්පත් කරගෙන සිටින ස්ථාවරත්වය තවදුරටත් තහවුරු කරන්නක් වශයෙන් සැළකිය හැකිය.

The post HNB ජෙනරල් ඉන්ෂුවරන්ස් 2024 SLIM ජාතික විකිණුම් සම්මාන උළෙලේදී ඉහළම සම්මාන ත්‍රිත්වයක් දිනා ගනී appeared first on Adaderana Biz Sinhala | Sri Lanka Business News.

Source From biz.adaderana
Author: Bizweb2 Bizweb2
#SriLanka #News #lka