Gflock සභාපති ‌සමඟ සම්මුඛ සාකච්ඡාවක්

ඔබ ගැන විස්තර කිව්වොත්?
මම රනිල් විල්ලද්දරගේ Gflock කියන clothing brand එකේ සභාපති. වෘත්තියෙන් ව්‍යවසායකයෙක්, Fashion Designer කෙනෙක්. ඉපදුන ගම අකුරැස්ස.ශිෂ්‍යත්වය පාස් වෙලා කොළඹ රාජකීය විද්‍යාලයෙන් අධ්‍යාපනය ලැබුවා.

මේ මාධ්‍ය සාකච්ඡාවේ අරමුණ?
අද මා මෙසේ ඔබ මාධ්‍ය, ශ්‍රී ලාංකික, සහ විදෙස්ගතව සිටින සියළු ශ්‍රී ලාංකික ජනතාව වෙත පැමිණෙන්නේ අද ආර්ථීක අර්බුදයකින් විනාශයට පත් වී තිබෙන අපේ මාතෘ භූමිය මුදවා ගැනීමට මා විශ්වාස කරන අන්දමට ඩොලර් ඉපයීමේ තනි තිරසාර විසදුමක් සමග.
ඒ විසඳුමට එන්න කලින් අපේ ව්‍යාපාරයේ ස්වාභාවය සහ එහි ව්‍යාපාරික සංකල්පය, එවැනි ව්‍යාපාරික සංකල්පයක් ඇතිවීමට මූලික වූ කරුණු පැහැදිලි කරනවානම්, අපේ brand එක ඔබ බොහොමයක් දන්නා නිමි ඇදුම් නිර්මාණය සහ අලෙවි කරනා සන්නාමයක් වන Gflock.

Gflock කියන්නේ නිර්මාණශීලිත්වය මත පදනම් වූ Fast fashion clothing brand එකක්. ලෝකයේ තියෙන අනිත් fashion brands ප්‍රධාන ඍතු හතර පදනම් කරගෙන ඇදුම් නිර්මාණය කර Market එකට මුදා හරිද්දී, Gflock සතියකට styles 40-50 ක් පමණ  workwear, casual, eveningwear, linen, denim යන විවිධ අංශයන් නියෝජනය කරමින් සමාජ මාධ්‍ය පාවිච්චි කරමින් ශ්‍රී ලංකාව ඇතුලත Retail shop 03ක්, local online store සහ Gflock.com හරහා International Market වලටත් මුදා හරිනවා.විශාලත්වය කෙසේ වෙතත් මෙවැනි ආකාරයෙන් styles launch කළ හැකි Business model ලොව ඇත්තේ අතලොස්සක්. ඒ අතලොස්සෙන් Gflock කියන්නෙ අද්විතීය Brand එකක්.

ඔබ ව්‍යාපාරයේ විශේෂත්වය වන්නේ? ඔබ කතා කරන චක්‍රානුකූලත්වය(Circularity)කියන සංකල්පය, මේ ගැන විස්තර කිව්වොත්?
අපි ජීවත්වන්නේ ධනවාදී ආර්ථීක ක්‍රමයක.වෙනත් විදියකින් කියනවනම් මුදල් ඉපයීම මත පදනම්වූ ඉල්ලුම සහ සැපයුම මත මිල තීරණය වන ආර්ථීක රටාවක. ලෝකයේ ඇමෙරිකාව ප්‍රමුඛ බටහිර රටවල් ඉල්ලුම නියොජනය කරන අතරතුර චීනය ඇතුලු පෙරදිග රටවල් බොහොමයක් සැපයුම නියෝජනය කරනවා.ලෝකයේ තිබෙන සීමිත සම්පත් මත පාලනයෙන් තොරවූ ජනගහනයත්, එම ජනගහනයෙන් විශාල ප්‍රමාණයක් මේ කඳවුරු දෙකම නියෝජනය කිරීමට ඇති නොහැකියාව නිසා ඔවුන්ට මේ සීමිත සම්පත් පරිභෝජනය කිරීමේ අවස්ථාව මගහැරෙනවා. මේ විෂමතාවය නිසා මිනිසුන් 24000 කට වැඩි ප්‍රමාණයක් දිනපතා බඩගින්නේ හෝ බඩගින්න ආශ්‍රිත රෝග වලින් මිය යනවා. මෙයිනුත් භාගයකටත් වඩා කුඩා ළමුන්. නමුත් අවාසනාවකට බඩගින්නෙ තියන දුක ලෝකයේ පැවැත්මේ දිශාව තීරණය කරන නායකයන්ට දැනෙන දුකක් නොවන නිසා මේ ප්‍රශ්නයට විසදුමක් ලැබෙන්නෙ නෑ.නමුත් නායකයන්ට දැනෙන Corona වැනි වසංගත ප්‍රශ්න වලට සියළු විසඳුම් ලැබෙනවා.

ධනවාදී ක්‍රමය මූලික වශයෙන් රඳා පවතින්නේ පෞද්ගලික අංශයේ. රජය කොටස්කාරයෙක් වුනත් රජයට මේ System එකට කල හැකි බලපෑම අල්පයි. එය Lehman Brothers ව්‍යාපාරය බිඳ වැටීමෙන් ආරම්භ වුනු 2007 ලෝක ආර්ථීක අවපාතය නියාමනය කරගත නොහැකි වීමෙන් පේනවා.

පෞද්ගලික අංශය ගත්තොත් ඉල්ලුම නියෝජනය කරමින් පාරිභෝගිකයාත්,සැපයුම නියෝජනය කරමින් පෞද්ගලික ව්‍යවසායකත්වය දැකිය හැකියි.මේ system එක මුලික මිනිස් අවශ්‍යතාවයන් විශාල ලෙස උවමනාවන් වලට ඛන්ඩනය කරමින් ව්‍යාකූල ජීවිතයක් සමාජයට දායාද කර දී තිබෙනවා.උදාහරණයකට ගතහොත් සපත්තු දෙක නමැති අවශ්‍යතාවය කොළඹ මල්වත්ත පාරේ සිට ඒ වෙනුවෙන්ම සතුන් මරා නිම කරන ලද Louis Vuitton වැනි සන්නාම දක්වා පඩිපෙලක් සේ පැතිර තිබෙනවා.පාරිභෝගිකයා මෙලෙස ව්‍යාකූල කරන ලද උවමනාවන් එකිනෙකට ඇලී ඒවා සපුරා ගනිමින් ඒ මත පැන නගින මමත්වය සමාජයට නිරූපනය කිරීමේ අරමුණින් ඒකාකාරී ජීවන චක්‍රයක ඉතා මහන්සිවී හොඳින් හෝ නරකින් මුදල් උපයමින් ජීවිතය ගත කරනවා.

සැපයුම නියෝජනය කරන පෞද්ගලික ව්‍යවසායකත්වය ඒක පුද්ගල, පුද්ගලික සහ බහුජාතික සමාගම් වශයෙන් පවතින අතර මෙයින් ලෝකයේ සැපයුමට වැඩිවශයෙන් බලපෑම් කරන මොඩලය සමාගම්ය.මෙහි අන්තර්ගතය ගත්තොත් හිමිකාරිත්වය shareholders ලටත් shareholders පත් කරන අධ්‍යක්ෂක මණ්ඩලයක්ද, අධ්‍යක්ෂක මණ්ඩලය පත්කරන විධායක නිළධාරියෙක්ගෙන් සමන්විත පාලන ක්‍රමයක්.  වක්‍රාකාරව shareholders ලා විසින් තමන්ගේ උවමනාවන් මත ව්‍යපාරය ගෙන යෑමට CEO ව පත් කරයි. shareholders ලා කියන්නෙත් සමාජය තුල ජීවත් වන පාරිභෝගිකයන් පිරිසක්. ඔවුන් අනිත් පාරිභෝගිකයන්ට වඩා මූලික අවශ්‍යතාවයන් සපුරාගෙන සිටින පිරිසක් වුවත් බොහෝ විට ඔවුන් කීර්තිය පදනම් කොටගත් (Prestige Needs) උවමනවන් පසුපස හඹා යන පිරිසක්.

මෙහිදී තමන්ට අවශ්‍ය මුදල් ප්‍රමාණය සෙවීම සඳහා සමාගමේ CEO ව Drive කිරීම සිදුවන අතර, තමන්ගේ රැකියා සුරක්ෂිතතාවය තීරණය කරන කොටස් කරුවන්ගේ අවශ්‍යතාවයන් ඉටු කිරීමට සමාගමේ CEO නොපැකිලිව බැඳී සිටිනවා. උදාහරණයක් විදියට ඖෂධ සමාගමක කොටස් කරුවන්ට අධික ලාභ ඉපයීමට අවශ්‍ය වුවහොත් රෝගීන්ට ඖෂධ මිල දැරිය නොහැකි වුවත් මිල වැඩිකිරීම් කොට අධික ලාභ උපයන අතර ප්‍රතිඵලය වන්නේ බෙහෙත් මිලදී ගත නොහැකිව රෝගී පාරිභෝගිකයා මිය යෑමයි.

සමස්තයක් වශයෙන් ගත් කල මෙම සියලු වෙළඳපොල නියෝජනය කරන ඒකක මෙලෙස අනෙකාගේ බෙලි කපා හෝ මුදල් උපයමින් තම අවශ්‍යතා සපුරාගනිමින් ඒ මත පැන නගින මමත්වය පොහොසත් කර ගනිමින්‍ යන ගමන බුදුරජාණන් වහන්සේ සහ අනෙකුත් ආගමික නායකයන් දේශනා කල ගමනට වඩා හාත්පසින්ම විරුද්ධ දෙයක්.

අපි සමස්ථ ලෝක ප්‍රජාවක් වශයෙන් මෙම ක්‍රමයන් තුල හැසිරෙමින් ඇති කරන පව් නිසා දේශගුණික විපර්යාස, වසංගත, ආර්ථීක අවපාත, ලෝක යුද්ධ වැනි විනාශයන්ට මුහුණ දෙමින් දුක් විදිනවා.

ඔබ දීර්ඝ ලෙස පසුබිම විස්තර කලා,අපට දැනගන්න පුලුවන්ද මෙහි විසඳුම මොකක්ද කියල?
මෙයට විසඳුමක් ලෙස ව්‍යවසායකයාට (shareholder) අධික ලාභයක් තමුන්ගේ පරිභෝජනයට වෙන් කර ගන්නවා වෙනුවට මේ සියලුම දේවල්වල අනිත්‍යතාවය අවබෝධ කර ගනිමින් මරණින් මතු ගෙන යා හැකි කිසිම ලෞකික දෙයක් නොමැති නමුත් කුසලයක් පමණයි කියන දේ තේරුම් ගෙන තමාගේ market value එකට සරිලන සහ සමාගමට දැරිය හැකි වැටුපක් ලබා ගනිමින් ව්‍යාපාරයෙන් උපයන ලාභ වලින් අඩුම වශයෙන් 1/3 වත් අර සම්පත් බෙදී යාමේ විශමතාවයට ලක් වුන සමාජ කොටස් නියෝජනය කරන ඔබගේ ඍජු හෝ වක්‍ර සේවක පවුල් වල ජීවන තත්වය නගා සිටුවීමට ස්ථිරසාර ලෙස යෙදවීම සහ එම කටයුතු සාක්ශාත් කරගැනීමට ඉවහල් වූ තම පාරිභෝගිකයාගේ මිලදී ගැනීමට කෘතපූර්ව වීම සහ එය ස්ථිරසාර ලෙස තම පාරිභෝගිකයා හට සන්නිවේදනය කිරීම මගින් ඔවුනට තමුන්ගේ මිලදී ගැනීම් වලින් වූ භාණ්ඩයේ හෝ සේවාවේ තෘප්තියට වඩා එහා ගිය ආත්ම තෘප්තියක් ඇති කිරීම මගින් ඔවුන් ඊලග වතාවේ මිලදී ගන්නා විට චේතනාන්විතව එම ව්‍යාපාරයේ පුණ්‍යමය කටයුත්තට සහභාගි වීම මගින් බුදු දහම අනුව සසර ගමන කෙටිකර ගැනීම සදහා කුසල් රැස් කිරීම සහ අනෙකුත් ආගමික නායකයන්ට අනුව සුගතිගාමී වීම සදහා අවශ්‍ය පින් රැස් කර ගැනීමට වෙළදපොළ ක්‍රමය තුළම තමුන්ගේ උවමනාවන් සපුරාගන්නා අතරතුරම සිදු කර ගැනීමට හැකි වීමෙන් ස්වභාදහමට අනුගත වීමට වෙළඳපොල ක්‍රමය තුලම මග පාදයි.

මෙමගින් පාරිභෝගිකයාගේන් ව්‍යාපාර සේවකයාටත්, ව්‍යාපාර සේවකයාගෙන් ව්‍යවසායකයාටත්, ව්‍යවසායකයාගෙන් පාරිභෝගිකයාටත් කුසල් කිරීමේ චක්‍රයක් ක්‍රියාත්මක වේ.මේ චක්‍රය පරම පිවිතුරු චේතනාවෙන් සිදු වන්නේ නම් එහි ප්‍රතිඵල ඉහළය. එය merit circularity හෙවත් කුසල් චක්‍රය ලෙස හැදින්විය හැකිය.

අප ව්‍යාපාරය ක්‍රියාත්මක වන්නේ මේ සංකල්පය මතයි.

මම ව්‍යාපාරයේ හිමිකරු ලෙස ආරම්භයේ සිටම මාසික වේතනයකින් ජීවත්වන අතර එය ව්‍යාපාරයේ දරන සභාපති, ප්‍රධාන විධායක නිළධාරි (CEO) සහ ප්‍රධාන මෝස්තර නිර්මාණ ශිල්පී (Head of Design) ලෙස ලබාගන්නා වැටුපයි. එම වැටුප සම්පත් බැංකුවේ ගිණුමකට බැර වෙන අතර මට හෝ ව්‍යාපාරයට විදේශයන්හී බැංකු ගණුම් හිමිකාරීත්වයක් නැත.මීට අමතරව පෞද්ගලික දේපළ ලෙස car දෙකක් හා පදිංචි නොවූ නිවසක් තියෙනවා. (මා මෙසේ මාගේ වත්කම් ප්‍රකාශ කරන්නේ පසුව මෙම ලිපියේ අඩංගු කරුණු වලට අදාළ වන බැවිනි).

අප ව්‍යාපාරයේ vision එක අන් කිසිවක් නොව බුදුරජාණන් වහන්සේ සහ අනෙකුත් ආගමික නායකයන්ගේ උත්තරීතර දැක්ම වූ “සමාජයේ මිනිසා ඇතුළු ජීවින් දුකින් මුදවා ගැනීමයි”. මුදල් සහ Brand value වර්ධනය මේම පරාර්ථාකාමි දැක්මේ ප්‍රතිඵලයක් ලෙස ලැබෙන දෙයක්.

Mission එක එම පරාර්ථකාමි අරමුණ වෙනුවෙන් අවංකභාවය පදනම් කරගෙන උත්සාහයෙන්, අධිශ්ඨානයෙන්, විනයානුකූලව ඒ සඳහා වැඩ කිරීමයි.

මෙවැනි දැක්මකට අනුගත වී මනුශ්‍ය ගුණාංග වලින් පිරිහුනු මෙම ක්‍රමය සහ සමාජය තුල මුදල් හා ලාභය මත ව්‍යාපාරයක් Drive කිරීම,හමුවන සෑම පාර්ශවයකින්ම බැට කන අතිශයින් දුෂ්කර කාර්‍යයක් වුවද හෘද සාක්ශියට එකඟව ආර්මාර්ථකාමීත්වය තෝරා ගැනීම කල නොහැකි දෙයක් නිසා අරමුණ සාක්ෂාත් කරගන්නා තෙක් මෙය අත හැරීමටත් අදහසක් නැත.

එතකොට ඔබගේ මෙම සංකල්පය ප්‍රායෝගිකව ක්‍රියාවට නංවන්නේ කොහොමද?
ව්‍යාපාරයෙන් ලැබෙන ලාභයෙන් 1/3 පමන කොටසක් අපේ වක්‍ර සේවකයන් ලෙස වැඩ කරන ඇඟලුම් සේවිකාවන් හට රුපියල් 8000/= වටිනා වියලි ආහාර සහිත බඩු මල්ලක් මාසිකව ලබා දෙනවා.අපි මේ විවිධ factory වල ඇඟලුම් සේවිකාවන්ට ලබා දෙන මාසික බඩු මල්ල සෑම සතියක් පාසා Gflock Facebook ගිණුමේ Photos සහිතව පල කරමින් එයට අපෙන් ඇදුම් මිලදී ගැනීමෙන් දායක වූ පාරිභෝගිකයන්ට ස්තූති කරනව. වෙන විදියකින් කිව්වොත් පිං දෙනවා.ඒකෙන් අපි බලාපොරොත්තු වෙන්නෙ අර කලින් කිව්වා වාගේ ඔවුන්ට ඒ පුණ්‍යකර්මයට දායක වූ තෘප්තිය ලබා දෙන අතරතුර ඔවුන් ඊළඟ අවස්තාවේ මිලදී ගන්නාවිට චේතනාන්විතව මිලදී ගැනීමෙන් පිං ඇති කර ගැනීමට සැලස්වීම.

අපි දන්නවා ඔබ ඇඳුමක් මිල දී ගත්විට පාරිභෝගිකයාට පැළයක් ලබා දෙනවා කාලයක් තිස්සේ,මේ ගැන අපිට වැඩිදුර විස්තර කිරීමක් කලොත්?
අප පරිසරය පිළිබඳ දරන සංකල්පය වන්නේ මිනිසා සහ පරිසරය අතර ඇති ලබැඳියාව ගසත් අප හා සමාන ජීවියෙකුයැයි සලකා කොලයකට හෝ හානියක් සිදු නොකල යුතුයැයි සිතන මට්ටමට එම සම්බන්ධය වැඩි දියුනු කරගනිමින් පරිසරයට සිදුවන හානිය අවම කර ගැනීමයි.2018 ලෝක පරිසර දිනයත් සමග අපගෙන් ඇදුම් මිලදී ගන්නා පාරිභෝගිකයන්ට නොමිලයේ පැලයක් ලබා දෙමින් එය ඇරබුනි.
අප අවුරුදු 4 තුල පරිසරය හා මිනිසා අතර සහ-සම්බන්ධතාවයේ යුතුකම ඉටුකරමින් ආ ගමනේ සන්නාමයක් ලෙස අපත්, පරිභෝගිකයා සහ ඔවුන්ගේ ගෙවත්තේ සිටවූ එම පැලයත් වටා එකට එතූ දම් වැලක් මෙන්,තිස් දහසකට එහා ගිය උතුම් වූ සහ-සම්බන්ධතාවයන් ගොඩනගිමින් ඉදිරියට පැමිනියෙමු.මිනිසා සහ පරිසරය නියෝජනය වන එවැනි උතුම් වූ ඇදුමකින් එහා ගිය සම්බන්ධතාවයන් ඇති කිරීම සහ එමගින් අප අනාගත පරපුරට ලබා දෙන ආදර්ශයෙන් පරිසරය තිරසාර ලෙස රැක ගැනිමට දායක වීමට හැකිවේ යැයි අපගේ විශ්වාසයයි

ඔබ කියන්නට ආපු ලංකාවේ තිබෙන ආර්ථීක ප්‍රශ්නයට ඔබ ගෙනහැර දක්වන Dollar ($) විසඳුම?
දැන් අපි ලිං පතුලට වැටිච්ච ජාතියක් , මේක ඇතුලෙ ඇනකොටාගෙන අපට යන්න තැනක් නෑ අඩි 6ක් පොළොව යටට ඇරෙන්න.
අපිට ආයෙමත් ගහ මරාගෙන ගෙවල් පොදු දේපල ගිනි තියාගෙන දැන් ඉන්න තැනිනුත් පල්ලෙහාට වැටෙන්න බෑ.සියලු දෙනාම Team එකක් විදියට එකට බැඳිලා මෙතනින් උඩට යන්න ක්‍රමයක් හොයාගන්න වෙනවා.

මම ඔයාලට යෝජනා කරන්න යන්නෙ මේ රට බේරගන්න පුළුවන් පැහැදිලි තිරසාර තනි විසඳුමක්.

අපේ විදේශගතව ඉන්න සියලු ශ්‍රී ලාංකිකයන් විශේෂයෙන්ම Expect Community එක ඔවුන්ගේ ඇඳුම් මිලදී ගැනීම්
Zaara , Mango, Myer, Uniqlo, Shein, H&M  වැනි brand වලින්. මෙම brandහි මව් රටවල් බොහෝමයක් බටහිර රටවල් සහ සංවර්ධිත ආසියතික රටවල්.

ඇමෙරිකාවෙ,කැනඩාවෙ,Australiaවෙ,Europe වල ඉන්න අපේ ශ්‍රීලාංකිකයන් වසරකට average එකක් විදියට 300$-500$ අතර ප්‍රමාණයක් ඇඳුම් වෙනුවෙන් මේ foreign brands වලට වියදම් කරනවා.

මගේ කාරුණික ඉල්ලීම ඔබගේ clothing budget එක අපේ ලංකාවේ තරුණ පරම්පරාවේ නිර්මාණශීලීත්වයෙන් ආරම්භ වූ Gflock වලින්  online order කරල ගන්න.

ඒ වෙනුවෙන් මම මෙම ව්‍යාපාරයේ හිමිකරුවා සහ ව්‍යවසායකයෙක් විදියට ව්‍යාපාරයේ කොටස් 51% 2025දී සමස්ථ ශ්‍රී ලාංකික ජනතාවට පැවරීමට සූදානම්.ඊට අමතරව මෙම අපේක්ෂිත ආදායමත් සමග මෙම මොඩලය තව දුරටත් ක්‍රියාත්මක කරමින් රට පුරා රැකියා නියුක්ත කරමින් ඔවුන්ට සරිලන වැටුපක් හා එම නියුක්තිකයන්ගේ පවුල්වලට මාසිකව සහල් සහ වියළි ආහාර ලබා දෙමින් තව දුරටත් දුකට පත් වූ ඔවුන්ව ශක්තිමත් කිරීමට හැකි වෙනවා.

මේ මගින් ඔබ නිර්මාණය කරන්නේ රටම බේරාගත හැකි ශක්තිමත් මහජන ව්‍යාපාරයක්.

මේ විසඳුම තවදුටරටත් පැහැදිලි කරනවානම්?
අපි දන්නවා fashion company ක් කියන්නේ විශාල මුදල් ආදායමක් ලබා ගත හැකි ව්‍යාපාර. අපි වගේම fast fashion කියන business model එකක් තියෙන අනිත් ව්‍යාපාර සන්නාමයක් වන Zara ගත්තොත් වාර්ෂික ආදායම ඩොලර් බිලියන 20-25 ත් අතර. H&M ගත්තොත් එවැනිම ප්‍රමාණයක්. මෙතනදී අපි අවධානය යොමු කළ යුතු business model එක වන්නේ Shein කියන Brand එක. විශේෂත්වය වන්නේ මේ Brand එකට අනිත් Brands වගේ Retail shop එකක්වත් නැතිවීමයි. සම්පූර්ණයෙන්ම ආදායම රදා පවතින්නේ Online sale එක මත. අවුරුදු 14 කට කලින් චීනයේ Nanjing වල පටන් ගෙන ඉතාමත් තරගකාරි මිළ ගණන් වලට ඇදුම් ලොව පුරා Region 220 කට අධික ප්‍රාමණයක ඇදුම් Online මාර්ගයෙන් විකුණමින් ඩොලර් බිලියන 15 කට වඩා අධික අදායමක් වාර්ෂිකව උපයනවා.

මෙහි තිබෙන තවත් විශේෂත්වයක් වන්නේ 2019 ඩොලර් බිලියන 3.15 ක වාර්ෂික අදායමක් පැවතිලා pandemic එක ආවාට පසු අවුරුදු 03ක් ඇතුළත මෙහි ආදායම ඩොලර් බිලියන 15.7 ක් දක්වා වැඩි වෙනවා.

ඉතින් හිතලා බලන්න මේකේ තියෙන potential එක, අවුරුදු 03ක් ඇතුළත වාර්ෂික ආදායම ඩොලර් බිලියන 12 කින් වැඩිකරගන්න පුළුවන්නම් ව්‍යාපාරයක් විදියට අපට ගන්න පුළුවන් ආදර්ශය තියෙන්නේ මෙතන.අපි විශ්වාස කරනවා Gflock business model එකට අවුරුදු 5-7 ත් ඇතුළත වාර්ෂික ආදායම ඩොලර් බිලියන 05ක සීමාවකට එන්න පුළුවන් කියලා. එයට අවශය විදියට scale up කර හැකි විදියටයි Gflock business මොඩලය ස්ථාපිත කර තියෙන්නේ.

ඒ වගේම shein එක්ක අපට පහසුවෙන්ම compete කරන්න පුළුවන් මොකද එයාලා follow කරන්නේ Disposable fast fashion කියන model එක. අපට එම මිලටම තත්වයෙන් උසස් නිමි ඇඳුම් ලබා දීමේ හැකියාව තියනවා. අනිත් competitive advantage එක තමයි අපේ business model එකේ තියෙන ස්වභාදහමට අනුගත වුනු කුසල් චක්‍රය අනිත් විදියකින් කිව්වොත් Merit circularity එක. ඒක මම මේ සාකච්ඡාවේ මුලින්ම ඔයාලට විස්තර කරලා දුන්නා. මේ competitive advantage දෙකත් එක්ක අපිට shein වලට වඩා දෙයක්  කළ හැකි යැයි විශ්වාස කරනවා. ඒ වගේම ඒ සදහා අවශ්‍ය විශේෂ දැනුමත් අත්දැකීමත්, අවංකභාවයත්, උත්සහයත්, අධිෂ්ඨානයත්, විනයත්, උපරිම වශයෙන් මට සහ මගේ team එකට තියෙනවා කියලා විශ්වාසයි.

ඉතින් මම නැවතත් අපේ විදේශගතව ඉන්න ශ්‍රී ලාංකිකයන්ගෙන් කාරුණිකව ඉල්ලන්නේ ඔබලාගේ මාසික clothing budget එක විනාශයේ අඩියටම වැටිලා ඉන්න ඔබේ මව් රට ගැන හිතලා ඔබේ රටේ තරුණ පරම්පරාවෙම නිර්මාණශීලී Brand එකක් වන Gflock වලින් මිළදී ගන්න.

ඒ විතරක් නෙමෙයි පුළුවන්නම් ඔබ මේ ව්‍යාපාරයේ Brand Ambassador කෙනෙක් වෙලා අපේ රට මේ දුකින් මුදවා ගැනීමේ පරමාර්ථය තව ඔබේ රටේ ඉන්න ස්වදේශිකයන් 5 දෙනුකුටවත් promote කරන්න. ඔවුන්ට අපේ ඇඳුම් Gflock.com හරහා online මිලදී ගන්න සලස්වන්න.එහෙම උනොත් අපිට හිතනවටත් වැඩිය ඉක්මනට මේ තෙල් පෝලිම් ,ගෑස් පෝලිම් , ඖෂධ හිගය ,කෑම හිගය මග හැරවල නැවතත් රට තිබුන තත්ත්වෙට ගේන්න හැකියාව තිබෙනවා. ඒසේම ඔබට සුදුසුයැයි සිතෙන අපේ industry එකේ ඇති අනිකුත් ශ්‍රී ලාංකික Fashion Brand වලින් ඇදුම් මිල දී ගන්න. මම ඔවුන්ගෙනුත් කාරුණිකව ආයාචනා කරනවා මේ දුෂ්කර කාලයේ අඩු ආදායම් ලබන සේවක හෝ සේවක නොවන පවුල් වල ජීවන තත්ත්වය නගා සිටුවීමට යම්කිසි සහනයක් ලබා දෙන ලෙස.

ඔබට අවසාන වශයෙන් කියන්න තියෙන්නෙ මොකක්ද මේ ගැන?
මම සියලු මාධ්‍යන්ගෙන්ද ඉල්ලා සිටින්නේ මෙම පණිවිඩය හැකි තරමක් අපගේ විදේශ ගතව සිටින ශ්‍රී ලාංකිකයන් වෙත ගෙන යාමට උදව් වෙන්න කියල. එය ඔබතුමන්ලාට මෙම ප්‍රයත්නය වෙනුවෙන් කරන්න පුලුවන් ලොකුම උදව්ව මෙය තව දුරටත් ලෝකයේ වෙනත් රටවලට අත නොපා අපේ ස්වෝත්සහයෙන් ශ්‍රී ලාංකිකයන් අතරින් විසඳාගතහැකි තිරසාර විසඳුමක් .මේකට ඔබ සියලුදෙනාගේ සහයෝගය ලැබුනොත් 100% ක්ම කරන්න පුලුවන් Task එකක් කියල අපට විශ්වාසයි. එහෙම රට බේරගන්න බෑ කියල කියනවනම් මම කැමතියි ඒ අභියෝගය බාරගන්න, පුළුවන්නම් ඔප්පු කරල පෙන්නන්න ඒ හැකියාව අපට නෑ කියල.

මේ විසඳුමේ වෙනස තියෙන්නෙ මේ විසඳුම මේ මොහොතේ ඉඳන් Ready විසඳුමක්. අපි දැනටමත් Dollar ආදායමක් ලබන brand එකක්.අපට දැන් ඉඳන් රට හදන්න පටන් ගන්න පුලුවන්.දැනට යෝජනා වුනු අනික් සියලු විසඳුම් Dollar එකක් හොයාගන්න level එකකට එන්නත් කාලයක් ගත වෙනවා.අපට මේ වෙලාවේ කාලය නාස්ති කර කර ඉන්න හැකියාවක් නෑ. දරුවන් දිනෙන් දින මන්දපෝෂණයට ලක් වෙනවා.මිනිසුන් අත්‍යවශ්‍ය බෙහෙත් නැතුව මිය යනවා. අපි ඉක්මන් කල යුතුයි. අපේ තරුණ පරම්පරාව අපිව මේ තත්වෙට ඇද දැමූ දේශපාලන ක්‍රමය වෙනස් කරන්න අරගල කරන ගමන් අපි Dollar සෙවීමේ අරගලය මෙසේ වහාම ආරම්භ කරමු.ඒක එකම කාසියෙ දෙපැත්ත වගේ.  

The post Gflock සභාපති ‌සමඟ සම්මුඛ සාකච්ඡාවක් appeared first on Adaderana Biz Sinhala | Sri Lanka Business News.

Source From biz.adaderana
Author: Biz Editor
#SriLanka #News #lka