‘හිල් මැකූ අයවැයක්‘

මේ අතර 2021 මුදල් වර්ෂය සඳහා වන විසර්ජන පනත් කෙටුම්පත හෙට (17) දිනයේ දී පාර්ලිමේන්තුවට ඉදිරිපත් කිරීමට මේ වන විට සියලු කටයුතු යොදා ඇත. මෙය වත්මන් රජයේ පළමු අයවැය යි. අග්‍රාමාත්‍ය මහින්ද රාජපක්ෂ මහතා මුදල් අමාත්‍යවරයා වශයෙන් අයවැය කතාව සිදුකිරීමට නියමිතය.

ආණ්ඩුවට 2021 අයවැය හදන්නට සිදුව ඇත්තේ බරපතළ ආර්ථික අර්බුද රැසක් මධ්‍යයේ වීම නොරහසකි.

පසුගිය වසර 60 ක කාලය තුළ දී ශ්‍රී ලංකාවේ ආර්ථික වර්ධන වේගය සෘණ අගයයක් ගෙන ඇත්තේ වසර 2 ක දී පමණි. ඒ 1972 දී -0.41% ක් හා 2001 වසරේ දී -1.55% ක් වශයෙනි. කෙසේ වෙතත් මෙවර තත්ත්වය ඊට වඩා බැරෑරුම් බව ඇස්තමේන්තු කළ හැක්කේ 2020 පළමු කාර්තුවේ දී පමණක් -1.6%කින් ආර්ථික කඩා වැටීම හේතුවෙනි.

මේ අනුව 2021 වසරට ආණ්ඩුවට ඇස්තමේන්තු සකස් කිරීමට සිදුව ඇත්තේ කඩා වැටුණු ආර්ථිකයක් කර මත තබා ගනිමිනි. ජාත්‍යන්තර ආයතන ඇතුළත්ව බොහෝමයක් දෙනා පුරාකථනය කරනුයේ 2020 වසරේ ශ්‍රී ලංකා ආර්ථික වර්ධන වේගය සෘණ 5 ක් ඉක්මවූ අගයයක් ගනු ඇති බවයි. එසේ වුවහොත් නිදහසෙන් පසුව ශ්‍රී ලංකා ආර්ථිකයේ සිදුවූ විශාලතම පරිහානිය වාර්තා වූ වසර ලෙසින් 2020 වසර ඉතිහාසයට එක්වීම නොවැළැක්විය හැකි වනු ඇත.

2021 මුදල් වර්ෂය සඳහා ඇස්තමේන්තුගත පුනරාවර්ථන වියදම රුපියල් බිලියන 2,690ක් වන අතර, මූලධන වියදම රුපියල් බිලියන 2,216කි. ඒ අනුව 2021 වසරේ රජයේ සමස්ත වියදම රු. බිලියන 4,906 ක් වේ.

මේ අතර 2020 වර්ෂය සඳහා වන විසර්ජන පනත් කෙටුම්පත, අග්‍රාමාත්‍ය මහින්ද රාජපක්ෂ මහතා විසින් පසුගිය සතියේ (12) දී පාර්ලිමේන්තුවට ඉදිරිපත් කරනු ලැබීය. ඊට අනුව 2020 මුදල් වර්ෂය සඳහා වන මුළු පුනරාවර්ථන වියදම රුපියල් බිලියන 2,692ක් හා මූලධන වියදම රුපියල් බිලියන 1,846ක් වශයෙන් ඇස්තමේන්තුගත කර ඇත.ඒ අනුව 2020 සමස්ත රජයේ වියදම රු. බිලියන 4,538 කි. මේ අනුව රු. බිලියන 368 කින් 2020 ට වඩා 2021 දී රාජ්‍ය වියදම ඉහළ ගොස් තිබේ. එය 8% ක ඉහළ යාමකි.

රාජ්‍ය ආදායම සැලකීමේ දී ශ්‍රී ලංකා මහ බැංකුවේ දත්ත වාර්තාවලට අනුව 2020 වසර එතරම් සුභදායක වසරක් නොවේ. පෙර වසර හා සැසඳීමේ දී 2020 වසරේ මුල් මාස 07 තුළ දී රාජ්‍ය ආදායම රු. බිලියන 1,031.9 සිට රු. බිලියන 763.2 ක් දක්වා 26%කින් පහළ ගොස් ඇත. එහි දී රජයේ ප්‍රධාන ආදායම් මාර්ගය වන බදු ආදායම් රු. බිලියන 944.4 සිට රු. බිලියන 670.4 ක් දක්වා 29%කින් පහළ යාම රජය මුහුණ පා ඇති ප්‍රධානතම අභියෝගයයි. මෙම වාතාවරණය තුළ 2021 දී තවදුරටත් බදු ආදායම කප්පාදු කර ගැනීමට රජය කටයුතු කරාවි යැයි සිතීම කිසිසේත්ම බලාපොරොත්තුව විය නොහැක්කකි.

අනෙක් අතට මධ්‍යම රජයේ සමස්ත ණය ප්‍රමාණය 2020 මුල් මාස 07 තුළ දී රු. බිලියන 13,031.5 සිට රු. බිලියන 14,261.0 ක් දක්වා 9.43%කින් ඉහළ ගොස් ඇත. 2020 විසර්ජන කෙටුම්පතේ සඳහන් ණය ගැනීමේ සීමාව රු. බිලියන 180 කින් වැඩිකිරීමට 2020 අයවැය කතාවෙන් පසුගිය සතියේ දී යෝජනා වුණේ මේ අතරවාරයේ දීය.

මේ අතර අග්‍රාමාත්‍යවරයා 2020 අයවැය කතාව කරමින් පසුගිය සතියේ දී වැඩිදුරටත් පැවසුවේ, 2014 පැවති තම රජය ජාතික ආදායමේ 5.7%කට අඩු කර තිබූ අයවැය හිඟය 2019 වසරේ දී 9.6% ක් දක්වා ඉහළ ගොස් ඇති බවයි. කෙසේ වෙතත් මෙම අගය 2020 අයවැයේදී 7.9% ක් දක්වා ගෙනඒමට හැකි වූ බව කියැවුණි.

මේ අතර ආර්ථික කටයුතු මන්දගාමී වීම මධ්‍යයේ රජයේ ආදායම් පහළ යෑම හේතුවෙන්, රාජ්‍ය ආදායම සැලකිය යුතු ලෙස අඩු වූ අතර, පසුගිය වසරේ දී නොපියවූ බිල්පත් විශාල ප්‍රමාණයක් ඉදිරියට ගෙන ඒම හේතුවෙන් රජයේ වියදම් කළමනාකරණ ප්‍රයත්න වෙත අහිතකර බලපෑමක් ඇතිවී ඇති බව ශ්‍රී ලංකා මහ බැංකුව පවසයි. මැදිකාලීනව අයවැය හිඟය අඩු කිරීම සඳහා වන රජයේ සැලසුම්, ඉදිරි කාලයේ දී සාර්ව ආර්ථික ස්ථායීතාවයෙහි සහ රාජ්‍ය ණයෙහි තිරසාරත්වය තහවුරු කිරීමෙහි ලා ඉතා තීරණාත්මක බව මහ බැංකුව වැඩිදුරටත් කියා සිටී.

– සිසිර කන්නන්ගර විසිනි

The post ‘හිල් මැකූ අයවැයක්‘ appeared first on Adaderana Biz Sinhala | Sri Lanka Business News.