සියයට 25 අධිභාර බද්ද සියයට 50 ක් කළ යුතුයි – ඇමති නිමල් සිරිපාල

රුපියල් මිලියන 2,000 ට වඩා බදු අයකළ හැකි ආදායමක් ඉපයූ සමාගම් මත එක් වරක් පමණක් අය කෙරෙන සියයට 25 ක අධිභාර බද්දක් පනවනු ලබන බව මුදල් අමාත්‍ය බැසිල් රාජපක්ෂ මහතා සිය අයවැය කතාවේ දී පසුගිය දා සඳහන් කළේය.

කෙසේ වෙතත් අද (15) දින පාර්ලිමේන්තුවේ දී අයවැය විවාදයට එක්වෙමින් මේ සම්බන්ධයෙන් අදහස් දක්වමින් කම්කරු අමාත්‍ය නිමල් සිරිපාල ද සිල්වා මහතා පැවසුවේ මෙම සියයට 25 අධිභාර බද්ද සියයට 50 ක් කළ යුතු බවයි.

“මම ඉතාම අගය කරනවා මල නොතලා රොන් ගන්නා මෙන්, බඹරෙක් කරනවා වගේ අපේ මුදල් ඇමතිතුමා මේ රටේ ප්‍රධාන, මිලියන දෙදාහට වැඩි ආදායම් ලබන සමාගම්වලින් සියයට 25ක අධිභාරයක් දැම්මා. මම කියනවා සියයට 25 ක් නෙමෙයි ඔ්ක සියයට 50 ක් කරන්න ඔ්නේ කියලා. අධිභාරයක් දාලා බිලියන 100 ක් හොයා ගත්තා. මොකද අද සමාජ ආරක්ෂණ අරමුදලක් හදන්නට වුණත් අපි කතා කරමු. බොහෝ හාම්පුතුන් ඒකට මැලිකමක් දක්වනවා සියයට එකක් දෙකක් දෙන්න. ඒ නිසා ඉදිරියේ දී මම විශ්වාස කරනවා අපේ මුදල් ඇමතිතුමා ඊළඟ අයවැයෙන් හරි තව සියයට 5 ක හරි අධිභාරයක් දාලා මේ සමාජ ආරක්ෂණ අරමුදල ශක්තිමත් කරන්න.”

2020/2021 තක්සේරු වර්ෂය සඳහා රුපියල් මිලියන 2,000 ට වඩා බදු අයකළ හැකි ආදායමක් උපයන ලද තැනැත්තන් හෝ සමාගම් මත එක් වරක් පමණක් අය කෙරෙන සියයට 25 ක අධිභාරය (Tax surcharge) බද්දක් අය කිරීමට යෝජනා කරනු ලබන මුදල් අමාත්‍ය බැසිල් රාජපක්ෂ මහතා සිය අයවැය කතාවේ දී ප්‍රකාශ කළේය. එසේම මෙම බද්ද මඟින් රුපියල් බිලියන 100 ක් පමණ උපයා ගැනීමට අපේක්ෂා කරනු ලබන බව ද මුදල් අමාත්‍යවරයා එහිදී පැවසීය.

The post සියයට 25 අධිභාර බද්ද සියයට 50 ක් කළ යුතුයි – ඇමති නිමල් සිරිපාල appeared first on Adaderana Biz Sinhala | Sri Lanka Business News.