ස්ටෑන්ඩර්ඩ් චාටර්ඩ් බැංකුව පුද්ගල ආරක්ෂණ මෙවලම් නිෂ්පාදනය සඳහා බ්‍රැන්ඩික්ස් සමාගමට මුල්‍යයන පහසුකම් සපයයි

වසංගත තත්ත්වය හමුවේ දේශීය ව්‍යාපාරවලට මුල්‍ය සහයෝගය ලබා දීම සඳහා ස්ටෑන්ඩර්ඩ් චාටර්ඩ් බැංකුව ගෝලීයව දියත් කරන ලද ඇ.ඩො. බිලියනයක මුල්‍යයන වැඩසටහන යටතේ මෑතකදී සහන ණයක් සම්පූර්ණ කළ සමාගම ලෙස බ්‍රැන්ඩික්ස් සමාගම පත් වූ බව එම බැංකුව නිවේදනය කළේය.

එම වැඩසටහන යටතේ පිරිනැමුණු ඇ.ඩො. මිලියන 12 ක අරමුදල හරහා බ්‍රැන්ඩික්ස් සමාගමේ ශ්‍රී ලංකාවේ සහ ඉන්දියාවේ කර්මාන්තශාලාවලට සිය නිෂ්පාදන ක්‍රියාවලිය පුද්ගල ආරක්ෂණ මෙවලම් (PPE) නිෂ්පාදනයට පරිවර්තනය කර ගැනීමට හැකි වේ. ඊට අමතරව බ්‍රැන්ඩික්ස් සමාගමේ පූර්ණ කාරක ප්‍රාග්ධන අවශ්‍යතා සපුරාගැනීම සඳහා එම සමාගමට ෆැක්ටරින් විසඳුමක් ලබා දීමට ද ස්ටෑන්ඩර්ඩ් චාටර්ඩ් බැංකුව කටයුතු කළේය.

අන් කවරදාටත් වඩා අපගේ පාරිභෝගිකයන් හට මුල්‍ය සහයෝගය අවශ්‍ය වී ඇති මේ මොහොතේ COVID-19 වසංගතයේ බලපෑම පරාජය කිරීම සඳහා දායක වීමට ස්ටෑන්ඩර්ඩ් චාටර්ඩ් බැංකුව ගෝලීය වශයෙන් කැප වී සිටිනවා. ගෝලීය වශයෙන් දියත් කෙරෙන වසංගතයට එරෙහි සටනට දායකත්වය ලබා දෙන අතරම මෙම අභියෝගාත්මක කාලය තුළ ව්‍යාපාරවලට අවශ්‍ය සහයෝගය ලබා දීමට ද අප කැප වනවා. බ්‍රැන්ඩික්ස් සමාගමට අප ලබා දුන් මුල්‍යයන සහයෝගය එම ප්‍රයත්නයේ තවත් එක් පියවරක්වන අතර, එක්ව අපට වඩාත් ශක්තිමත්ව නැගී සිටිය හැකි බව අපගේ විශ්වාසයයි,” යනුවෙන් මෙරට ස්ටෑන්ඩර්ඩ් චාටර්ඩ් බැංකුවේ ප්‍රධාන විධායක නිලධාරී බිඟුමාල් තෙවරතන්ත්‍රී මහතා සඳහන් කළේය.

ශ්‍රී ලාංකේය ආර්ථිකයට විදේශ විනිමය හිමිකර දීමට ප්‍රමුඛතම දායකත්වයක් ලබා දෙන ඇඟලුම් කර්මාන්තය COVID-19 වසංගතය හේතුවෙන් කැපීපෙනෙන පසුබෑමකට ලක්ව ඇත. ගෝලීය තත්ත්වය හමුවේ සාමාන්‍ය ඇණවුම් ද, රට වසා දැමීම හේතුවෙන් නිෂ්පාදන ද මෙලෙස පසුබෑමට ලක් විය.

අපගේ වෙළඳපොළ තුළ ක්‍රමයෙන් ඉල්ලුම වර්ධනය වෙමින් පවතින මොහොතක බ්‍රැන්ඩික්ස් සමාගම සිය අගනාකම්වලට ඔබින විසඳුම් අඛණ්ඩව ලබා දීමට කටයුතු කළා. ඒ අනුව, COVID-19 වසංගතයට එරෙහි සටන සඳහා පුද්ගල ආරක්ෂණ මෙවලම්වල අවශ්‍යතාව හඳුනා ගනිමින් අප අපගේ ධාරිතාව, සම්පත් සහ විශේෂඥ දැනුම එම නිෂ්පාදන නිෂ්පාදනය කිරීම සඳහා යෙදවීමට තීරණය කළා. ස්ටෑන්ඩර්ඩ් චාටර්ඩ් බැංකුව අප වෙත ලබා දුන් මෙම කාලෝචිත සහයෝගය හේතුවෙන් අපට බාධාවකින් තොරව නිෂ්පාදන ක්‍රියාවලිය පවත්වාගෙන යාමට අවශ්‍ය මුල්‍යමය ශක්තිය හිමි වුණා. වසංගත තත්ත්වය හේතුවෙන් ඇඟලුම් කර්මාන්තයට දැඩි බලපෑමක් සිදු වී ඇතත්, අපගේ මුල්‍ය හවුල්කරුවන් සමඟ එක්ව මෙම අවස්ථාවේදී නොසැලී ඉදිරියට ගමන් කිරීමට අප කටයුතු කරනවා,” යනුවෙන් බ්‍රැන්ඩික්ස් සමාගමේ ගෝලීය භාණ්ඩාගාර ප්‍රධානී ප්‍රියංක පෙරේරා මහතා අදහස් පළ කළේය.

වසංගත තත්ත්වයට එරෙහි සටනට දායකත්වය ලබා දෙන භාණ්ඩ හා සේවා නිෂ්පාදනය කරන සමාගම්වලට ලාභ අපේක්ෂාවෙන් තොරව මුල්‍ය සහයෝගය ලබා දීම සඳහා ස්ටෑන්ඩර්ඩ් චාටර්ඩ් බැංකුව ගෝලීයව මුල්‍යයන වැඩසටහනක් ක්‍රියාත්මක කළ අතර එම වැඩසටහන යටතේ සහයෝගය හිමි වූ මෙරට දෙවන ඇඟලුම් සමාගම වන්නේ බ්‍රැන්ඩික්ස් සමාගමයි. ශ්‍රී ලංකාවට අමතරව මෙම මුල්‍යයන වැඩසටහන යටතේ හොංකොං, උගන්ඩාව, බහරේන්, වියට්නාමය සහ මැලේසියාව යන රටවලට ද මුල්‍යයන සහයෝගය හිමි වී ඇත.

බ්‍රැන්ඩික්ස් සමාගම ලබා දුන් මුල්‍යයන පහසුකම පිළිබඳ අදහස් පළ කරමින් මෙරට ස්ටෑන්ඩර්ඩ් චාටර්ඩ් බැංකුවේ වාණිජ බැංකුකරණ අංශයේ ප්‍රධානී ටමානි ඩයස් මහත්මිය සඳහන් කළේ, මෙතරම් දැවැන්ත ආපදා තත්ත්වයකින් අනතුරුව ව්‍යාපාරවලට හිස එසවීමට නම් අරමුදල්වලට ඇති ප්‍රවේශය ප්‍රධාන වශයෙන් බලපාන බවය. “ස්ටෑන්ඩර්ඩ් චාටර්ඩ් බැංකුවේ දිගුකාලීන සහ නව හවුල්කරුවන් හට සහයෝගය ලබා දෙමින් වසංගත තත්ත්වයට එරෙහි සටන සඳහා දායකත්වය ලබා දීම අපගේ අරමුණයි. ගෝලීය මුල්‍යයන වැඩසටහන යටතේ මුල්‍යයන පහසුකම් පිරිනැමූ දකුණු ආසියාවේ ප්‍රථමයා අපවන අතර බ්‍රැන්ඩික්ස් සමාගමට සිය මෙහෙයුම් කටයුතු පවත්වාගෙන යාම සඳහා සහයෝගය ලබා දීමට හැකි වීම පිළිබඳ අප සතුටු වනවා.”

ශ්‍රී ලංකාව, ඉන්දියාව, බංග්ලාදේශය, හයිටි සහ කාම්බෝජය යන රටවල බ්‍රැන්ඩික්ස් සමාගමේ ඇඟලුම් කර්මාන්තශාලා ක්‍රියාත්මක වේ.

සේයා රූ සටහන: පුද්ගල ආරක්ෂණ මෙවලම් නිෂ්පාදනය කෙරෙන බ්‍රැන්ඩික්ස් කර්මාන්තශාලාවක්

The post ස්ටෑන්ඩර්ඩ් චාටර්ඩ් බැංකුව පුද්ගල ආරක්ෂණ මෙවලම් නිෂ්පාදනය සඳහා බ්‍රැන්ඩික්ස් සමාගමට මුල්‍යයන පහසුකම් සපයයි appeared first on Adaderana Biz Sinhala | Sri Lanka Business News.

Source From biz.adaderana
Author: Biz Editor
#SriLanka #News #lka