සන්නාමයේ වර්ධනයට සමගාමීව සියැට් වෙතින් ශ‍්‍රී ලංකාව තුළ නවතම අලෙවි සංකල්ප

බ‍්‍රෑන්ඞ් ෆයිනෑන්ස් ආයතනයට අනුව ශ‍්‍රී ලංකාව තුළ ශක්තිමත්ම සහ වඩාත්ම වටිනා ටයර් සන්නාමය වන සියැට් සන්නාමයේ වර්ධනයට සමගාමීව සියැට් කැළණි හෝල්ඩින්ග්ස් සමාගම විසින් ශ‍්‍රී ලංකාව තුළ නව අලෙවි සංකල්ප දෙකක් ක‍්‍රියාත්මක කිරීම ආරම්භ කර තිබේ.

සියැට් බෙදාහැරීමේ ජාලය පුළුල් කිරීමේ වසර තුනක උපාය මාර්ගයේ කොටසක් වන මෙම උපාය මාර්ගයෙන් සන්නාමයේ සුවිශේෂීත්වය සහ අග‍්‍රගන්‍යභාවය පාරිභෝගිකයින් අතරට තවදුරටත් රැගෙන යෑමට සියැට් ටයර අලෙවි කරන අලෙවිසැල් තුළ පාරිභෝගික අත්දැකීම වඩාත් දියුණු කිරීමට සැලසුම් කර තිබේ. මේ අනුව, මෙම නව අලෙවි සංකල්ප ‘Shop in Shop’ (SIS) සහ ‘Company Invested Dealer Operated’ (CIDO) යනුවෙන් නම් කර ඇත. මෙම නව අලෙවි සංකල්ප සංවර්ධනය කිරීම සඳහා සියැට් කැළණි සමාගමට සියැට් ඉන්ඩියා සමාගම විසින් මේ වනවිටත් උප මහද්වීපය තුළ දියත් කර තිබෙන CEAT ‘Shoppe’ අලෙවි සංකල්පයේ ආභාශය ලැබී තිබේ.

CEAT Shop in Shop සංකල්පය මගින් විවිධ ටයර් සන්නාම අලෙවිකරුවන්ගේ අලෙවි ස්ථානවල සියැට් සන්නාමය සඳහා වෙනමම ස්ථානයක් වෙන්කිරීම සිදුකරනු ඇත. මෙම ස්ථානයේ පොලොව, ගැනුම්කරුවන් සිටින ලොබිය සහ පිළිගැනීමේ ස්ථානය භාවිතා කරන්නන්ගේ සුවපහසුව වෙනුවෙන් සියැට් විසින් සකස් කිරීමට සැලසුම් කර තිබේ. මීට අමතරව, සමාගම විසින් මෙම ස්ථානවල අභ්‍යන්තරය සන්නාමකරණය කිරීම සඳහා අවශ්‍ය බෝඞ් සහ නව්‍ය වූ නිෂ්පාදන ප‍්‍රදර්ශනය කිරීම් සඳහා සියැට් විසින් මුදල් ආයෝජනය කරනු ඇත. මෙම ස්ථානවල සියැට් සන්නාමය ප‍්‍රදර්ශනය කිරීමට අමතරව මේ තුළින් එම වැඩසටහනට සහභාගීවන වෙළෙඳ පාර්ශවකරුවන්ට මූල්‍ය ප‍්‍රතිලාභයක් හිමිවන බවද සියැට් සඳහන් කරයි.

සියැට් සමාගම මේ වනවිටත් කොළඹ මේ ආකාරයේ ‘Shop in Shop’ (SIS) අංගන දෙකක් ආරම්භ කර තිබෙන අතර 2023 වසර අවසන් වීමට පෙර තවත් එවැනි ස්ථාන 04 ක් සම්පූර්ණ කිරීමට සැලසුම් කර තිබේ.

මේ අතර, සන්නාමය සඳහා සුවිශේෂී ඉඩකඩක් නිර්මාණය කරමින් Company Invested Dealer Operated හෙවත් CIDO අලෙවිසැල් සමාගම විසින් දිවයින පුරා ස්ථාපිත කරනු ඇත. සමාගම විසින් මෙම අලෙවිසැල් නිර්මාණය කර තිබෙන්නේ සන්නාම ප‍්‍රදර්ශනය, ගනුදෙනුකරුවන් සමග කටයුතු කිරීම සහ පාරිභෝගික අත්දැකීම වඩාත් වර්ධනය වන අයුරිනි. මෙම වැඩසටහනට අනුව සියැට් විසින් මෙම අලෙවිසැල් සඳහා සන්නාම උපකරණ, ගෘහභාණ්ඩ ලබාදීමට අමතරව ටයර් සේවා උපකරණ ඉදිරියේදී ලබාදීමට සැලසුම් කර ඇත.

මෙම නව අලෙවි සංකල්ප ක‍්‍රියාත්මක කිරීම පිළිබඳව සියැට් කැළණි සමාගමේ කළමනාකරණ අධ්‍යක්ෂ රවී ඩඞ්ලානි මහතා මෙසේ අදහස් දැක්වීය. ‘සියැට් ශ‍්‍රී ලංකාවේ ප‍්‍රමුඛතම ටයර් සන්නාමය වීම අපගේ නිෂ්පාදන කටයුතු පුළුල් කිරීමට පසුගිය වසර කිහිපය සිදු කරන ලද ආයෝජන හේතුවී තිබෙනවා. මෙම ආයෝජන මගින් ටයර් නිෂ්පාදනය ධරිතාව මෙන්ම අපි නිෂ්පාදනය කරන ටයර් මාලාව සහ නිෂ්පාදනවල ගුණාත්මකභාවය වර්ධනය කිරීමට අවශ්‍ය තාක්ෂණය හඳුන්වා දෙනු ලැබුවා. දැන් සන්නාමයේ ඉදිරි වර්ධනය සඳහා සන්නාමය ප‍්‍රදර්ශනය කිරීමත් පාරිභෝගිකයින්ගේ අත්දැකීම වර්ධනය කිරීමත් වැදගත් වෙනවා. මෙම SIS සහ CIDO නව අලෙවි සංකල්ප ක‍්‍රියාත්මක කරන්නේ එම අපේක්ෂාවන් ජයගැනීම සඳහායි.’

ශ‍්‍රී ලංකාවේ වායුමය ටයර් අවශ්‍යතාවයෙන් අඩක් නිෂ්පාදනය කරන සියැට් කැළණි සමාගම මෙරට නිෂ්පාදන අංශය තුළ ඉතාමත් සාර්ථක ඉන්දියා – ශ‍්‍රී ලංකා ඒකාබද්ධ ව්‍යාපෘතියක් ලෙසින් සැලකේ. මේ දක්වා මෙම ඒකාබද්ධ ව්‍යාපාරය විසින් සමස්තයක් ලෙස රුපියල් බිලියන 08 කට වැඩි මුදලක් ආයෝජනය කර තිබෙන අතර නිෂ්පාදන ධාරිතාවය, තාක්ෂණය දියුණු කිරීම සහ නව නිෂ්පාදන සංවර්ධනය සඳහා තවත් රුපියල් බිලියන 3.2 ක මුදලක් 2022 වසරේදී ආයෝජනය කිරීමට එකඟවී තිබේ. සමාගම විසින් මගී මෝටර් රථ, වෑන්, SUV වාහන, වාණිජ (බයස්-ප්ලයි සහ රේඩියල්) යතුරු පැදි, ත‍්‍රි රෝද රථ සහ කෘෂි කාර්මික වාහන සඳහා ටයර් මෙරට නිෂ්පාදනය කරයි.

සියැට් සන්නාමය මේ වනවිටත් මෙරට රේඩියල් ටයර් වෙළෙඳ පොළින් 48% ක කොටසක්ද, ට‍්‍රක් රථ ටයර් වෙළෙඳ පොළින් 80% ක කොටසක්ද, සැහැල්ලූ ට‍්‍රක්රථ ටයර් වෙළඳ පොළින් 84% ක කොටසක්ද, ති‍්‍රි රෝද රථ ටයර් වෙළෙඳ පොළින් 51% ක කොටසක්ද, යතුරු පැදි ටයර් වෙළෙඳ පොළින් 36% ක කොටසක්ද, කෘෂිකාර්මික ටයර් වෙළෙඳ පොළින් 72% ක කොටසක්ද අත්පත් කර ගැනීමට සමත්ව ඇත. සියැට් ශ‍්‍රී ලංකා විසින් නිෂ්පාදනය කරන ටයර් වලින් 20% පමණ දකුණු ආසියාවේ, මැදපෙරදිග, අපි‍්‍රකාවේ සහ අග්නිදිග ආසියාවේ රටවල් 16 ක් වෙත මේ වනවිට අපනයනය කරයි.

The post සන්නාමයේ වර්ධනයට සමගාමීව සියැට් වෙතින් ශ‍්‍රී ලංකාව තුළ නවතම අලෙවි සංකල්ප appeared first on Adaderana Biz Sinhala | Sri Lanka Business News.

Source From biz.adaderana
Author: Bizweb2 Bizweb2
#SriLanka #News #lka