ශ්‍රී ලාංකික මුල්‍ය සේවා ක්ෂේත්‍රයෙහි වැදගත් සංධිස්ථානයක් සනිටුහන් කරමින් AMF සහ Arpico Finance මූල්‍ය සමාගම් ඒකාබද්ධ වෙයි

ඒකාබද්ධවීමෙන් පසු AMF නාමය යටතේ ව්‍යාපාර මෙහෙයුම් පවත්වාගෙන යයි

මෙරට මූල්‍ය සේවා ක්ෂේත්‍රයේ පැරණිතම සමාගම් දෙකක් වන ඇසෝසියේටඩ් මෝටර් ෆිනෑන්ස් පී.එල්.සී සමාගම (Associated Motor Finance Company PLC – AMF) සහ ආර්පිකෝ ෆිනෑන්ස් පී.එල්.සී සමාගම (Arpico Finance PLC – AFC) කොළඹ කොටස් හුවමාරුවේදී 2021 අප්‍රේල් 01 වැනි දින නිල වශයෙන් ඒකාබද්ධ විය. දීර්ඝ කාලීන උත්සාහයක ප්‍රතිඵලයක් වශයෙන් සිදුවූ මෙම ඒකාබද්ධ වීම සියලුම නීති රෙගුලාසීන්ට අනුකූලව සිදුකර තිබේ. ඒකාබද්ධවූ සමාගම් ද්විත්වය මින් ඉදිරියට AMF නාමය යටතේ සිය අත්දැකීම් හා පළපුරුද්ද උපයෝගී කරගනිමින් ව්‍යාපාර මෙහෙයුම් පවත්වාගෙන යාමට නියමිත අතර, ශ්‍රී ලංකාවේ මුල්‍ය සේවා ක්ෂේත්‍රයෙහි ප්‍රමුඛතම නාමයක් බවට ඉක්මනින්ම පත්වෙනු ඇත.

මෙම සුවිශේෂී අවස්ථාව පිළිබඳව අදහස් දක්වමින් AMF සමාගමේ අධ්‍යක්ෂක/ප්‍රධාන විධායක නිලධාරී, ටී.එම්.ඒ. සලේ මහතා මෙසේ පවසා සිටී. මේ අවස්ථාව අපගේ සමාගමට ඉතාමත් වැදගත් සංධිස්ථානයක් බව මුලින්ම කියන්න කැමතියි. අත්දැකීම් බහුල පළපුරුදු මුල්‍ය සේවා සමාගම් දෙකක හැකියාවන්, ශක්තීන් ඒකාබද්ධවීම හරහා අනාගත මුල්‍ය සේවා ක්ෂේත්‍රයට ලබා දිය හැකි දායකත්වයන් බොහෝමයි. මෙය සැබැවින්ම නව පරිච්ඡේදයක ආරම්භය වනවා මෙන්ම සමාගම් දෙකෙහිම පාර්ශවකරුවන්ට වැදගත් ප්‍රතිලාභ හිමිවන ගමනක ආරම්භය වන බවත් කියන්න කැමතියි. මෙතැන් සිට එක් කණ්ඩායමක් වශයෙන් එකම හැඟීමකින් කටයුතු කරමින් පාරිභෝගිකයා අංක එකෙහි තබා සලකන පාරිභෝගික සේවාවක්, විශිෂ්ට මුල්‍ය සේවා හා නිපැයුම් පෙළක් ඔස්සේ ලබාදෙන්නට අපි සූදානමින් සිටිනවා

AMF සහ Arpico Finance සමාගම් ශ්‍රී ලංකාවේ පැරණිතම මුල්‍ය සමාගම් දෙකක් වන අතර, එක් එක් සමාගම සතු හැකියාවන් එකතුව, පළපුරුද්ද හා වෘත්තීයභාවය වැනි ප්‍රවීණත්වයන් නව සමාගම වෙත එකතු කර ඇත. “මේ ඒකාබද්ධකරණයත් සමග තරගකාරීත්වයෙහි උපරිම මට්ටමේ රැඳී සිටිමින් ශ්‍රී ලංකාවේ මුල්‍ය ක්ෂේත්‍රය තුළ පුළුල් මුල්‍ය නිපැයුම් හා සේවා ප්‍රමාණයක් ලබා දෙමින් පුළුල් පරාසයක පැතිරුණු පාරිභෝගික පදනමක් ගොඩනගා ගන්නට අවශ්‍ය ශක්තිය AMF වෙත හිමිවෙනවා.” යැයි තවදුරටත් අදහස් දක්වමින් AMF සමාගමේ අධ්‍යක්ෂක/ප්‍රධාන විධායක නිලධාරී, ටී.එම්.ඒ. සලේ මහතා පවසා සිටියේය.

වර්ෂ 1951 දී ස්ථාපිත ආර්පිකෝ ෆිනෑන්ස් පීඑල්සී සමාගම, දශක හතකට ආසන්න කාලයක් මෙරට ශත්කිමත් මූල්‍ය සමාගමක් ලෙසින් පැවතුනකි. මෙම සමාගම ශාඛා 10ක් ඔස්සේ ක්‍රියාත්මක වන අතර සිය ප්‍රධාන ව්‍යාපාර සේවාවන් අතර මූල්‍ය කල්බදු, ස්ථාවර තැන්පතු, පුද්ගලික ණය සහ ඉතුරුම් තැන්පතු ආදිය ඇතුළත් වේ. ඇසෝසියේටඩ් මෝටර් ෆිනෑන්ස් කම්පනි පීඑල්සී 1962 වසරේදී ආරම්භ කරන ලද අතර යතුරුපැදි සඳහා ලීසිං පහසුකම් සැපයීමෙහි ප්‍රවීණයෙකි. නව AMF සමාගම ආර්පිකෝ ෆිනෑන්ස් සමාගමේ පළපුරුද්ද සහ ශාඛා 12 කින් සමන්විත ජාලය හරහා ඉදිරියේදී ත්‍රී රෝද රථ හා මෝටර් රථ මිලදී ගැනීම් සඳහා ද ලීසිං පහසුකම් ලබා දීම කටයුතු කරනු ඇත. සෑම පාර්ශවකරුවෙකු වෙතම වැඩි අගයක් හිමිකර දෙමින් වඩාත් ඵලදායීව මෙහෙයුම් යටිතල පහසුකම් පරිපාලනය කිරීම ඔස්සේ වැඩි වටිනාකමක් සහතික කරගැනීමට ඒකාබද්ධකරණය හරහා සමාගමට හැකියාව ලැබී තිබේ.

AMF සමාගම මෑතකාලයේදී වඩාත් දියුණු තොරතුරු තාක්ෂණ පද්ධතියක් ස්ථාපනය කරමින් සිය ක්ෂේත්‍ර බලකායේ කාර්යක්ෂමතාවය ඉහළ නැංවීමට කටයුතු කර ඇත. Fin-tech සමාගම් හා තාක්ෂණයන් සමග සම්බන්ධ වෙමින් පාරිභෝගිකයාගේ පහසුව තවදුරටත් ඉහළ නංවන්නට සමාගම සෑම විටම උත්සාහ කරයි. ව්‍යාපාර ඒකාබද්ධකරණයත් සමග තවදුරටත් සිය හැකියාවන් සවිබලගන්වා ගත් ්ඵත්‍ සමාගම ශ්‍රී ලංකාවේ මුල්‍ය සේවා ක්ෂේත්‍රයෙහි පෙරළිකාරී නව ගමනකට සූදානමින් සිටී.

දේශීය මුල්‍ය සේවා ක්ෂේත්‍රයෙහි දැවැන්ත සවිබලගැන්වීමකට මෙම ඒකාබද්ධකරණය දායක වන අතර ගෝලීය අර්බුදයක් සමස්තයක් ලෙස පවතින කාලයකදී මෙවැනි ක්‍රමෝපායික මුලපිරීම් මගින් ලැබෙන දායකත්වය විශාලය. මේ සමගම විනිවිදභාවය හා වගවීම පිළිබඳ නව ප්‍රමිති මට්ටමක් නිර්මාණය වනු ඇති අතර, වෙළෙඳපොල තුළට ස්ථාවරභාවයක් සහතික කරමින් ආයෝජකයින්ට අනාගත ආයෝජන අවස්ථා කෙරෙහි බලාපොරොත්තු තබාගැනීමේ හැකියාව ලබා දෙයි.

The post ශ්‍රී ලාංකික මුල්‍ය සේවා ක්ෂේත්‍රයෙහි වැදගත් සංධිස්ථානයක් සනිටුහන් කරමින් AMF සහ Arpico Finance මූල්‍ය සමාගම් ඒකාබද්ධ වෙයි appeared first on Adaderana Biz Sinhala | Sri Lanka Business News.

Source From biz.adaderana
Author: Biz Editor
#SriLanka #News #lka