ලාෆ්ස් ගෑස් සමාගමෙන් නිවේදනයක්

ලාෆ්ස් ගෑස් සමාගම එල් පී ගෑස් සිලින්ඩර පාරිභෝගිකයා හට කඩිනමින් ලබාදීම සඳහා තම බෙදාහැරීමේ මෙහෙයුම් කටයුතු පුළුල් කරයි

පසුගිය කාල වකවානුව පුරාම මෙරට මුහුණ දී තිබෙන විදේශ විනිමය හිඟය හේතුවෙන් දේශීය ගෘහස්ත, කර්මාන්ත සහ වාණිජ කටයුතු සඳහා එල් පී ගෑස් ආනයනය කිරීමේ අභියෝගයන් පැවති අතර මාස කීපයක් පුරා මෙරටට ඉල්ලුමට සරිලන එල් පී ගෑස් සැපයුමක් ලබාදීමට ලාෆ්ස් ගෑස් සමාගම විශාල අභියෝගයන්ට මුහුණ දෙනු ලැබීය. නමුත් රජය සහ වාණිජ බැංකු සමග දිගින් දිගටම පැවැත්වූ සාකච්චා හමුවේ මෙරටට එල් පී ගෑස් ආනයනය කිරීමට අවශ්‍ය ණයවර ලිපි විවර කරගැනීමට ලාෆ්ස් ගෑස් සමාගම සමත්විය. මෙලෙස මෙරටට ආනයන කල එල් පී ගෑස් මේ වනවිට ලාෆ්ස් ගෑස් පිරවුම් පර්යන්තයන්හි පිරවීමේ ක්‍රියාවලියට ලක් වෙමින් පවතින අතර එලෙස පිරවූ එල් පී ගෑස් සිලින්ඩර විශාල වශයෙන් දෛනිකව ගෘහස්ත වෙළෙදපොල වෙත බෙදාහැරීම් නියෝජිත වරුන් හරහා මෙන්ම අලෙවි නියෝජිත වරුන් හරහා නිකුත් කරමින් සිටී.

මාස කීපයක් පුරා මෙරටට එල් පී ගෑස් ආනයනය කිරීම සඳහා වන ණයවර ලිපි විවර කරගැනීමට නොහැකි වීම හේතුවෙන් මෙරට එල් පී ගෑස් ඉල්ලුම සපුරාලීම ලාෆ්ස් ගෑස් සමාගමට අභියෝගාත්මක වී තිබු අතර එලෙස ආනයන කල පළමු ගෑස් තොග වලින් බහුතරයක් මෙරට පීඩාවට පත්ව සිටින ගෘහස්ත පාරිභෝගික ජනතාව වෙත ලබාදීමට සමාගම තීරණය කොට කටයුතු සලසා තිබේ. විශේෂයෙන්ම නාගරික ගෘහස්ත පාරිභෝගික ප්‍රජාව මුහුණ දෙන අපහසුතාවයන් තේරුම් ගෙන පාරිභෝගිකයා වෙත සිලින්ඩර ලබාදීමට සහ මෙවැනි අවස්ථාවක ඇතිවන නීතිවිරෝධී කළුකඩ මිල අයකිරීම් මැඩලීම සඳහා ඍජුවම සමාගම විසින්ම සිලින්ඩර ලබාදීමට ලාෆ්ස් ගෑස් සමාගම අවශ්‍ය කටයුතු සම්පාදනය කර තිබේ. මෙහිදී අදාළ ප්‍රදේශයන්හි පොලිස් ස්ථාන විශාල සහයක් සමාගම සහ නිලධාරීන් වෙත ලබාදෙන බව සමාගම ප්‍රකාශ කර සිටි.

දිවයින පුරා පාරිභෝගිකයන් වෙත ඍජුවම ගෑස් සිලින්ඩර බෙදාහැරීම සිදුකරන අතරම මේ වනවිට බෙදාහැරීම් නියෝජිතවරුන් සහ අලෙවි නියෝජිතවරුන් හරහා සිලින්ඩර බෙදාහැරීමද ලාෆ්ස් ගෑස් සමාගම විසින් අරඹා ඇත. සමාගම විසින් ඍජුවම බෙදාහැරීම් සිදුකිරීමේදී ජනඝනත්වය අනුව වැඩි වශයෙන් නගර සහ නගරාසන්න ප්‍රදේශ සඳහා ප්‍රමුඛතාවය ලබාදෙන අතර දිවයින පුරා විසිරි සිටින අප විකුණුම් කළමනාකරුවන් අදාළ පළාත් පාලන ආයතන සහ පොලිස් දෙපාර්තමේන්තුව සමග එක්ව විනිවිදභාවයකින් යුතුව සිලින්ඩර බෙදාහැරීමේ කටයුතු වල යෙදී සිටී.

කෙසේ නමුත් කූට ව්‍යාපාරික ජාලයක් ලාෆ්ස් ගෑස් සිලින්ඩර ප්‍රකාශයට පත් කර ඇති උපරිම සිල්ලර මිලට වඩා වැඩි මිලට අලෙවි කරමින් පාරිභෝගිකයා පීඩාවට ලක් කරමින් අනිසි ලාභ උපයන බව වාර්තා වන අතර එවැනි තොරතුරු 1345 ලාෆ්ස් ගෑස් පාරිභෝගික සේවා අංශය අමතා දැනුවත් කරන ලෙස ලාෆ්ස් ගෑස් සමාගම දන්වා සිටි. මේ වන විටත් එල් පී ගෑස් මිලදී ගැනීමට දිගු පෝලිම් නිර්මාණය වී තිබුනද හැකි ඉක්මනින් මෙරට පාරිභෝගිකයන් හට අවශ්‍ය ගෑස් සිලින්ඩර පාරිභෝගිකට වෙත ඉතා ඉක්මනින් ලබාදීමට ලාෆ්ස් ගෑස් සමාගම කඩිනමින් කටයුතු සුදානම් කරමින් සිටී.

(මෙය ලාෆ්ස් ගෑස් පීඑල්සී විසින් නිකුත් කරන ලද මාධ්‍ය නිවේදනයකි.)

The post ලාෆ්ස් ගෑස් සමාගමෙන් නිවේදනයක් appeared first on Adaderana Biz Sinhala | Sri Lanka Business News.