රටට විදේශ විනිමය ඉතිරි කරන දේශීය පාවහන් සහ සම්භාණ්ඩ කර්මාන්තය

රටක විදේශ විනිමය ඉපැයීම මෙන්ම, විදේශ විනිමය ඉතිරි කිරිම ද වැදගත් කාර්යයකි. අපේ රටේ එවැනි කර්මාන්ත අතර ඉතා වැදගත් තැනක් ගන්නේ පාවහන් සහ සම්භාණ්ඩ කර්මාන්තයයි. මේ දේශීය කර්මාන්තය නොවන්නට අද අපට පළඳින්නට වන්නේ ආනයනික පාවහන්ය. ඒ සඳහා විශාල විදේශ විනිමයක් වැයවේ. අපේ ජනතාවගෙන් 90% ක් ම භාවිත කරන්නේ අපේ රටේ නිෂ්පාදනය වන පාවහන් සහ සම්භාණ්ඩය. මේ වන විට අපේ රටේ පාවහන් නොපලඳින කෙනෙක් නැති තරම්ය. රබර් සෙරෙප්පු යන නමින් හදුන්වන පාවහන් සෑම නිවසකම ලොකු  කුඩා සෑම කෙනෙක්ම පළඳිති.  මේ වන විට පාවහන් මිල ඉතා අධික ලෙස ඉහළ ගොස් ඇත. මෙයට හේතුව වනුයේ  විදේශ වෙළදපොළේ අමුද්‍රව්‍ය, උපාංග, යන්ත්‍රෝපකරණ මිල ඉහළ යෑම සහ රටේ පවතින ඩොලර් ගැටලුවයි .

පාවහන් සහ සම්භාණ්ඩ ක්ෂේත්‍රය ශ්‍රී ලංකාවේ අපනයන ආදායම ප්‍රවර්ධන කිරීමෙහිලා දායක විය හැකි අගය එකතු කළ නිෂ්පාදන ක්ෂේත්‍රයක් ලෙස  හඳුනාගෙන ඇත. 90 දශකයේ ශ්‍රී ලංකාව යුරෝපයට පාවහන් අපනයනය කරන රටක් විය. චීනය ලෝක වෙළඳපොළට පිවිසීමත් සමග ඇතිවූ තරගකාරි තත්වය නිසා අනෙකුත් සමහර රටවලට මෙන්ම අපේ රටටද යම් පසුබෑමකට ලක්වන්නට සිදුවිය. නමුත් නැවතත්  පසුගිය කාලය තුළ මෙම කර්මාන්තය ක්‍රමානුකූලව මෙන්ම  හා සාර්ථකව ලබාගත් වර්ධනයත් සමඟම වර්තමානයේදී තත්වයෙන් උසස් පාවහන් සහ සම්භාණ්ඩ  නිපදවීමේ අභිමානය ශ්‍රී ලංකාව අත්කරගෙන සිටී

ශ්‍රී ලංකාවේ පාවහන් සහ සම්භාණ්ඩ කර්මාන්තයේ මේ වන විට සෘජු සහ වක්‍ර වශයෙන් 300,000 ක පමණ පිරිසක් යෙදී සිටිති. මේ අතර පාවහන් කර්මාන්තයේ මහා පරිමාණ සමාගම් 10 ක්, මධ්‍ය පරිමාණ සමාගම් 30 ක් සහ සුළු පරිමාණ නිෂ්පාදකයන් 3000ක් පමණ  සිටිති. අද වන විට දිවයිනේ කාන්තා පාවහන්, කැන්වස් සපත්තු, බූට්ස්, ක්‍රීඩා පාවහන්,  ආරක්ෂක පාවහන්, පාසැල් පාවහන්, රබර් සෙරෙප්පු  ආදී විවිධ පරාසයක පවතින නවීන පාවහන් විවිධ අමුද්‍රව්‍යයන් යොදා ගනිමින් නිෂ්පාදනය කරනු ලැබේ. රටේ පාවහන් අවශ්‍යතාවය යුගල මිලියන 60ක් පමණ වේ. රබර් සෙරෙප්පු  මිලියන 25ක් පමණ නිෂ්පාදනය වන අතර මෙම කර්මාන්තයේ සමස්ත වටිනාකම රු.බිලියන 60ක් පමණ වේ. අද වන විට දේශිය නිෂ්පාදකයන් මෙම කොටසෙන් 60% ක් පමණ නිෂ්පාදනය කරන අතර ඉතිරි 40% ආවසරික සහ අනවසරික ආනයනික පාවහන්වේ.

අද දිවයිනේ පාසැල් පාවහන්වල අවශ්‍යතාවය යුගල මිලියන 4.5 ක් වන අතර එය සම්පුර්ණයෙන්ම සැපයීමට දේශීය කර්මාන්තකරුවන් සමත්වී තිබේ. ඒ මගින් මේ වන විට ශ්‍රී ලංකාවේ පාවහන් පළදින්නන්ගේ සංඛ්‍යාව වර්ධනය කිරීමට රබර් සෙරෙප්පුවලට හැකිවී තිබෙන අතර මෙම රබර් සෙරෙප්පු ඔස්ට්‍රේලියාව සහ යුරෝපීය රටවලට අපනයනය කිරීමද සිදුකරයි. මෙයට අමතරව පාවහන් නිෂ්පාදනයට අවශ්‍ය අමතර කොටස් වන පාවහන් අඩි, නිමකරන ලද ස්වභාවික සම්, රෙක්ෂීන් හා යන්ත්‍රෝපකරණ  නිෂ්පාදන කර්මාන්තශාලා රැසක් දිවයින තුළ ක්‍රියාත්මකව පවතී.

පාවහන් සහ සම්භාණ්ඩ කර්මාන්තය, අපනයන  ආදායම සඳහා වන දායකත්වය වැඩිකරගත හැකි ක්ෂේත්‍රයක් ලෙස හඳුනාගැනීමෙන් අනතුරුව රජය විසින් මෙම කර්මාන්තයේ ප්‍රවර්ධනය සඳහා විවිධ සහනයන් ලබා දෙන ලදී. දේශීය කර්මාන්තකරුවන් ආරක්ෂාකරගැනීම සඳහා ආනයනික පාවහන්වලට සෙස් බදු පනවන ලදි. තවද රටේ නිෂ්පාදනය වන සම්, මෙම කර්මාන්තය සදහා ප්‍රමාණවත් නොවන බැවින් රජය විසින් සම් ආනයනය සඳහා  බදු සහනයක් ලබා දෙන ලදී. අද වනවිට දේශිය වෙළඳපොළ පාවහන්වලින් සංතෘප්තභාවයට පත්වෙමින් පවතින බැවින් කර්මාන්තයේ තිරසාර පැවැත්ම සඳහා අපනයන වෙළඳපොළට පිවිසීම අත්‍යවශ්‍ය කරුණක් බවට පත්වි තිබේ .

සම් සහ සම්භාණ්ඩ

මේ වන විට දිවයිනේ සම් නිෂ්පාදන කර්මාන්ත ශාලා  6ක් පමණ තිබෙන අතර ඒවායින්  මසකට සම් වර්ගඅඩි 500,000ක් පමණ නිෂ්පාදනය කෙරේ. මීට අමතරව සම් නිෂ්පාදන ලෙස බෑග්, කුඩා සම්භාණ්ඩ අත්වැසුම්, වොලට්, සම්පටි ආදිය නිෂ්පාදනය කෙරේ. මේවා බොහොමයක් සංචාරක කර්මාන්තය අරමුණු කොට නිෂ්පාදනය කෙරෙන ඒවාය.

මීට අමතරව  සුළු පරිමාණයේ කර්මාන්තශාලා 1000ක් පමණ  තිබේ.  සම් නිෂ්පාදන කර්මාන්තශාලා   බොහොමයක් නාගරික පරිසරවල පිහිටා තිබුණ අතර පාරිසරික නීති රීති හමුවේ ඒවා වසා දැමිමට සිදුවිය. මෙයට විසදුමක් ලෙස සියලු කර්මාන්තශාලා හම්බන්තොට දිස්ත්‍රික්කයේ බටඅත්ත ප්‍රදේශයේ ස්ථාපිත කිරීම සඳහා විශාල මුදලක් වැය කොට ව්‍යාපෘතියක් දියත්කළ ද නොයෙක් බාහිර හේතු මත එය අසාර්ථක විය.  මෙයට ස්ථිරසාර විසුම් සෙවිමට  මේ දිනවල කර්මාන්ත අමාත්‍යංශය දැඩි ප්‍රයත්නයක් දරමින් සිටියි. මේ වන විට කර්මාන්ත ශාලාවලට අදාළව වෙන වෙනම පරිසර දුෂණය වැළැක්විමේ ක්‍රමවේදයන් ස්ථාපිත කිරීමට දැනට සලකා බලනු ලැබේ‍.

ජී.එස්.පී බදු සහනය

2016 වර්ෂයේදී ශ්‍රී ලංකාවට ලැබුණු ජි.එස්.පී. බදු සහනය නිසා අපේ නිෂ්පාදන සඳහා යුරෝපීය වෙළඳපොළට ඇතුළුවීමට අවස්ථාව ලැබී තිබේ. මීට අමතරව ඇමරිකා එක්සත් ජනපදය ද සම්භාණ්ඩ අපනයනය සඳහා තීරු බදුසහන ලබා දී තිබේ.

1998 දී රජය විසින් ස්ථාපනය කරන ලද ලංකා කාර්මික සංවර්ධන මණ්ඩලය මෙම කර්මාන්තය ගෘහස්ථ කර්මාන්තයක් ලෙස ගමට රැගෙන යෑමෙහිලා පුරෝගාමී වූ අතර  දිවයින පුරා  පාවහන් සහ සම්භාණ්ඩ නිෂ්පාදනය පුහුණු කිරීමේ මධ්‍යස්ථාන ආරම්භ කරන ලදී. පාවහන් නිෂ්පාදනය  පුහුණු කිරිමේ මධ්‍යස්ථානයක් ශ්‍රී ලංකා ඇඟලුම් ආයතනයේ ස්ථාපිත කිරීමද මෙම කර්මාන්තයට විශාල රුකුලක් විය. මෙම කර්මාන්තය අපනයන සඳහා  ශක්‍යතාවයක් ඇති කර්මාන්තයක් ලෙස හඳුනා ගත් ශ්‍රී ලංකා අපනයන සංවර්ධන මණ්ඩලය,  අපනයනය ඉලක්ක කර එම කර්මාන්තය ප්‍රවර්ධනය සඳහා විවිධ වූ අලෙවි/ නිෂ්පාදන සහ තාක්ෂණික  සංවර්ධන වැඩසටහන් රැසක් සංවිධානය කරන ලදී.

ශ්‍රී ලංකාවේ ප්‍රථම පාවහන් සහ සම්භාණ්ඩ ප්‍රදර්ශනය  

ශ්‍රී ලංකා අපනයන සංවර්ධන මණ්ඩලය, කර්මාන්ත සහ වාණිජ අමාත්‍යාංශය, ලංකා කාර්මික සංවර්ධන මණ්ඩලය,  පාවහන් සහ සම්භාණ්ඩ නිෂ්පාදකයන්ගේ සංගමය හා එක්ව ප්‍රථම වරට  2007 වර්ෂයේදී ශ්‍රී ලංකාවේ පළමුවන පාවහන් සහ සම්භාණ්ඩ ප්‍රදර්ශනය සංවිධානය කරන ලදී. මෙම ප්‍රදර්ශනයේ අරමුණු අතර පාවහන් සහ සම්භාණ්ඩවලට දේශීය සහ අන්තර්ජාතික වශයෙන් පිළිගැනීමක් ලබාදීම, අන්තර්ජාතික ගැනුම්කරුවන් අතර          ශ්‍රී ලාංකීය අපනයන හැකියාවන් ප්‍රවර්ධනය කිරීම, සුළු හා මධ්‍ය පරිමාණ ව්‍යවසායකයින්ගේ දක්ෂතාවයන් සහ හැකියාවන් එළිදැක්වීම මෙන්ම  අපනයන ශක්‍යතාවයෙන් යුත් නිෂ්පාදකයින් සඳහා අපනයන අවස්ථාවන් උදාකර දීම, සුළු හා මධ්‍ය පරිමාණ ව්‍යවසායකයන්ගේ තාක්ෂණික හැකියාවන් වර්ධනය කර ගැනීමට සහ අන්තර්ජාතික වෙළඳපොළ සඳහා අගය එකතු කළ නිෂ්පාදනයන් නිපදවීමට දිරිමත් කිරීමද වේ.

2007 වසරේ ප්‍රදර්ශන කුටි 122ක සහභාගීත්වයකින් ආරම්භ වූ  මෙම ප්‍රදර්ශනය, 2020 වනවිට එම සංඛ්‍යාව 230 දක්වා වර්ධනය කර ගැනීමට සමත්වී ඇත. මෙහිදී දේශීය ප්‍රදර්ශකයින්ට අමතරව විදේශිය අමුද්‍රව්‍ය, යන්ත්‍රෝපකරණ, උපාංග සැපයුම්කරුවන් ඔවුන්ගේ නිෂ්පාදන මෙහිදී ප්‍රදර්ශනය කරන ලදී. රටවල් විශාල ප්‍රමාණයකින් විදේශිය ගැනුම්කරුවන් හා ඔවුන්ගේ නියෝජිතයන් මෙම ප්‍රදර්ශනය නැරඹීමට පැමිණියහ.  ප්‍රදර්ශනය හා සමගාමීව මෝස්තර නිර්මාණ තරගයක්, හොඳම වෙළඳ කුටිය තේරීමේ තරගයක් සහ විශේෂිත වූ විලාසිතා දැක්මක් සංවිධානය කරන ලදී.   මේ වන විට මෙම ප්‍රදර්ශනය අන්තර්ජාතික ප්‍රදර්ශන කාලසටහනෙහි පවා සටහන්වි ඇත.

පසුගිය කොවිඩ් වසංගතය නිසා වසර දෙකක් පුරා පැවැත්වීමට නොහැකිවූ මෙම ප්‍රදර්ශනය, මෙවර 2023 පෙබරවාරි මස 3 වෙනි දින සිට 5 වෙනි දින දක්වා කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේදී පැවැත්විමට සියලු කටයුතු සංවිධානය කර ඇත.

මෙම ක්ෂේත්‍රය නියෝජනනය කරන එකම සංගමය වන පාවහන් සහ සම්භාණ්ඩ නිෂ්පාදකයන්ගේ සංගමය, කර්මාන්ත අමාත්‍යංශයේ ලංකා කාර්මික සංවර්ධන මණ්ඩලය සහ ශ්‍රී ලංකා අපනයන සංවර්ධන මණ්ඩලය යන ආයතනවල  අනුග්‍රහය ඇතිව ප්‍රදර්ශනය දියත් කෙරෙයි

The post රටට විදේශ විනිමය ඉතිරි කරන දේශීය පාවහන් සහ සම්භාණ්ඩ කර්මාන්තය appeared first on Adaderana Biz Sinhala | Sri Lanka Business News.

Source From biz.adaderana
Author: Biz Editor
#SriLanka #News #lka