මොරිසන් සමාගම මෙරට විශාලතම ඖෂධ නිෂ්පාදන කර්මාන්තශාලාව විවෘත කරයි

• සමස්ත ආයෝජනය ඇ.ඩො. මිලියන 18.5 ක්
• යුරෝපා සංගමයේ යහපත් නිෂ්පාදන ක්‍රමවේද (GMP) වලට අනුකූලව අපනයන කිරීම අරමුණයි

මෙරට විශාලතම ඝන ඖෂධ නිෂ්පාදකයා වන හේමාස් හෝල්ඩින්ග්ස් පීඑල්සී සමාගමට අනුබද්ධිත මොරිසන් පීඑල්සී සමාගම, අද (2020 ඔක්තෝබර් මස 02) දින නවීන තාක්ෂණයෙන් අනූන ඖෂධ නිෂ්පාදන කර්මාන්තශාලාව සහ පර්යේෂණ හා සංවර්ධන පරිශ්‍රය අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් විවෘත කරන ලදි. සෞඛ්‍ය ඇමතිනී පවිත්‍රා වන්නිආරච්චි, ඖෂධ නිෂ්පාදන, සැපයුම් සහ නියාමන රාජ්‍ය අමාත්‍ය මහාචාර්ය චන්න ජයසුමන, කුසලතා සංවර්ධන, වෘත්තීය අධ්‍යාපන, පර්යේෂණ සහ නවෝත්පාදන රාජ්‍ය ඇමතිනී විශේෂඥ වෛද්‍ය සීතා අරඹේපොළ සහ වෙළෙඳ අමාත්‍ය බන්දුල ගුණවර්ධන, ලේකම් ආචාර්ය සුනිල් නවරත්න ඇතුළු කැබිනට් අමාත්‍යවරු සහ සම්භාවනීය අමුත්තෝ රැසක් මෙම අවස්ථාවට සහභාගී වූහ. හෝමාගම, පිටිපන ශ්‍රී ලංකා නැනෝ තාක්ෂණ උද්‍යානයේ පිහිටි මෙම කර්මාන්තශාලාව මොරිසන් සමාගමේ දෙවන නිෂ්පාදන කර්මාන්තශාලා පරිශ්‍රයයි. ප්‍රථම වලංගු ඖෂධ තොග නිෂ්පාදනය ආරම්භ කිරීම සඳහා එම කර්මාන්තශාලාව මේවන විට සූදානමින් පවතින අතර අත්‍යවශ්‍ය ඖෂධ මෙරටදී ම නිෂ්පාදනය කිරීමේ වත්මන් රජයේ ඉලක්කයට සවියක් වෙමින් මීළඟ වසරේ ආරම්භයේදී වාණිජ වශයෙන් ඖෂධ නිෂ්පාදනය ආරම්භ කිරීමට අපේක්ෂා කෙරේ.

සියලු ශ්‍රී ලාංකිකයන් හට උසස් ප්‍රමිතියෙන් යුතු ඖෂධ දැරිය හැකි මිලකට ලබාදීම සඳහා කැපවී කටයුතු කරන මොරිසන් සමාගම මෙරට ඖෂධ පෙති අවශ්‍යතාවයෙන් 20% ක් සම්පාදනය කිරීමේ හැකියාවෙන් යුතු වෙයි. දේශීය ඖෂධ නිෂ්පාදන ක්ෂේත්‍රයේ පුරෝගාමී සමාගමක්වන මොරිසන් සමාගම සිය නවත ම ඖෂධ නිෂ්පාදන කර්මාන්තශාලාව සඳහා සිදුකරන ලද ඇ.ඩො. මිලියන 18.5 ක ආයෝජනය මෙරට සුවිශේෂී සංධිස්ථානයක් සනිටුහන් කරන අතර, එය යුරෝපා සංගමයේ යහපත් නිෂ්පාදන ක්‍රමවේද (EU-GMP) වලට අනුකූල ප්‍රථම ඝන ඖෂධ නිෂ්පාදන කර්මාන්තශාලාව ද වේ.

නවත ම ඖෂධ නිෂ්පාදන කර්මාන්තශාලාව විවෘත කිරීමේ අවස්ථාවේදී මොරිසන් සමාගමේ කළමනාකරණ අධ්‍යක්ෂ මුර්තසා එසුෆාලි මහතා සිය අදහස් පළ කළේය. “දැරිය හැකි මිලකට උසස් ප්‍රමිතියෙන් යුතු ඖෂධ ලබාදීමේ මොරිසන් සමාගමේ වසර 80 ක දැක්ම තවදුරටත් ඉදිරියට ගෙන යමින් මෙම නවත ම කර්මාන්තශාලාව අප සමාගමේ සුවිශේෂී සංධිස්ථානයක් සනිටුහන් කරනවා. මෙම ආයෝජනය ප්‍රතිමිලදී ගැනීමේ ගිවිසුම්ගත පදනම මත සිදු කෙරුණු ආයෝජනයක් බැවින් මේ හරහා අපට ව්‍යාපාරික අවස්ථා පුළුල්කර ගැනීමටත්, ගෝලීය වෙළෙඳපොළ තුළ වඩාත් තරගකාරී වීමටත් අවස්ථාව උදා වනවා. රජයෙන් ලැබෙන අඛණ්ඩ සහයෝගය හරහා අපනයන අවස්ථා වර්ධනයකර ගැනීමටත්, ගෝලීය ඖෂධ සමාගම් සමග නිෂ්පාදන කොන්ත්‍රාත්වලට එළඹීමටත් හැකිවනු ඇති අතර එමගින් ශ්‍රී ලාංකේය ආර්ථිකය සඳහා අත්‍යවශ්‍ය විදේශ විනිමය හිමිකර දීමටත් හැකිවනවා.”

යහපත් නිෂ්පාදන මාර්ගෝපදේශ (GMP) අනුව, ඖෂධ අඛණ්ඩව උසස් ප්‍රමිතියෙන් නිෂ්පාදනය විය යුතු අතර එක්-එක් ඖෂධයෙන් ඉටුකර ගැනීමට අපේක්ෂා කරන අරමුණ ඉටුකර ගැනීමට සුදුසු විය යුතුය. විශ්වසනීය ඖෂධ නිෂ්පාදකයෙකු බවට පත්වීමටත්, ගෝලීය අපනයනකරුවෙකු බවට පත්වීමටත්, නියාමන වෙළෙඳපොළ තුළ පාර්ශ්වකරුවෙකු බවට පත්වීමටත් යුරෝපා සංගමයේ යහපත් නිෂ්පාදන ක්‍රමවේද අනුගමනය කිරීම අත්‍යවශ්‍ය වේ.

“හේමාස් සමාගම ගෝලීය ඖෂධ ක්ෂේත්‍රයේ දැවැන්තයින් සමග ඇතිකර ගෙන ඇති සවිමත් සබඳතා හරහා මොරිසන් සමාගම ද එම දැවැන්තයින් සමග සම්බන්ධ වෙමින් උසස් ම ගුණාත්මක බවින් යුතු නිෂ්පාදන සම්පාදනය කිරීමට බලාපොරොත්තු වනවා. නව වෙළෙඳපොළ තුළ නව නිෂ්පාදන සහ සංවර්ධන අවස්ථා ගොඩනැගීම හරහා ගෝලීය නියමයන් සහ රෙගුලාසිවලට අනුකූලව මෙම නව වර්ධන අදියරට සාර්ථකව මුහුණදීමට අප කටයුතු කරනවා. ශ්‍රී ලංකා නැනෝ තාක්ෂණ ආයතනය (SLINTEC) සමග ඇති සබඳතාව හරහා නැනෝ සහ උසස් තාක්ෂණ මිශ්‍රණ පර්යේෂණ තවදුරටත් පුළුල් කිරීමට ද අපට හැකි වනවා,” යනුවෙන් එසුෆාලි මහතා වැඩිදුරටත් සඳහන් කළේය.

මොරිසන් සමාගම විවිධ ඖෂධ සංයෝග 75 ක් නිෂ්පාදනය කරන අතර විශේෂයෙන් බෝ නොවන රෝග සඳහා අවශ්‍ය ඖෂධවලට ඇති ශීඝ්‍ර ඉල්ලුම සපුරාලීමට ඉදිරි වසර කිහිපය තුළ කටයුතු කිරීමට අපේක්ෂා කරයි. මෙම නව කර්මාන්තශාලාවට වාර්ෂිකව ඖෂධ පෙති බිලියන 5 ක් නිෂ්පාදනය කිරීමේ හැකියාව ඇති අතර ද්විත්ව වැඩමුර යටතේ උපරිම ධාරිතාවයෙන් ඖෂධ බෝතල් මිලියන 10 ක් නිෂ්පාදනය කිරීමේ හැකියාව පවතී. එමගින් පුහුණු රැකියා 250 කට අධික සංඛ්‍යාවක් නිර්මාණය කිරීමට ද අපේක්ෂිතය. නිෂ්පාදන හැකියාව මෙන්ම හෝමාගම ප්‍රදේශයේ පාසල් ඖෂධ විද්‍යාව පිළිබඳ දැනුම්වත් කිරීම සහ අභ්‍යන්තර රැකියා පුහුණු සහ ඒකාබද්ධ පර්යේෂණ සඳහා උසස් අධ්‍යාපන ආයතන සමග සම්බන්ධ වීම හරහා හෝමාගම ප්‍රදේශයේ ප්‍රජාවගේ ජීවන තත්ත්වය නගාසිටුවීමට ඇති හැකියාව ද නිසා මෙම කර්මාන්තශාලාව සුවිශේෂී වෙයි.

මානව දෝෂ වළක්වා ගැනීම සඳහා අවම මිනිස් මැදිහත්වීමක් සිදුවන පරිදි නිර්මාණය කර ඇති මෙම නව කර්මාන්තශාලාව, මුළුමනින් ම ස්වයංක්‍රිය ද්‍රව නිෂ්පාදන සහ ඇසුරුම්කරණ ක්‍රමවේද, පරිපූර්ණ රසායන සහ ක්ෂුද්‍රජීව විද්‍යාගාර, පාරිසරික තත්ත්ව පාලනය කිරීම සඳහා වෙනම වායු මෙහෙයුම් ඒකක මෙන්ම ව්‍යවසාය සම්පත් සැලසුම්කරණ මෘදුකාංගයකින් ද සමන්විතය. මෙරට ප්‍රථම ශුන්‍ය ද්‍රව විසර්ජන අපජල පද්ධතියෙන් යුතු කර්මාන්තශාලාව ද මෙය වේ.

The post මොරිසන් සමාගම මෙරට විශාලතම ඖෂධ නිෂ්පාදන කර්මාන්තශාලාව විවෘත කරයි appeared first on Adaderana Biz Sinhala | Sri Lanka Business News.