මෙරට සිසුන්ට අධ්‍යාපනික ණය ලබාදීමට කොමර්ෂල් බැංකුව HCL ටෙක්නොලොජීස් සමග අත්වැල් බැඳගනී

මෙරට පුහුණුවන සහ රැකියා කරන සිසුන්ට අඩු පොලී අධ්‍යාපනික ණය ලබාදීම සඳහා HCL  ටෙක්නොලොජීස් ශ‍්‍රී ලංකා සමාගම සමග ඒකාබද්ධ වූ බව කොමර්ෂල් බැංකුව නිවේදනය කර ඇත.

මේ අනුව, HCL ටෙක්නොලොජීස් විසින් ඉදිරිපත් කරන මුල් කාලීන වෘත්තීය පුහුණු වැඩසටහනේ (ECTP) බැඳුම්කර ගාස්තුව මෙන්ම පාර්ශවකාර විශ්ව විද්‍යාල විසින් ලබාදෙන උසස් අධ්‍යාපනික වැඩසටහන්වල පාඨමාලා ගාස්තු බැංකුවේ මෙම විශේෂ ණය වැඩසටහන මගින් මූල්‍යනය කරයි.

මෙම වැඩසටහන යටතේ මුල් කාලීන වෘත්තීය පුහුණු වැඩසටහනේ අපේක්ෂකයින්ට සහ උසස් අධ්‍යාපනය ලබන අපේක්ෂකයින්ට රුපියල් මිලියන 02 ක් දක්වා ණය පහසුකම් ලබාදෙන බව බැංකුව සඳහන් කරයි.

‘මෙරට තොරතුරු තාක්ෂණික අධ්‍යාපනය නැංවීමට සහාය ලබාදීම සහ ශ‍්‍රී ලංකාවේ තොරතුරු තාක්ෂණික සාක්ෂරතාව ඉහළට රැගෙන ඒම රට වෙනුවෙන් කොමර්ෂල් බැංකුවේ තිබෙන දැක්මේ ඉතාමත් වැදගත් කොටසක් වෙනවා,’ යනුවෙන් මේ පිළිබඳව අදහස් දක්වමින් කොමර්ෂල් බැංකුවේ නියෝජ්‍ය සාමාන්‍යාධිකාරී – අලෙවිකරණ හස්රත් මුණසිංහ මහතා පැවසීය. ‘ගෝලීය දැවැන්තයෙකු වන HCL ටෙක්නොලොජීස් සමාගමේ ශාඛාවක් මෙරට අරඹන විට එයට අපි ඉතාමත් සතුටෙන් සහයෝගය ලබාදුන්නා. එයට හේතුව වන්නේ මෙරට තොරතුරු තාක්ෂණික වෘත්තිකයින්ට බොහෝ අවස්ථාවන් මෙම සමාගමට ලබාදිය හැකි නිසයි.‘

මෙම ඒකාබද්ධතාවය සඳහා ආයතන දෙක අතර අත්සන් කළ අවබෝධතා ගිවිසුමට අනුව HCL ටෙක්නොලොජීස් ලංකා (ප‍්‍රයිවට්) ලිමිටඞ් සමාගමේ පුහුණු වන හෝ රැකියා කරන උසස් පෙළ සමතුන්ට, උපාධි අපේක්ෂකයින්ට, උපාධිධාරීන්ට සහ මෘදුකාංග ඉංජිනේරුවන්ට විශේෂ ණය ලබාගැනීමේ අවස්ථාව ලබාදී ඇත.

මෙම ගිවිසුමට අනුව HCL ටෙක්නොලොජීස් විසින් ඉදිරිපත් කරන මුල් කාලීන වෘත්තීය පුහුණු වැඩසටහන හැදෑරීම සඳහා කොමර්ෂල් බැංකුවෙන් ණය මුදලක් ලබාගත් සිසුන්ට අදාළ පුහුණුව අවසන් කළ පසුව HCL ටෙක්නොලොජීස් සමාගම රැකියා ලබාදෙන අතර රැකියාවක් ලැබුණු පසුව මෙම ණය මුදල ගෙවීම සඳහා සහන ණය ගෙවීමේ සැලසුමකට එළඹීමටද මේ යටතේ සිසුන්ට අවස්ථාව හිමිවේ.

ලෝකයේ හොඳම බැංකු 1000 අතරට නම් වූ ප‍්‍රථම දේශීය බැංකුව සහ පිට පිටම දස වතාවක් එසේ නම් වූ එකම ශ‍්‍රී ලාංකේය බැංකුව වන කොමර්ෂල් බැංකුව 2020 වසරේදී සියවස සමරයි. කොමර්ෂල් බැංකුව මෙරට බැංකු ශාඛා 268 ක් සහ ස්වයංක‍්‍රීය ටෙලර් යන්ත‍්‍ර 873 ක් පවත්වාගෙන යයි. බැංකුව 2019 වසරේදී ජාත්‍යන්තර සහ දේශීය සම්මාන 50 කට වැඩි ප‍්‍රමාණයක් දිනා ගැනීමට සමත්ව තිබේ.

බංග්ලාදේශය තුළ ශාඛා 19 ක් ද මියන්මාරයේ යැන්ගොන්හි, නියෝජිත කාර්යාලයක් සහ නේ පයිටව් හි, ක්ෂුද්‍ර මූල්‍යන සමාගමක් මෙන්ම මාලදිවයින තුළ බහුතර කොටස් හිමිකාරීත්වයෙන් යුතු පළමු පෙළ බැංකුවකින් සමන්විත විදේශීය මෙහෙයුමක් පවත්වාගෙන යන ශ‍්‍රී ලංකාවේ එකම පුද්ගලික වාණිජ බැංකුව කොමර්ෂල් බැංකුව වේ.

සේයාරු සටහන – කොමර්ෂල් බැංකුවේ ප‍්‍රධාන මෙහෙයුම් නිළධාරී, සනත් මනතුංග මහතා (මැද) සහ HCL  ටෙක්නොලොජීස් ලංකා (ප‍්‍රයිවට්) ලිමිටඞ් සමාගමේ නේවාසික අධ්‍යක්ෂ, තෝතත‍්‍රි වයිකුන්ටම් මහතා ගිවිසුම හුවමාරු කරගනී. මෙම අවස්ථාවට (වමේ සිට) HCL  ටෙක්නොලොජීස් ලංකා (ප‍්‍රයිවට්) ලිමිටඞ් සමාගමේ ආයතනික කළමනාකරු, මුතු ශංකර් සිවසුබ්බු මහතා සහ සාමාන්‍යාධිකාරී – මෙහෙයුම්, ඩිලාන් එස්. පෙරේරා මහතා, කොමර්ෂල් බැංකුවේ නියෝජ්‍ය සාමාන්‍යාධිකාරී – පුද්ගලික බැංකු කටයුතු  සැන්ඩ‍්‍රා වල්ගම මහත්මිය, කොමර්ෂල් බැංකුවේ නියෝජ්‍ය සාමාන්‍යාධිකාරී, අලෙවිකරණ හස්රත් මුණසිංහ මහතා සහ රිටේල් ප්‍රොඩක්ට් අංශයේ, ජ්‍යෙෂ්ඨ කළමනාකරු, දුෂ්මන්ත ජයසූරිය මහතා සහභාගී විය.

The post මෙරට සිසුන්ට අධ්‍යාපනික ණය ලබාදීමට කොමර්ෂල් බැංකුව HCL ටෙක්නොලොජීස් සමග අත්වැල් බැඳගනී appeared first on Adaderana Biz Sinhala | Sri Lanka Business News.

Source From biz.adaderana
Author: Biz Editor
#SriLanka #News #lka