මහ බැංකුවේ රන් සංචිතය පහළට. හේතුව මෙන්න

මහ බැංකුව සතුව පවතින සංචිත වත්කම් ආකාර 5 කින් පවතී. එනම්,

1. විදේශ විනිමය සංචිත (Foreign currency reserves)

2. ජාත්‍යන්තර මූල්‍ය අරමුදලෙන් ලද සංචිත කොටස (Reserve position in the IMF)

3. විශේෂ ගැනුම් හිමිකම් (SDRs)

4. රත්‍රං (Gold) සහ

5. වෙනත් සංචිත වත්කම් (Other reserve assets) වශයෙනි.

මෙම වසර ආරම්භයේ දී ශ්‍රී ලංකා මහ බැංකුව යටතේ පවතින රන් සංචිතයේ වටිනාකම එක්සත් ජනපද ඩොලර් මිලියන 408.9 ක් ලෙසින් වාර්තා වූ අතර 2021 ජනවාරි මාසය අවසාන වන විට එය ඩොලර් මිලියන 398.0 ක් දක්වාත්, පෙබරවාරි මාසය වන විට ඩොලර් මිලියන 381.4 ක් දක්වාත් එය පහළ ගොස් ඇත.

මෙලෙස රන් සංචිතයේ වටිනාකම පහළ යාම සම්බන්ධයෙන් අද දෙරණ විසින් ශ්‍රී ලංකා මහ බැංකුවෙන් විමසීමක් කරන ලදී. එහිදී මහ බැංකු අධිපති මහාචාර්ය ඩබ්.ඩී. ලක්ෂ්මන් මහතා පැවසුවේ රත්‍රං සංචිත විකිණීමක් කිසිසේත් සිදුකර නොමැති බවත් ලෝක වෙළෙඳපොළේ රන් මිල පහළ යාම මීට හේතු වී ඇති බවත්ය.

“ප්‍රධාන වශයෙන් සෑම මාසයකම අවසානයේ තිබෙන වෙළෙඳපොළ මිල අනුව තමයි රත්‍රං සංචිතවල අගය ගණනය කරනු ලබන්නේ. වෙළෙඳපොළ මිල උච්ඡාවචනය වන විට එහි මිල ඉහළ පහළ යනවා“, යනුවෙන් මෙහිදී අදහස් දක්වමින් ශ්‍රී ලංකා මහ බැංකුවේ ආර්ථික පර්යේෂණ දෙපාර්තමේන්තුවේ වැඩබලන අධ්‍යක්ෂ, ආචාර්ය පී.කේ.ජී. හරිස්චන්ද්‍ර මහතා පැවසුවේය.

 

 

The post මහ බැංකුවේ රන් සංචිතය පහළට. හේතුව මෙන්න appeared first on Adaderana Biz Sinhala | Sri Lanka Business News.