බෝගල පතලේ ආයෝජකයින්ට කොටස් වෙළෙඳපොළෙන් සුපිරි ඉල්ලමක් පෑදෙයි

කොළඹ කොටස් වෙළෙඳපොළේ ලැයිස්තුගත සමාගමක් වන බෝගල ග්‍රැෆයිට් ලංකා පීඑල්සී හි කොටසක මිල අද (23) දිනයේ දී 23.82% කින් ඉහළ යන ලදී. මේ අනුව අද දිනයේ ගනුදෙනු අවසානයේ දී බෝගල ග්‍රැෆයිට් ලංකා පීඑල්සී හි කොටසක මිල රු. 144.25 ක් ලෙසින් සටහන් වූ අතර එය පෙර දිනයට සාපේක්ෂව රු. 27.75 ක වර්ධනයක් වේ.

මේ අතර අද දිනය තුළ දී කොළඹ කොටස් වෙළෙඳපොළ සියලු කොටස් මිල දර්ශකය ඒකක 111.36 ක වර්ධනයක් වාර්තා කළ අතර S&P SL20 දර්ශකය ඒකක 57.62 ක වර්ධනයක් වාර්තා කරන ලදී. ඒ අනුව දිනය අවසානයේ දී සියලු කොටස් මිල දර්ශක අගය ඒකක 10,928.60 ක් ලෙසත් S&P SL20 දර්ශකය ඒකක 3,755.74 ක් ලෙසත් සටහන්ව තිබුණි.

රු. බිලියන 6.61 ක පිරිවැටුමක් අද දින ගනුදෙනු හරහා වාර්තා විය. දෛනික පිරිවැටුම සඳහා වැඩිම දායකත්වය LOLC හෝල්ඩිංග්ස් කොටස් ගනුදෙනු තුළින් ලැබූ තිබුණු අතර එය රු. මිලියන 807.96 කි. මෙහිදී දක්නට ලැබුණු සුවිශේෂී කරුණ නම් LOLC හෝල්ඩිංග්ස් හි කොටසක මිල අද දිනයේ දී රු. 900 සීමාව ඉක්මවා ගනුදෙනු වීමයි. එහිදී පෙර දිනයට වඩා රු. 126.25 කින් LOLC හෝල්ඩිංග්ස් කොටස් මිල ඉහළ ගිය අතර දිනය අවසානයේ දී එය රු. 907.00 ක් ලෙසින් සටහන්ව තිබුණි. LOLC හෝල්ඩිංග්ස් ට අමතරව බ්‍රවුන්ස් ඉන්වෙස්ට්මන්ට්ස් (රු. මිලියන 601.10), LOLC  ෆිනෑන්ස් (රු. මිලියන 546.39), බෝගල ග්‍රැෆයිට් (රු. මිලියන 536.06) හා එක්ස්පෝලංකා හෝල්ඩිංග්ස් (රු. මිලියන 513.50) ක් වශයෙන් දෛනික පිරිවැටුමට වැඩිම දායකත්වයක් ලබා දුන් සෙසු සමාගම් විය.

 

The post බෝගල පතලේ ආයෝජකයින්ට කොටස් වෙළෙඳපොළෙන් සුපිරි ඉල්ලමක් පෑදෙයි appeared first on Adaderana Biz Sinhala | Sri Lanka Business News.