පොලී අනුපාත අඩුකරන්න බැංකුවලට බලපෑම් කරනවා – මහ බැංකු ජ්‍යෙ.නි. අධිපති කියයි

මහ බැංකු ප්‍රතිපත්ති පොලී අනුපාතික අඩුවීමට සාපෙක්ෂව වෙළෙඳපොළ ණය පොලී අනුපාතික පහළ නොයෑම සම්බන්ධයෙන් ශ්‍රී ලංකා මහ බැංකුවේ ජ්‍යෙෂ්ඨ නියෝජ්‍ය අධිපති ආචාර්ය නන්දලාල් වීරසිංහ මහතා කරුණු පැහැදිලි කිරීමක් කර සිටී. අද (09) ශ්‍රී ලංකා මහ බැංකුවේ පැවති මාධ්‍ය හමුවක දී ජ්‍යෙෂ්ඨ නියෝජ්‍ය අධිපතිවරයා පැවසුවේ පොලී අනුපාත පහළ දැමීම සඳහා මහ බැංකුව විසින් බැංකුවලට බලපෑම් කරනු ලබන බවයි. එසේම ණය සහන කාලයට අදාළව පොලී අයකිරීම් පිළිබඳව පැනනැඟී ඇති කරුණු සම්බන්ධයෙන් ද ජ්‍යෙෂ්ඨ නියෝජ්‍ය අධිපතිවරයා මෙහිදී කරුණු දක්වන ලදී.

මේ සම්බන්ධයෙන් ශ්‍රී ලංකා මහ බැංකුවේ ජ්‍යෙෂ්ඨ නියෝජ්‍ය අධිපති ආචාර්ය නන්දලාල් වීරසිංහ මහතා කළ කරුණු දැක්වීම මෙසේය.

“ප්‍රතිපත්ති පොළී අනුපාතික මේ වසර තුළ පදනම් අංක 150 කින් අඩු කළාට පසු සමහර පොළී අනුපාත ඊට සමගාමීව අඩුවුණා. විශේෂයෙන් බැංකුවල ප්‍රධානම ගනුදෙනුකරුවන්ට (Prime customers) දෙන ණය අනුපාතය පදනම් අංක 150 කට ආසන්න ප්‍රමාණයකින් ඒ සමානවම අඩුවෙලා තිබෙනවා. ඒ වාසිය ප්‍රධාන ගනුදෙනුකරුවන්ට ලැබිලා තිබෙනවා. නමුත් ගිය වසරේ පාස්කු ප්‍රහාරයෙන් පසු අඩු කළ මුළු ප්‍රමාණයම ඔවුන් වෙත ගියේ නැහැ. ඒ අනුව මෙතන තව තියෙනවා. අපි බැංකුවලට බලපෑම් කරනවා තව අඩුකරන්න ඕනේ කියලා.“

“ඒත් එක්කම රජය ණය ගන්න පොලී අනුපාත, ප්‍රතිපත්ති පොලී අනුපාතය අඩු කළාට වඩා විශාල වශයෙන් අඩුවෙලා තිබෙනවා සීඝ්‍ර වශයෙන්. උදාහරණයක් ලෙස, අපි ප්‍රතිපත්ති පොලී අනුපාතය අඩු කළාට පසු අදට කලින්, අපි කියන්නේ call money rate කියලා, බැංකු මුදල් වෙළෙඳපොළේ ගනුදෙනු වෙන අනුපාතය 5.5 තිබුණේ. එක් අවුරුදු භාණ්ඩාගාර බිල්පතේ පොලී අනුපාතය 5.32 යි. විශාල අඩුවීමක් එතනත් තියෙනවා. ඊට අමතරව සමහර තැන්පතු අනුපාත දැන් සීඝ්‍ර වශයෙන් අඩුවෙලා තිබනෙවා. අඩුවෙලා නැත්තේ ප්‍රධාන ගනුදෙනුකරුවන්ට පිටතින් ණය ගන්න සාමාන්‍ය SME සහ අවදානම ටිකක් වැඩි අයගේ පොලී අනුපාත අඩුවෙලා නැහැ. අපි ඒකට විශාල වශයෙන් බැංකුවලට බලපෑම් කරනවා.“

“ව්‍යවස්ථාපිත සංචිත අනුපාතය අඩු කළ එකෙන් ඒ අයගේ අරමුදල් පිරිවැය තව අඩුවිය යුතුයි. අපි හිතනවාඉතා ඉක්මනින් එය ලැබෙයි කියා. බැංකුවලින් පොලී අඩුකරන්න බැරි එක හේතුවක් ලෙස ඔවුන් දක්වන්නේ, ඔවුන් ණය දෙන්නේ තැන්පත්කරුවන්ගේ මුදල්වලින්. තැන්පත්වලට දෙන පොලී අනුපාතය අපි අඩු කළ ප්‍රමාණය හා සමගාමීව අඩුවෙලා නැහැ. තැන්පතු ගන්නේ සාමාන්‍යයෙන් වසරක කාලයකට. වසරක කාලය සපිරෙන අවස්ථාවේ දී තමයි තැන්පතුකරුවාගේ පොලිය අඩුකරන්න පුළුවන්. ඒ නිසා යම්කිසි කාලයක් යනවා, අපි පොලිය අඩුකළ එක සම්පූර්ණයෙන්ම මුළු හැමෝටම ඒක බලපාන්න.“

“අනෙක් කාරණය කලින් ගත්ත ණයවල පොලී අඩුවෙන්නේ නැහැ. බොහෝ වෙලාවට ස්ථාවර පොලියක් යටතේ ගත්තොත් අවසන් වෙනතුරු ඒ ගාණම තිබෙනවා. ඒවාත් කල්පිරෙන්න කල් යනවා. ඒක සාමන්‍යයෙන් ඕනම පොලී වෙළෙඳපොළක යම්කිසි කාලපරාසයක් තියෙනවා, සම්පූරණයෙන්ම මේක සිදුවෙන්න. අපි මේ වෙලාවේ කියන්නේ හැකිතරම් ඉක්මනට, මේ වගේ අවස්ථාවක දී පොලී අනුපාතය හාමෝටම, විශේෂයෙන් SME අයටත් අඩුවෙන් ඕනේ. ඒ ප්‍රමාදය නිසා තමයි SME අයට වෙනම යෝජනාවක් යටතේ සියයට 4 සහන පොලී අනුපාත ක්‍රමය ක්‍රියාත්මක කරලා තියෙන්නේ. ඒ අයගේ පොලී ඉතාම වේගයෙන් අඩුවෙන්නේ නැහැ. ඒ වෙනුවට අනෙක් උපකරණය තමයි සියයට 4 යටතේ SME අයට ඒ පොලී අනුපාතයේ වාසිය මේ වගේ අවස්ථාවක ලබා දීම තමයි අපි කටයුතු කළේ. “

මෙහිදී ලබා දී ඇති ණය සහන කාලයට අදාළව අතිරේක පොලියක් අය කළ හැකිදැයි කළ විමසීමක දී ආචාර්ය නන්දලාල් වීරසිංහ මහතා වැඩිදුරටත් මෙසේ පැවසීය.

“අපි නිකුත් කළ චක්‍රලේඛය අනුව මුලින්ම දුන්නේ මාස හය හෝ දෙක තුන වශයෙන් ණය හා පොලිය නොගෙවා සිටීමට සහන කාලයක්. ඒ කාලය තුළ ගෙවන්න අවශ්‍ය නැහැ කියන එක. දෙවන කාරණය අවුරුදු දෙකක ණය ගත්ත කෙනෙක් මාස 06ක් දික්කළා කියන්නේ අවුරුදු දෙකේ ණය අවුරුදු 2 1/2 වෙනවා. එතකොට බැංකුව පැත්තෙන් බැලුවාම ඒ ගොල්ලෝ අවුරුදු දෙකේ ණයට පොලී අනුපාතය හදලා තියෙන්නේ, මාස 24 ක් තුළ ඒ ණය ආවරණය වෙන විදියට.  දැන් මෙතන දී මාස 24 එක මාස 30 වෙනවා. මාස 06කත් වැඩිවෙනවා. ඒ මාස හය අන්තිමට දානවා. ඒකේ දී අපි චක්‍ර ලේඛනය අනුව කියලා තියෙන්නේ අමතර මාස 06 සඳහා, යම්කිසි ආකාරයක සහන පොලී අනුපාතිකයක් විතරක් අයකරන්න කියලා. උදාහරණයක් විදියට බැංකුවලට කියලා තියෙන්නේ ඒ මාස 06ට අයකරන්න පුළුවන් උපරිම පොලිය සියයට 7යි. ඒක පළවෙනි මාස ඇතුලේ අයකරන්න බැහැ. ගනුදෙනුකරුවත් සමඟ සාකච්ඡා කරලා වාරිකය අන්තිමට එකතු කරන්න පුළුවන්. වාරික එකක් දෙකක්. ගෙවන්න හැකියාවක් තියෙනවා නම් ඒ කාලය තුළ ගෙවාගෙන යන්නත් පුළුවන්. මොකද ඒ මාස 06 වෙනුවෙන් බැංකුවට තැන්පත්කරුවන්ට නොගෙවා ඉන්න බැහැ.“

The post පොලී අනුපාත අඩුකරන්න බැංකුවලට බලපෑම් කරනවා – මහ බැංකු ජ්‍යෙ.නි. අධිපති කියයි appeared first on Adaderana Biz Sinhala | Sri Lanka Business News.

Source From biz.adaderana
Author: Biz Editor
#SriLanka #News #lka