පිළියන්දල නව ශාඛාවකට මුල්ගල තබමින් සෙලින්කෝ ලයිෆ් සිය හරිත ගමන ඉදිරියට ගෙන යයි

කොවිඞ්-19 වසංගත තත්ත්වයේ බලපෑම් නිසා නොසැලී සෙලින්කෝ ලයිෆ් සමාගමේ මෙහෙයුම් කටයුතු හරිතකරණය කිරීමේ වැඩසටහන ඉදිරියට ගෙන යමින් සමාගමේ පිළියන්දල ශාඛාව සඳහා නව පරිසර හිතකාමී ගොඩනැගිල්ලක් ඉදිකිරීමට පසුගියදා මුල්ගල් තබන ලදී.

සමාගමට අයත් ඉඩමක ඉදිකරන 40 වන ගොඩනැගිල්ල වන මෙම නව ගොඩනැගිල්ල තට්ටු තුනකින් සමන්විත වනු ඇත. වර්ග අඩි 5,683 ක ඉඩ ප‍්‍රමාණයකින් යුතු මෙම ගොඩනැගිල්ල පිළියන්දල හොරණ පාරේ අංක 190, 192 සහ 194 යන ස්ථානවල පිහිටා තිබෙන අතර සමාගම විසින් තම ඉඩම්වල ඉදිකරන ගොඩනැගිලි වලට අදාළ කරගන්නා සියළුම පරිසර හිතකාමී අංගෝපාංගයන්ගෙන් යුක්තව මෙම ගොඩනැගිල්ලද ඉදිකරනු ලබයි.

මෙම ගොඩනැගිල්ල සඳහා සම්පූර්ණයෙන්ම බලශක්තිය කිලෝවොට් 20 ක සූර්ය බලශක්ති පද්ධතියක් මගින් ලබාදෙන නිසා ජාතික විදුලි බල පද්ධතියෙන් කිසිදු බලශක්ති අවශ්‍යතාවයක් මෙම ගොඩනැගිල්ල සඳහා ලබා නොගනී. එසේම, මෙම ගොඩනැගිල්ලේ වැසි ජලය එක් රැස්කර ගැනීමේ පහසුකමක්, අප ජලය ප‍්‍රතිචක‍්‍රීකරණය කිරීමේ පද්ධතියක් ස්ථාපිත කරන අතර එමගින් නල ජලය භාවිතා කිරීම අවම කරයි.

මීට අමතරව, ස්වභාවික ආලෝකය උපරිම අයුරින් ලබාගන්නා ලෙස මෙම ගොඩනැගිල්ල නිර්මාණය කර තිබෙන අතර මේ සඳහා බලශක්ති කාර්යක්ෂමතාවයකින් යුතු අති නවීන ආලෝක සහ වායු සමීකරණ පද්ධති සවිකරන බව සමාගම සඳහන් කරයි. මෙම ගොඩනැගිල්ල ඉදිකිරීමේදී ලී අවම වශයෙන් භාවිතා කරන අතර මෙම ගොඩනැගිලි භූමියේ අළුතින් ගස් ගණනාවක් රෝපණය කිරීමට සමාගම විසින් කටයුතු යොදා තිබේ.

මෙම ගොඩනැගිල්ල ඉදිකළ පසුව පිළියන්දල ප‍්‍රදේශයේ සෙලින්කෝ ලයිෆ් ශාඛා පවත්වාගෙන යාම සඳහා මෙම ගොඩනැගිල්ල භාවිතා කරන බව සමාගම සඳහන් කරයි. ගැනුම්කරුවන්ට උපරිම සේවාවක් සහ පහසුකම් ඇතිව ඉදිවන මෙම ගොඩනැගිල්ලේ අවශ්‍ය තරම් වාහන ගාල්කර තැබීමේ පහසුකම්ද ඉදි කරනු ඇත.

2019 සැප්තැම්බර් මාසයේදී සෙලින්කෝ ලයිෆ් සමාගමට අයත් ඉඩමක ඉදිකළ 36 වන ගොඩනැගිල්ල ලෙසින් යාපනය කාන්තන්කුඩි ප‍්‍රදේශයේ වර්ග අඩි 17,290 ක ගොඩනැගිල්ලක් විවෘත කළ අතර එය සමාගම විසින් ඉදිකළ දෙවන විශාලතම ශාඛා ගොඩනැගිල්ලයි. මේ අතර, සමාගමේ ඉඩමක ඉදිකළ 37 වන ගොඩනැගිල්ල ලෙසින් මේ වසරේ ජනවාරි මාසයේදී සමාගම විසින් මාළඹේදී විවෘත කළ අතර දිවුලපිටිය සහ නෙල්ලිඅඩි ශාඛා සඳහා මේ ආකාරයෙන්ම හරිත ගොඩනැගිලි සමාගම විසින් මේ වනවිට ඉදිකරමින් සිටී. මීට අමතරව, සමාගමේ මීගමුව ශාඛාවේ ධාරිතාවයද සමාගම මේ වනවිට පුළුල් කරමින් ඇත.

සමාගම විසින් මේ වනවිට අනුරාධපුරය, ත‍්‍රිකුණාමලය, යාපනය, මඩකළපුව, මහනුවර, කළුතර, කුරුණෑගල, ගම්පහ, මාතර, ගාල්ල, තිස්සමහාරාමය, මීගමුව, රත්නපුරය, කොටහේන, ගල්කිස්ස සහ වැල්ලවත්ත යන ස්ථානවල සමාගමට අයත් ශාඛා ගොඩනැගිලි පිහිටුවා තිබෙන අතර මින් බොහෝ ප‍්‍රමාණයක් සඳහා මේ වනවිට විදුලිය ලබාගන්නේ සූර්ය බලශක්තිය මගිනි. මේ අතර, නව පරිසර හිතකාමී ආකෘතියට අනුව සමාගම විසින් හොරණ, පානදුර, වෙන්නප්පුව, බණ්ඩාරවෙල, හලාවත, කඩවත, යාපනය සහ මාලඹේ ශාඛා ගොඩනැගිලි ඉදිකර තිබේ.

මෙරට ජීවිත රක්ෂණ ක්ෂේත‍්‍රයේ වැඩිම ශාඛා ජාලය වන ශාඛා 250 කට වැඩි ප‍්‍රමාණයක් පවත්වාගෙන යන සෙලින්කෝ ලයිෆ් මෙරට දිස්ත‍්‍රික්ක 25 ආවරණය වන පරිදි ගම් සහ නගර 142 ක ශාඛා පවත්වාගෙන යයි.

සෙලින්කෝ ලයිෆ් සමාගම ආරම්භ කර ගෙවුණු වසර 32 හි දෙවන අර්ධය පුරා මෙරට ජීවීත රක්ෂණ ක්ෂේත‍්‍රයේ ප‍්‍රමුඛයා බවට පත්වීමට සමත්වී තිබේ. 2020 වසරේදී බ‍්‍රෑන්ඞ් ෆයිනෑන්ස් විසින් මෙරට වටිනාතම ජීවිත රක්ෂණ සන්නාමය ලෙසත් ස්ලිම්-නීල්සන් විසින් පිට පිටම 14 වන වසරටත් මෙරට වඩාත්ම ජනප‍්‍රිය ජීවිත රක්ෂණ සමාගම ලෙසින් සෙලින්කෝ ලයිෆ් සමාගම සම්මානයට පාත‍්‍ර විය. එසේම, 2019 වසරේදී ICCSL විසින් මෙරට ගෞරවණීයම සමාගම් 10 ලැයිස්තුවටද සමාගම ඇතුළත් කළ අතර 2019 වසරේදී වර්ල්ඞ් ෆයිනෑන්ස් මගින් පිට පිටම හයවන වතාවටත් මෙරට හොඳම ජීවිත රක්ෂණ සමාගම ලෙසත් බිස්නස් ටුඬේ වර්ගීකරණයේදී සමස්තයක් වශයෙන් මෙරට ප‍්‍රධානතම සමාගම් 30 අතුරන් 06 වන ස්ථානයටත් සමාගම තෝරා ගන්නා ලදී.

සෙලින්කෝ ලයිෆ් සක‍්‍රීය රක්ෂණ ඔප්පු මගින් ජීවිත ලක්ෂ 10 කට ආසන්න ගණනක් ආවරණය කර තිබේ. නිර්මාණශීලී සැලසුම් හඳුන්වාදීම සහ සංවර්ධනය, පාරිභෝගික සේවා, වෘත්තීය සංවර්ධනය සහ ආයතනික සමාජ වගකීම යන අංශ සම්බන්ධයෙන් සමාගම ක‍්‍රියාකර තිබෙන ආකාරය අනුව දේශීය රක්ෂණ ක්ෂේත‍්‍රයේ නවෝත්පාදනයන් සම්බන්ධයෙන් සෙලින්කෝ ලයිෆ් සමාගම මිනුම් ලකුණක් වේ.

 

සේයාරු සටහන –  සේයාරුවෙන් දැක්වෙන්නේ සෙලින්කෝ ලයිෆ් සභාපති, ආර්. රෙන්ගනාදන් මහතා සහ කළමනාකාර අධ්‍යක්ෂ සහ ප‍්‍රධාන විධායක නිළධාරී, තුෂාර රණසිංහ මහතා (වමේ සිට පිළිවෙලින් 03 වැන්නා සහ 04 වැන්නා), අධ්‍යක්ෂවරුන්, ජ්‍යෙෂ්ඨ කළමනාකාරීත්වයේ සාමාජිකයින් සහ ශාඛා කාර්ය මණ්ඩලය මුල්ගල තැබීමේ උත්සව අවස්ථාවට සහභාගී වූ ආකාරයයි.

 

The post පිළියන්දල නව ශාඛාවකට මුල්ගල තබමින් සෙලින්කෝ ලයිෆ් සිය හරිත ගමන ඉදිරියට ගෙන යයි appeared first on Adaderana Biz Sinhala | Sri Lanka Business News.

Source From biz.adaderana
Author: Biz Editor
#SriLanka #News #lka