පාර්ලිමේන්තුවේ මොටර් බයිසිකල් විවාදය – කබ්රාල්ගෙන් සජිත්ට පිළිතුරු

ශ්‍රී ලංකාවට ආනයනය කරනු ලබන භාණ්ඩ ගණනාවකටම මේ වන විට ආනයන සීමා පනවා ඇති පසුබිමක, මොටර් බයිසිකල් ආනයනය තහනම් කිරීම හේතුවෙන් ඒම කර්මාන්තයේ යෙදෙන විශාල පිරිසක් සහ මෝටර් බයිසිකල් පරිහරණය කරනු ලබන විශාල සංඛ්‍යාවක් අපහසුතාවයට පත්ව ඇති බව විපක්ෂ නායක සජිත් ප්‍රේමදාස මහතා පවසයි. අද (24) දින පාර්ලමේන්තුවේ දී විපක්ෂ නායකවරයා මේ බව සඳහන් කරමින් වැඩිදුරටත් කිසා සිටියේ මේ තීරණය හේතුවෙන් මෙරට බැංකු හා මූල්‍ය සමාගම්වලට ද අහිතකර බලපෑමක් එල්ල වී ඇති බවයි.

කෙසේ වෙතත්, විදේශ විනිමය අනුපාතයට දැඩි පීඩනයක් එකවර ඇති නොවන ආකාරයෙන් සහ දේශීය ආර්ථිකය නැවත සවිබල ගැන්වීමේ ක්‍රමෝපායන්ට යටත්ව මෙම ආනයන සීමා කිරීම් වරින් වර ලිහිල් කිරීමට කටයුතු කරනු ලබන බව මුදල්, ප්‍රාග්ධන වෙළෙඳපොළ හා රාජ්‍ය ව්‍යවසාය ප්‍රතිසංස්කරණ රාජ්‍ය අමාත්‍ය අජිත් නිවාඩ් කබ්රාල් මහතා, මෙයට ප්‍රතිචාර දක්වමින් පැවසීය. තවද මෙරට සාර්ථකව ක්‍රියාත්මක වන මෝටර් බයිසිකල් එකලස් කිරීමේ කර්මාන්තය ඉදිරියේ දී සම්පූර්ණ නිෂ්පාදන කර්මාන්තයක් බවට පත්කිරීමට ද රජය අවශ්‍ය පියවර ගනු ඇති බව රාජ්‍ය අමාත්‍යවරයා වැඩිදුරටත් කියා සිටියේය.

විපක්ෂ නායක සජිත් ප්‍රේමදාස – මෝටර් බයිසිකලය යනු සාමාන්‍ය පවුල්වල සාමාිකයින් විසින් තම එදිනෙදා අවශ්‍යතා ඉටුකර ගැනීමට යොදා ගනු ලබන ජනප්‍රියතම වාහනය වන අතර කුඩා හා මධ්‍යම පරිමාණ ව්‍යාපාරිකයින්ද බහුලව තම ව්‍යාපාරික කටයුතු සඳහා භාවිත කරනු ලබන වාහනයයි. එසේම රජයේ හා පෞද්ගලික අංශයේ සේවකයින් විසින් ද සේවා ස්ථානයට යාමට හා නැවත නිවෙස් බලා ඒමට මොට්ර් බයිසිකල් පාවිච්චි කරනු ලබයි. එපමණක් නොව කොවිඩ්-19 වසංගත තත්ත්වය හමුවේ සීඝ්‍රයෙන් ජනප්‍රිය වූ ආහාර හා භාණ්ඩ නිවෙස් වෙත බෙදාහැරීමේ ව්‍යාපාර සඳහා ද යොදා ගනු ලැබුවේ මෝටර් බයිසිකලයයි. ඒ අනුව කොවිඩ් වසංගතය හමුවේ පසුබෑමට ලක්වූ ග්‍රාමීය නාගරික ආර්ථික නැවත යථා තත්ත්වයට පත් කිරීම සඳහා ඉතා වැදගත් මෙවලමක් වශයෙන් ද මෝටර් බයිසිකලය හැඳින්වීමේ කිසිදු වරදක් නැත. කෙසේ වුවද වර්තමානයේ මොටර් බයිසිකල් ආනයනය සඳහා පනවා ඇති තහනම හේතුවෙන් ග්‍රාමීය මෙන්ම නාගරික ජනතාව මෙන්ම රජයේ හා පුද්ගලික අංශවල සේවකයින් ද දැඩි ලෙස අපහසුතාවයට පත් වී තිබෙනවා. එසේම මොට්ර් බයිසිකල් අලෙවිය තම ජීවනෝපාය කරගත් අලෙවි නියෝජිත ආයතන හිමිකරුවන් හා එම ආයතනවල සේවය කරනු ලබන සේවකයින් ද අන්ත අසරණ තත්ත්වයට පත්වී සිටිනවා. තවද මෝටර් බයිසිකල් ආනයනය කරන ලද සමාගම් විශාල ප්‍රමාණයක් ද තම සේවකයින්ට පඩිනඩි ගෙවීමේ අපහසුතාවයන්ට මුහුණ පාලා තිබෙනවා. මේ හේතුවෙන් දහස් ගණනකගේ රැකියා අහිමි වීමේ තත්ත්වයක් නිර්මාණය වෙලා තිබෙනවා. මේ සම්බන්ධය මහජනතාව විසින් මා වෙත ඉදිරිපත් කරන ලද දුක්ගැනවිලි කිහිපයක් මම සභාගත කරනවා. මීට අමතරව රජයට සැලකිය යුතු බදු ආදායමක් ද අහිමි වෙන අතර බැංකු හා මූල්‍ය සමාගම්වලට ද මෙමගින් ඉතා අහිතකර බලපෑමක් එල්ල වී තිබෙනවා. මෙම ආනයන තහනම ක්‍රියාත්මක කිරීමේ දී හේතුව විදේශ විනිමය පිටතට ගලා යාම වැළැක්වීම බව රජය නියෝජනය කරන ඇතැම් පාර්ශව ප්‍රකාශ කළ ද ආනයන කාලසීමාවන් සැලකීමේ දී ණයවර ලිපි නිකුත් කිරීමෙන් අනතුරුව මුදල් පිටතට යන්නේ අවම වශයෙන් මාස 06 ක කාලසීමාවකට පසුව බැවින් හැකි ඉක්මනින් මෙම තහනම ඉවත් කිරීමේ කිසිදු බාධාවක් නිරීක්ෂණය වන්නේ නැත. මේ කරුණු සම්බන්ධව මෝටර් බයිසිකල් ආනයන සමාගම් විසින් සකස් කරන ලද වාර්තාවන් මම සභාගත කරනවා. එසේම මෙම ආනයන තහනම ඉවත් නොකරන්නේ නම් දේශීය වශයෙන් මෝටර් බයිසිකල් නිෂ්පාදනය කිරීම සඳහා යම් වැඩපිළිවෙලක් පැවතිය යුතු නමුත් එවැනි කිසිදු වැඩපිළිවෙලක් මෙතෙක් ක්‍රියාත්මක කරලා නැහැ. මෙම පසුබිම යටතේ ජාතික වැදගත්කමකින් යුත් හදිසි කාරණයක් වශයෙන් සලකා පහත ප්‍රශ්න සඳහා නිශ්චිත පිළිතුරු හා පැහැදිලි කිරීම් රජයෙන් බලාපොරොත්තු වෙනවා.

1. මෝටර් බයිසිකල් ආනයනය කිරීම සඳහා තහනමක් පැනවීමට හේතු වූ කරුණු මොනවාද? එම තහනම වහාම ඉවත් කිරීමට රජය කටයුතු කරන්නේ ද? නොඑසේ නම් ඊට හේතු මොනවාද?

2. මොටර් බයිසිකල් ආනයනය කිරීම සඳහා පනවා ඇති තහනම හේතුවෙන් සාමාන්‍ය ජනතාව මෙන්ම රජයේ හා පෞද්ගලික අංශයේ සේවකයින් ද, ආනයන සමාගම් සේවකයින් ද, අලෙවි නියෝජිතයින් හා ඔවුන්ගෙන් යැපෙන්නන් ද අන්ත අසරණභාවයට පත්ව ඇති බව රජය පිළිගන්නවා ද? නොඑසේ නම් ඊට හේතු මොනවාද?

3. දේශීය වශයෙන් මෝටර් බයිසිකල් නිෂ්පාදනය කිරීම සඳහා යම් වැඩපිළිවෙලක් රජය සතුව තිබේද? එසේ නම් ඒ සම්බන්ධව මෙම ගරු සභාව දැනුවත් කිරීමට කටයුතු කරන්නේද?

රාජ්‍ය අමාත්‍ය අජිත් නිවාඩ් කබ්රාල් – අපේ රජයෙන් තමයි මීට පෙර නිලධාරීන්ට මෝටර් බයිසිකල් ලබා දුන්නේත්, ඒ නිසා මෝටර් සයිකල්වල තිබෙන වටිනාකමත්, මෝටර් සයිකල් භාවිතය පිළිබඳවත් අපට හොඳ අවබෝධයක් තිබෙනවා. ලෝකයේ සියලු රටවල් කොවිඩ්-19 වසංගතයට ගොදුරු වීමේ ප්‍රතිඵලයක් ලෙස ඒ ඒ රටවල ආර්ථිකයන් මෙන්ම ශ්‍රී ලංකාව ද ආර්ථිකමය වශයෙන් ගැටළු රාශියකට මුහුණ දීමට සිදුව තිබීම නොරහසකි. එවැනි තත්ත්වයක් යටතේ වගකිව යුතු රජයක් ලෙස ක්ෂණික විසඳුම් සෙවීමට කටයුතු නොකළහොත් අපනයන වෙළෙඳ ආදායම සහ විදේශ ශ්‍රමික ප්‍රේෂණ අහිමි වීම තුළ සහ විදේශ ණය ආපසු ගෙවීම යන විදේශ විනිමය අනුපාතයට වන බලපෑම මත සමස්ත ආර්ථිකයම බිඳවැටීමකට ලක්විය හැකිව තිබුණි.

01. ඒ සමඟම එම කරුණු සැලකිල්ලට ගෙන මෝටර් බයිසිකල් ආනයනය පමණක් නොව ඒ අවස්ථාව අනුව තේරා ගත් හදිසි අවශ්‍යතාවයක් නොමැති භාණ්ඩ ගණනාවක් 1969 අංක 01 දරන ආනයන අපනයන පාලන පනත යටතේ ආනයන සීමා කිරීමකට හා ණය පදනම මත ගෙන ඒමේ ක්‍රියාවලියට යටත් කෙරුණි. කෙසේ වුවද විදේශ විනිමය අනුපාතයට දැඩි පීඩනයක් එකවර ඇතිනොවන ආකාරයෙන් සහ දේශීය ආර්ථිකය නැවත සවිබල ගැන්වීමේ ක්‍රමෝපායන්ට යටත්ව මෙම ආනයන සීමා කිරීම්, වරින් වර ලිහිල් කිරීමට රජය පියවර ගෙන ඇති බව 1969 අංක 01 දරන ආනයන අපනයන පාලන පනත යටතේ නිකුත් කර ඇති 2020.04.16, 2020.05.22, 2020.06.30 සහ 2020.07.16 යන ආදී දිනවල නිකුත් කර ඇති සංශෝධිත ගැසට් නිවේදන මගින් සනාථ කෙරේ. ඒ අනුව සමස්ත ආර්ථිකය සමබරව පවත්වා ගැනීමට ගෙන ඇති ක්ෂණික ක්‍රියාමාර්ග ඉදිරියේ දී සමාලෝචනය කිරීමට වර්තමාන රජයට පැහැදිලි දැක්මක් ඇත.

2.  මේ වන විට අපනයන වෙළෙඳපොළට එල්ල වී ඇති බාධාවන් සහ ආනයන සීමාවන් හේතුවෙන් ලංකාවේ පමණක් නොව ලෝකයේ සියලු රටවල ආර්ථිකයන් දැඩි පීඩනයකට භාජනය වී ඇති බව නොරහසකි. එවැනි තත්ත්වයන් තුළ අපේ රටේ සමස්ත ආර්ථිකයම සමබරව පවත්වා ගැනීම සඳහා ඒකායන පරමාර්ථයෙන් සිදුකර ඇති මෙම ආනයන සීමාවන් ඉදිරියේ දී දේශීය ආර්ථිකය රැකගැනීමේ ක්‍රමෝපායන්ට යටත්ව ලිහිල් කළ යුතු බව රජය පිළිගනු ඇත.

3.  දේශීය වශයෙන් මොටර් බයිකල් පමණක් නොව අනෙකුත් වාහන නිෂ්පාදන කර්මාන්තයන් ද දිරිමත් කිරීමට රජය  කිසිවිටෙක පසුබට නොවේ. මන්ද යත් මොටර් බයිසිකල් ආනයනයට 2018 වසරේ රුපියල් බිලියන 42 ක්ද, 2019 වසරේ රු. බිලියන 36 ක් පමණ වැයකර ඇති පසුබිමක දේශීය කර්මාන්ත සඳහා අවශ්‍ය දිරිගැන්වීම් සානුබල සැපයීමට රජය ඉදිරියේ දී කටයුතු කරනු ඇත. දැනටමත් මෝටර් බයිකල් ටයර් ඇතුළු අමතර කොටස් නිෂ්පාදන කර්මාන්ත ධනාත්මක ප්‍රතිඵල පෙන්නුම් කර ඇත. මෙරට සාර්ථකව ක්‍රියාත්මක වන මෝටර් බයිසිකල් එකලස් කිරීමේ කර්මාන්තය ඉදිරියේ දී සම්පූර්ණ නිෂ්පාදන කර්මාන්තයක් බවට පත්කිරීමට ද රජය අවශ්‍ය පියවර ගනු ඇත.

The post පාර්ලිමේන්තුවේ මොටර් බයිසිකල් විවාදය – කබ්රාල්ගෙන් සජිත්ට පිළිතුරු appeared first on Adaderana Biz Sinhala | Sri Lanka Business News.

Source From biz.adaderana
Author: Biz Editor
#SriLanka #News #lka