ජනාධිපතිතුමා කලින් විමසීමක් කළා නම් ඒ සිද්ධිය වෙන්නේ වෙනත් ආකාරයකට – මහ බැංකු අධිපති

පසුගිය ජූනි 16 වෙනි දින ජනාධිපති ගෝඨාභය රාජපක්ෂ මහතා සහ මහ බැංකු නිලධාරීන් අතර පැවති ආන්දෝලනාත්මක රැස්වීමට පෙර මහ බැංකුවේ මුදල් මණ්ඩලය විසින් යම් යම් තීන්දු කිහිපයක් ගෙන තිබූ බවත්, ඒවා ජනාධිපතිතුමාට සන්නිවේදනය කිරීමට අවස්ථාවක් ඊට පෙර නොලැබුණු බව ශ්‍රී ලංකා මහ බැංකු අධිපති මහාචාර්ය ඩබ්.ඩී. ලක්ෂ්මන් මහතා පවසයි. අද (09) ශ්‍රී ලංකා මහ බැංකු මූලස්ථාන පරිශ්‍රයේ පැවති මාධ්‍ය හමුවක දී, මාධ්‍යවේදියෙකු විසින් කළ විමසීමකට ප්‍රතිචාර දක්වමින් මහ බැංකු අධිපතිවරයා කියා සිටියේ, මහ බැංකුව ගෙන ඇති පියවර ප්‍රමාද වීම සම්බන්ධයෙන් ජනාධිපතිතුමන් කලින් විමසීමක් සිදුනොකළ බවත්, එවැනි විමසීමක් සිදුකළා නම් මෙම සිද්ධිය වෙනත් ආකාරයකට සිදුවීමට ඉඩ තිබුණු බවත්ය.

මාධ්‍යවේදියා සහ මහ බැංකු අධිපතිවරයා අතර එහිදී ඇති වූ සංවාදය මෙසේය.

මාධ්‍යවේදියා – ජනාධිපතිතුමාත් සමඟ සාකච්ඡා කළාම, එදා රෑම මුදල් මණ්ඩලය රැස් වුණා.  මුදල් මණ්ඩලය ස්වාධීනව රැස්වෙලා තීන්දු තීරණ අරගෙන නෙමෙයිද ක්‍රියාත්මක වෙන්නේ?

මහ බැංකු අධිපති – මහ බැංකුව රජයේ නියෝජිත ආයතනයක් හැටියට, රජයේ එක් කොටසක් හැටියට මහ බැංකුවට සිදුවෙනවා යම් යම් දේවල් රජය වෙනුවෙන් කරන්න. එතකොට මේ ණය යෝජනා ක්‍රම පිළිබඳව කැබිනට් මණ්ඩලය යම් යම් තීරණ අරගෙන මහ බැංකුවට ක්‍රියාත්මක කිරීම පිණිස දැන්වූවාම අපි සාමාන්‍යයෙන් මුදල් මණ්ඩලය රැස්වෙලා, ඉතාමත්ම උචිත ක්‍රියාමාර්ගය තීරණ්‍ය කරලා, එය ක්‍රියාත්මක කරනවා. අර්බදුකාරී තත්ත්වයක් හැටියට පෙන්නුම් කරන ලද සිද්ධි දාමයේ දී වුණේ, අපි ඒ අදාළ තීරණ ගැනීම සඳහා මුදල් මණ්ඩලය අවස්ථා දෙකක දී දින දෙකක දී විශේෂ රැස්වීම් කැඳවලා සාකච්ඡා කරමින් හිටපු කාලයක් මේක. එක දිනයක ජූනි 11 දා බ්‍රහස්පතින්දා දිනයක්, එදින අපි ඉතා දීර්ඝ වශයෙන් රෑ වෙනතුරු සාකච්ඡා කරලා යම්කිසි ක්‍රියාමාර්ගයක් පිළිබඳ එකඟත්වයකට ඇවිල්ලා හිටියා. එය ක්‍රියාත්මක කරන තීරණයක් හැටියට පත්කර ගැනීම සඳහා මුදල් මණ්ඩලයට යම්කිසි ලියවිල්ලක් ඉදිරිපත් කරලා (Board paper) ඒ් තීරණය ගැනීමට තිබුණේ. අපි තීරණය කරලා තිබුණේ ඊට පස්සේ විශේෂ හදිසි මුදල් මණ්ඩලයක් කැඳවලා ඒ ඉතුරු තීරණ ටික ගන්න. ඒ තීරණ අතරේ තිබුණු එකක් තමයි මිලියන 150 දක්වා ණය මුදල් ප්‍රමාණ්‍ය වැඩි කිරීමට මුදල් නීති පනතේ 83 වෙනි වගන්තිය යටතේ අපි අරගන්න තීරණය කරලා තිබුණු තීරණය. අපි තීරණය කළා ඒ බ්‍රහස්පතින්දා දවසේ ඊළඟ සඳුදා දිනයේ ඒ විශේෂ රැස්වීම කැඳවන්න. සඳුදා රැස්වීම කැඳවන්න තිබුණෞ හවස. ජනාධිපතිතුමා සමඟ සාකච්ඡාව පැවැත්වුණේ අඟහරුවාදා උදේ. සඳුදා ත් අපේ විශේෂ සාකච්ඡාවක් තිබුණා. අඟහරුවාදා තමයි මේ තීරණය ගන්න සාකච්ඡාව කෙරුණේ. එය පත්තරවල වාර්තා වුණේ ජනාධිපතිතුමා අපට කියපු නිසා, හදිසියේ අපි මේ කටයුත්ත කළා කියලා. ඇත්තටම මම කිව්ව විදියට සාකච්ඡා වාර 3ක් පමණ ගිහිල්ලා තමයි මේ තීරණයට අපි ඇවිල්ලා හිටියේ. කණගාටුදායක විදියට මේ සිද්ධිය සිද්ධ වුණා.

මාධ්‍යවේදියා – අධිපතිතුමා, ජූනි 16 තමයි ජනාධිපතිතුමා සමඟ මේ රැස්වීම තිබුණේ. අපි දැක්කේ එම හමුවේ දී ජනාධිපතිතුමා දොස් කියා ගෙන යන බවක්. ජනාධිපතිතුමා ඔබතුමාලගෙන් මේ ගැන ඊට පෙර විමසීමක් කළේ නැද්ද? ජනාධිපතිතුමා ඇහුවේ නැද්ද, ප්‍රමාදයක් තිබෙනවා නම් කොතැනද ප්‍රමාදය තිබෙන්නේ යන වග?

මහ බැංකු අධිපති – ඇත්තවශයෙන් එහෙම විමසීමක් කෙරුණේ නැහැ. විමසීමක් කෙරුණා නම් ඒ සිද්ධිය වෙනත් ආකාරයකට සිද්ධ වෙන්න ඉඩ තිබුණා කියන එක තමයි මම හිතන්නේ. ඊට පස්සේ එහෙම ප්‍රශ්නකාරී කාරණා ඇති වෙන විට, එහෙම අවස්ථා දෙකක දී එහෙම ප්‍රශ්න විසඳා ගත්තා. මම ක්‍රියාත්මක වෙලා, කලින් සාකච්ඡාවක් ලබා ගෙන ජනාධිපතිතුමා සහ අගමැතිතුමා දැනුවත් කිරීමේ ක්‍රමයක් අපි දැන් පටන් අරන් තියෙනවා.

මාධ්‍යවේදියා – ඒ සාකච්ඡාවේ දී ජනාධිපතිතුමා කියා ගෙන ගියායින් පස්සේ හරි ඔබතුමා ඉදිරිපත් වුණේ නැද්ද මහ බැංකුව පැත්තෙන් යම්, මේකයි කියලා පැහැදිලි කරන්න.

මහ බැංකු අධිපති – අපි ඒ සාකච්ඡාව තවදුරට ගෙනියන්න අවශ්‍ය නැහැ. එය දැන් එක්තරා විදියකට නිරවුල් කරගෙන, එක්තරා එකඟතාවයකින් කටයුතු කරනවා කියලා කිව්වොත් ඇති.

The post ජනාධිපතිතුමා කලින් විමසීමක් කළා නම් ඒ සිද්ධිය වෙන්නේ වෙනත් ආකාරයකට – මහ බැංකු අධිපති appeared first on Adaderana Biz Sinhala | Sri Lanka Business News.

Source From biz.adaderana
Author: Biz Editor
#SriLanka #News #lka