ශ්‍රී ලංකාව වෙත චීන සංචාරකයන්ගේ පැමිණීම ඉහළ නැංවීම සඳහා සහ රජය සතු ව්‍යවසාය ඇතුළුව වැඩි ව්‍යාපාර සංඛ්‍යාවක් කොළඹ වරාය නගරයේ සහ හම්බන්තොට කර්මාන්ත කලාපයේ ආයෝජනය කරවීම සඳහා දරන ප්‍රයත්නවලට චීන විදේශ කටයුතු අමාත්‍යාංශය කාර්යශීලී ලෙස සහය දක්වනු ඇත. චීනයේ ආධාර ලද මෙම ව්‍යාපෘති දෙක බිම් මට්ටමෙන් ඉහළ නැංවීම සඳහා සුදුසු කාලය එළඹ ඇති බව ලුවෝ මහතා පිළිගත්තේය. දෙරට අතර ද්විපාර්ශ්වික නිදහස් වෙළඳ ගිවිසුමට කඩිනමින් එළඹීමේ අරමුණින් යුතුව ඒ පිළිබඳ සාකච්ඡා නැවත ආරම්භ කිරීම, ශ්‍රී ලංකාවට වාසිදායක වනු ඇති බවට දෙපාර්ශ්වයම එකඟ විය. ආචාර්ය කොහොන මහතා, ශ්‍රී ලංකාවේ ස්වාභාවික, කෘෂිකාර්මික හා කාර්මික නිෂ්පාදන රැසකට චීනයේ ලාභදායී වෙළඳපොළ වෙත පිවිසීම සඳහා බාධා පමුණුවන තීරුබදු නොවන බාධක පිළිබඳ ගැටළුව ද මතු කළේය.
ප්‍රධාන තිරසාර සංවර්ධන ඉලක්කවලට අනුකූලව කටයුතු කරමින්, 2020 වන විට අන්ත දිළිඳුභාවය සාර්ථක ලෙස පිටුදැකීම පිළිබඳව චීනයට ප්‍රශංසා කළ ආචාර්ය කොහොන මහතා, සිය වසක සංවත්සරය සැමරූ චීන කොමියුනිස්ට් පක්ෂය වෙත සිය සුබපැතුම් පිරිනැමීය. පක්ෂය විසින් සිදුකරන ලද රටේ දූරදර්ශී කළමනාකරණය, චීනයේ විශ්මයජනක සාර්ථකත්වය සඳහා හේතු වී තිබේ.
The post චීන – ශ්‍රී ලංකා ද්විපාර්ශවික නිදහස් වෙළෙඳ ගිවිසුමකට සාකච්ඡා කඩිනමින් appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka