මෙරට කොරියානු තානාපති වුන්ජින් ජියොන්ග් මහතා සහ අග්‍රාමාත්‍ය මහින්ද රාජපක්ෂ මහතා අතර හමුවක් ඊයේ (2020.10.23) අරලියගහ මන්දිරයේදී පැවැත්විණි.
මෙම හමුවේදී ශ්‍රී ලංකාව “ආරක්ෂිත රටක්” ලෙස පැවසූ කොරියානු තානාපති වුන්ජින් ජියොන්ග් මහතා ශ්‍රී ලංකාවේ ආයෝජනය කිරීමට ඉදිරිපත්වන්නැයි කොරියානු ආයෝජකයන්ට ආරාධනා කළේය.
දශක කිහිපයකට පෙර කොරියාව මෙරට විශාලතම ආයෝජකයෙකි. මේ වන විට කොරියානු සමාගම් 115 කට වැඩි ප්‍රමාණයක් රට තුළ ක්‍රියාත්මක වන අතර දෙරට අතර සමස්ත වෙළඳාම පසුගිය වසරේදී ඇමරිකානු ඩොලර් මිලියන 327 ක් ඉක්මවිය. මෙම වෙළඳාම තවත් ඉහළ දැමීම සඳහා රටවල් දෙකම උනන්දුවෙයි.
පසුගිය මහ මැතිවරණයෙන් ලැබූ ජයග්‍රහණය පිළිබඳව මෙම හමුවේදී තානාපති ජියොන්ග් මහතා අග්‍රාමාත්‍ය මහින්ද රාජපක්ෂ මහතාට සුබ පැතුම් එක් කළ අතර රජයට ලැබුණු ජනවරමට හේතු වූයේ විශ්වාසනීය බැඳීම බව සඳහන් කළේය.
කොවිඩ් – 19 වසංගතය පාලනය කිරීම පිළිබඳව රජයට ප්‍රශංසා කළ තානාපති වුන්ජින් ජියොන්ග් මහතා, කොවිඩ්-19 අර්බුදයට සාර්ථකව මුහුණ දීම සඳහා කොරියානු රජය ශ්‍රී ලංකාවට නිරත්තර සහයෝගය ලබා දෙන බව පැවසීය.
ශ්‍රී ලංකාව සහ කොරියාව අතර ඉදිරියේදී ද්විපාර්ශවීය සහයෝගීතාව වර්ධනයකරගත හැකි සෘජු විදෙස් ආයෝජන, අපනයන, සංචාරක සහ සංක්‍රමණික සේවකයන් පිළිබඳව මෙහිදී සාකච්ඡාවට ලක්විය.
කොරියානු අග්‍රාමාත්‍ය චුන්ග් සයි-කියුන් මහතා සමඟ කළ දුරකථන ඇමතුම සිහිපත් කළ අග්‍රාමාත්‍ය මහින්ද රාජපක්ෂ මහතා කොරියානු අග්‍රාමාත්‍යවරයාට ප්‍රථම වරට ශ්‍රී ලංකාවේ සංචාරය කරන ලෙස කළ ආරාධනය තානාපති වුන්ජින් ජියොන්ග් මහතා සමග නැවත සිහිපත් කළේය.
කොරියානු අග්‍රාමාත්‍යවරයා ශ්‍රී ලංකාවට පැමිණීමට උනන්දුවක් දක්වන බව සඳහන් කළ තානාපති ජියොන්ග් මහතා, “අපි සැමවිටම සමීප මිතුරන් වන්නෙමු.”යැයි මෙම හමුවේදී විශ්වාසය පළ කළේය.
The post කොරියානු තානාපති අගමැති හමුවෙයි. ශ්‍රී ලංකාවේ ආයෝජනයට කොරියානු ආයෝජකයන්ට ආරාධනා appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka