Euromoney විසින් මෙම ගෞරවණීය සම්මානය කොමර්ෂල් බැංකුවට පිරිනැමූ හයවන අවස්ථාව මෙය වේ.
මෙම ගෞරවණීය සම්මානය ලබාදෙන්නේ යුරෝමනී සඟරාවේ කර්තෘවරුන්, ජනමාධ්‍යවේදීන් සහ සමීක්ෂණ කණ්ඩායම විසින් කළාපයේ බැංකුකරණය සහ ප‍්‍රාග්ධන වෙළඳපොළ පිළිබඳව වසර පුරා සිදුකරන පුළුල් සමීක්ෂණය සහ වෙළඳපොළ සාමාජිකයින්ගේ සවිස්තරාත්මක තොරතුරු පාදක කර ගනිමිනි.
මෙම සම්මානය ලබාදීම සඳහා ලාභදායීතාවය, වර්ධනය විදහා දැක්වීමට තිබෙන හැකියාව, තරඟකාරී ආයතන අභිබවා යෑම, වෙනස්වන වෙළඳපොළ තත්ත්වයන්ට සහ ගනුදෙනුකරුවන්ගේ අවශ්‍යතාවයන්ට අනුගතවීමට තිබෙන හැකියාවද සැලකිල්ලට ගනී.
මෙහිදී, සෑම බැංකුවක් විසින්ම සලකා බැලීම සඳහා පසුගිය මාස 12 ක කාලය තුළ බැංකුවේ කාර්ය සාධනය ඉදිරිපත් කළ යුතු අතර උපාය මාර්ගික ඉලක්ක ජයගැනීමේ හැකියාව සහ පෙර නිවේදනය කර තිබෙන වැඩසටහන් සංධිස්ථානයන් කරා රැගෙන යන ආකාරය ඉදිරිපත් කළ යුතුය.
මූල්‍ය කාර්ය සාධනය මෙන්ම බැංකුවේ ඩිජිටල් බැංකුකරණ උපාය මාර්ගය පිළිබඳ තොරතුරු, සයිබර් ආරක්ෂාව සහ ආයතනික සමාජ වගකීම පිළිබඳව තොරතුරුද මෙහිදී සැලකිල්ලට ගෙන තිබේ.
2019 වසර අවසන් වනවිට බැංකුවේ සමස්ත වත්කම් ප‍්‍රමාණය රුපියල් ටි‍්‍රලියන 1.4 ක් වීම, රුපියල් බිලියන 150 ක දළ ආදායමක් ලබාගැනීම, රුපියල් බිලියන 17.4 ක ශුද්ධ ලාභයක් වාර්තා කිරීම, රුපියල් ටි‍්‍රලියන 1.07 ක තැන්පතු පදනමක් වාර්තා කිරීම සහ රුපියල් බිලියන 930.7 ක ශුද්ධ ණය සහ ලැබීම් වලට හිමිකම් කීමද මෙම ජයග‍්‍රහණය සඳහා ධනාත්මක ලෙස බලපා ඇත.
ශ‍්‍රී ලංකාවේ සියළුම පුද්ගලික වාණිජ බැංකු සමග සැසඳීමේදී වැඩිම ලාභදායීතාවය, ඉහළම ණය වර්ගීකරණය, ඉහළම තැන්පතු පදනම, වැඩිම ණය කළඹ සහ සාමාන්‍ය කොටස්කරුවන්ගේ අරමුදල් වලට වැඩිම ප‍්‍රතිලාභය වාර්තා කිරීමට කොමර්ෂල් බැංකුව සමත්ව තිබේ. මීට අමතරව, වත්කම් අනුව ගත්කළ කොමර්ෂල් බැංකුව මෙරට විශාලතම පුද්ගලික අංශයේ බැංකුව වන අතර මෙරට වැඩිම ප‍්‍රාග්ධන වෙළඳපොළකරණයක් සහ හොඳම CASA අනුපාතයත් වාර්තා කරයි. එසේම, සමස්තයක් ලෙස ගත්විට 2019 වසරේ මෙරට තෙවන විශාලතම ලැයිස්තුගත සමාගම වන්නේද කොමර්ෂල් බැංකුවයි.
ලෝකයේ හොඳම බැංකු 1000 අතරට නම් වූ ප‍්‍රථම දේශීය බැංකුව සහ පිට පිටම දස වතාවක් එසේ නම් වූ එකම ශ‍්‍රී ලාංකේය බැංකුව වන කොමර්ෂල් බැංකුව 2020 වසරේදී සියවස සමරයි. කොමර්ෂල් බැංකුව මෙරට බැංකු ශාඛා 268 ක් සහ ස්වයංක‍්‍රීය ටෙලර් යන්ත‍්‍ර 873 ක් පවත්වාගෙන යයි. බැංකුව 2019 වසරේදී ජාත්‍යන්තර සහ දේශීය සම්මාන 50 කට වැඩි ප‍්‍රමාණයක් දිනා ගැනීමට සමත්ව තිබේ.
බංග්ලාදේශය තුළ ශාඛා 19 ක් ද මියන්මාරයේ යැන්ගොන්හි, නියෝජිත කාර්යාලයක් සහ නේ පයිටව් හි, ක්ෂුද්‍ර මූල්‍යන සමාගමක් මෙන්ම මාලදිවයින තුළ බහුතර කොටස් හිමිකාරීත්වයෙන් යුතු පළමු පෙළ බැංකුවකින් සමන්විත විදේශීය මෙහෙයුමක් පවත්වාගෙන යන ශ‍්‍රී ලංකාවේ එකම පුද්ගලික වාණිජ බැංකුව කොමර්ෂල් බැංකුව වේ.
The post කොමර්ෂල් බැංකුව 2020 වසරේ ශ‍්‍රී ලංකාවේ හොඳම බැංකුව ලෙස යුරෝමනී විසින් තෝරාගනී appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka