කොමර්ෂල් බැංකුව කලාපීය වෙළෙඳාම ප‍්‍රවර්ධනය කිරීම සඳහා ඉන්දියානු රුපියල් Nostro ගිණුමක් විවෘත කරයි

ශ‍්‍රී ලංකාව සහ ඉන්දියාව අතර වෙළෙඳ ගණුදෙනු උදෙසා පහසුකම් සැලසීම සඳහා, වසර 116ක් ඉපැරැණි මුම්බායිහි පිහිටි ඉන්දීය බැංකුවේ ඉන්දියානු රුපියල් ‘නොස්ට්‍රෝ’ ගිණුමක් ආරම්භ කර ඇති බැව් කොමර්ෂල් බැංකුව නිවේදනය කර ඇත.
සාර්ක් කලාපයේ වෙළෙඳාම සහ සංචාරක ප‍්‍රවර්ධනය සඳහා ශ‍්‍රී ලංකා මහ බැංකුව විසින් ඉන්දියානු රුපියල නම් කරන ලද විදේශ මුදල් වර්ගයක් ලෙස වර්ගීකරණය කිරීමෙන් පසුව මෙම තීරණය ගත් බැව් කොමර්ෂල් බැංකුව පවසයි. ඉන්දියානු රුපියල්වලින් ‘නොස්ට්‍රෝ’ ගිණුමක් පිහිටුවීමෙන් දෙපාර්ශවයටම ප‍්‍රයෝජනවත් වන පරිදි, ශ‍්‍රී ලංකා සහ ඉන්දියානු ආනයනකරුවන්ට සහ අපනයනකරුවන්ටද ඉන්දියානු රුපියල්වලින් වෙළෙඳ ගණුදෙනු කිරීමට හැකියාව ලබා දීමේ ප‍්‍රයත්නයන්ට බැංකුව මෙලෙස සහාය දක්වයි.

මෙම මුලපිරීම පිළිබඳව අදහස් දක්වමින් කොමර්ෂල් බැංකුවේ කළමනාකාර අධ්‍යක්‍ෂ සහ ප‍්‍රධාන විධායක නිලධාරි සනත් මනතුංග මහතා මෙසේ පැවැසීය. ‘ශ‍්‍රී ලංකා ආර්ථිකය මුහුණ දෙන අභියෝගාත්මක පසුබිමක, වෙළෙඳාම සඳහා ඉන්දියානු රුපියල් පහසුවෙන් භාවිත කිරීමට ඇති හැකියාව නිසා, මෙහිදී කාලානුරූපීව වෙළෙඳාම් කටයුතුවල ඉහළ යෑමක් සිදුවනු ඇත. දේශීය අපනයන මෙන්ම ආනයන සඳහා විශාලතම මූල්‍ය පහසුකම් සපයන්නකු ලෙස කොමර්ෂල් බැංකුව මෙම ‘නොස්ට්‍රෝ’ ගිණුම හරහා සැලකිය යුතු දායකත්වයක් ලබා දීමට හොඳින් ස්ථානගතවී තිබෙනවා’ යැයි ඔහු ප‍්‍රකාශ කළේය.
කොමර්ෂල් බැංකුව දැනට රටවල් 20ක පිහිටා ඇති ගනුදෙනුකාර බැංකු 30ක් සමග මුදල් වර්ග 15කින් ‘නොස්ට්‍රෝ’ ගිණුම් පවත්වාගෙන යන අතර, බැංකු ආයතනික ගණුදෙනුකරුවන් සඳහා ජාත්‍යන්තර වෙළෙඳාමට පහසුකම් සැලසීමට භූගෝලීය වශයෙන් පුළුල් වේදිකාවක්ද සපයයි.

ශ‍්‍රී ලංකාවේ පරිසරයට කාබන් මුදාහැරීම 100% තුලනය කළ ප‍්‍රථම බැංකුව සහ ලෝකයේ හොඳම බැංකු 1000 අතරට පත්වු පළමු බැංකුව මෙන්ම පිට පිට 12 වතාවක් එසේ තේරී පත්වූ එකම ශ‍්‍රී ලාංකේය බැංකුව කොමර්ෂල් බැංකුව වන අතර මේ වනවිට දිවයින පුරා බැංකු ශාඛා 269 ක් සහ ස්වයංක‍්‍රීය යන්ත‍්‍ර 943 ක් ක‍්‍රියාත්මක කරයි. ශී‍්‍ර ලංකාවේ සුළු සහ මධ්‍යම පරිමාණයේ ව්‍යාපාර වලට විශාලතම ණය සම්පාදනය කරන්නා මෙන්ම දේශීය බැංකු ක්ෂේත‍්‍රයේ ඩිජිටල් නව්‍යකරණය සඳහා ප‍්‍රමුඛයෙකු වන කොමර්ෂල් බැංකුව බංග්ලාදේශය තුළ ශාඛා 19 ක් ද මියන්මාරයේ නේ පයිටව් හි, ක්ෂුද්‍ර මූල්‍යන සමාගමක් මෙන්ම මාලදිවයින තුළ බහුතර කොටස් හිමිකාරීත්වයෙන් යුතු පළමු පෙළ බැංකුවකින් සමන්විත විදේශීය මෙහෙයුමක් පවත්වාගෙන යන ශ‍්‍රී ලංකාවේ එකම පුද්ගලික වාණිජ බැංකුව ද වේ.

The post කොමර්ෂල් බැංකුව කලාපීය වෙළෙඳාම ප‍්‍රවර්ධනය කිරීම සඳහා ඉන්දියානු රුපියල් Nostro ගිණුමක් විවෘත කරයි appeared first on Adaderana Biz Sinhala | Sri Lanka Business News.

Source From biz.adaderana
Author: Biz Editor
#SriLanka #News #lka