‘කප්රුක‘ කොටස් වෙළෙඳපොළට

කප්රුක සමාගම තම මූලික කොටස් නිකුතුවට පෙර සිය සාර්ථකත්වය ප්‍රකාශයට පත් කරයි

ගෝලීය වශයෙන් සේවා සපයන ශ්‍රී ලංකාවේ විශාලතම දේශීය විද්‍යුත් වාණිජ්‍ය (E – Commerce) සමාගම වන ‘කප්රුක’ සමාගම ඉදිරියේ දී සිදුකිරීමට නියමිත මූලික කොටස් නිකුතුවට පෙර සිය සාර්ථකත්වයේ ගමන් මග සහ ආයතනික ජයග්‍රහණයන් පිළිබඳව ජනතාව දැනුවත් කිරීම සඳහා අවධානය යොමු කොට තිබේ.

කප්රුක නිර්මාතෘ දුලිත් හේරත් මහතා විසින්, ඩොලර් 1,000 ට අඩු ප්‍රාග්ධනයක් සමඟින්, 2002 වසරේ දී ආරම්භ කරන ලද කප්රුක  ආයතනය වර්තමානය වන විට  විශාලතම දේශීය විද්‍යුත් වාණිජ්‍ය සමාගම් අතර ප්‍රමුඛ ස්ථානයක් උසුලයි. එය අද වන විට කිසිදු බාහිර ආයෝජකයෙකු නොමැතිව, නවතම විද්‍යුත්-වාණිජ්‍ය ආකෘතියක් භාවිත කරමින් දේශීය සහ විදේශගත ශ්‍රී ලාංකික ගනුදෙනුකරුවන්ට විවිධාංගීකරණය වූ සේවාවන් රැසක් සපයන, රුපියල් බිලියන ගණනක වටිනාකමකින් යුත් ආයතනයකි. Amazon.com වැනි ගෝලීය දැවැන්තයින් සමග කටයුතු කරන කප්රුක සමාගම දේශීය නිෂ්පාදකයින් සහ අලෙවිකරුවන් විශාල සංඛ්‍යාවකට ද සිය වෙබ් අඩවිය තුළින් ගෝලීය වෙළෙඳපොළ අවස්ථා විවර කරදීමට සමත් වී ඇත.  කප්රුක සමාගම වර්තමානයේ දී  නිෂ්පාදන 135,000 කට අධික ප්‍රමාණයක් අලෙවි කරන අතර, එම සමාගම කීර්තිමත් සන්නාමයන් 500කට අධික සංඛ්‍යාවක් සමඟ හවුල්කාරිත්වයන් ගොඩනගාගනිමින්, විදේශගත සේවාදායකයින් මිලියන 1.1 කට අධික ප්‍රමාණයකට සේවා සපයයි. කප්රුක සමාගම සතුව වර්ග අඩි 32,000කට අධික වපසරියකින් යුත්  ගබඩා පහසුකම් සහ වාහන 100කට වැඩි ප්‍රමාණයක් සහිත කාර්‍යක්ෂම බෙදාහැරීම් ජාලයක්ද පවතී. එමෙන් ම  කප්රුක සිය සාර්ථක ගමන් මග තුළ ගෝලීය සහ දේශීය වශයෙන් ඇගයීම් රාශියකට හිමිකම් ලබා ඇත.

Amazon, Etsy, eBay සහ Walmart වැනි ගෝලීය සේවාවන් තුළ Dilmah, Samahan සහ Akbar Tea වැනි මෙරට ප්‍රමුඛතම සන්නාමයන් සඳහා ගෝලීය වෙළෙඳපොළක් නිර්මාණය කරන නිසා ම වර්තමානයේ  අපනයනය වෙත  යොමු වී ඇති පුරෝගාමී දේශීය විද්‍යුත් වාණිජ්‍ය වෙබ් අඩවිය ලෙස කප්රුක හඳුන්වා දිය හැකි ය. බේකරි අයිතම, මල් සැකසුම් මෙන් ම  තවත්  නිෂ්පාදනයන් රැසක් කප්රුක සන්නාමය යටතේ වෙළෙඳපොළ වෙත නිකුත්වන බව ද පැවසිය යුතු ම කරුණකි. ජංගම දුරකථන මගින් සහ ක්‍රිප්ටෝ මුදල් ඇතුළු අනෙකුත් සියලු ම ගෙවීම් ක්‍රමවේදයන් මගින් ගෙවීමේ හැකියාව ලබා දීම සහ දැරිය හැකි බෙදාහැරීමේ ගාස්තු නිසා Kapruka.com මෙරට තරුණ තරුණියන් අතර වඩාත් ජනප්‍රිය ය.  ‘කප්රුක Global Shop Services’ සේවාව හරහා  ජාත්‍යන්තර වෙළෙඳපොළ වෙත පිවිසෙමින් ඇමරිකා එක්සත් ජනපදය, එක්සත් රාජධානිය සහ ඕස්ට්‍රේලියාව වැනි  රටවල් ගණනාවක් සමග කටයුතු කරන කප්රුක සමාගම එම රටවල සිය කාර්යාල පවත්වාගෙන යන අතර, එහි මෙහෙයුම් කටයුතු තවදුරටත් පුළුල් කිරීමට අදහස් කරයි.

කප්රුක සමාගමේ පුළුල් ආයතනික ගමන් මග පිළිබඳව අදහස් දක්වමින්, එම සමාගමේ නිර්මාතෘ සහ සභාපති දුලිත් හේරත් මහතා අදහස් දැක්වුවේ මේ අයුරිණි. “පසුගිය වසර 19 තුළ අපි අපගේ පාරිභෝගිකයින් වෙත ගුණාත්මක බවින් ඉහළ පාරිභෝගික සේවාවක් ලබා දීමට කටයුතු කළා.  ඒ වගේ ම එම සේවාවන් ජාත්‍යන්තර වෙළෙඳපොළ දක්වා ව්‍යාප්ත කරමින්, දේශීය අලෙවිකරුවන්ට ඉතා හොඳ ජාත්‍යන්තර වෙළෙඳපොළක් නිර්මාණය කිරීමටත් අපට හැකියාව ලැබුණා.  භාණ්ඩයක් මිල දී ගැනීමේ ඉඳල බෙදා හැරීම දක්වා ගුණාත්මක සහ කාර්‍යක්ෂම සේවාවක් මගින් පාරිභෝගික තෘප්තිය  තහවුරු කිරීමට අපි නිරන්තරයෙන් කටයුතු කරනවා. මේ නිසා ම අපගේ ජාත්‍යන්තර තලයේ  විද්‍යුත් වාණිජ්‍ය සේවාව ඊළඟ අදියර වෙත ගෙන යමින්, අපගේ සමාගම වෙත ආයෝජනය කිරීමේ අවස්ථාව මහජනතාව වෙත ලබා දීම සඳහා  මූලික කොටස් නිකුතුවක් සිදු කිරීමට අපි කටයුතු සූදානම් කරල තිබෙනවා. ”

කප්රුක සමාගම කොළඹ කොටස් වෙළෙඳපොළේ (CSE) මූලික කොටස් නිකුතුව හරහා  රුපියල් මිලියන 505.5ක් රැස් කිරීමට  අපේක්ෂා කරන අතර, එය සමාගමේ තාක්ෂණ සහ යටිතල පහසුකම් වැඩිදියුණු කිරීමටත් නව ව්‍යාපෘති දියත් කිරීමටත් යෙදවීම සමාගමේ අරමුණයි. කප්රුක සමාගම CSE හි ප්‍රධාන පුවරුව තුළ ලැයිස්තුගත කිරීමට අපේක්ෂිත අතර, සියලු අරමුදල් සමාගමේ වර්ධනය හා ව්‍යාප්තිය උදෙසා යෙදවීමට කප්රුක අපේක්ෂා කරයි.

The post ‘කප්රුක‘ කොටස් වෙළෙඳපොළට appeared first on Adaderana Biz Sinhala | Sri Lanka Business News.