උතුරු මැද පළාත් සභාවේ තාක්ෂණික නිලධාරීන්ගේ කුසලතා සංවර්ධනයට INSEE සිමෙන්ති සමාගමේ සහාය ලබාදෙයි

දිවයිනේ ප්‍රමුඛතම සිමෙන්ති නිෂ්පාදන සමාගම වන, INSEE සිමෙන්ති සමාගම සහ උතුරු මැද පළාත් සභාව අතර සුවිශේෂී අවබෝධතා ගිවිසුමකට පසුගියදා අත්සන් තැබුණි. මෙම අවබෝධතා ගිවිසුම යටතේ INSEE සිමෙන්ති සමාගම විසින් වැඩිදියුණු කරන ලද සහ අතිශය සාර්ථකත්වයට පත්, ‘INSEE කුසලතා සංවර්ධන වැඩසටහන‘ උතුරුමැද පළාත් සභාවේ තාක්ෂණික නිලධාරීන්ට පිරිනැමීමට නියමිත ය.

උතුරු මැද පළාත් සභාව නියෝජනය කරමින් එහි ප්‍රධාන ලේකම් එච්.එම්.පී. බණ්ඩාර සහ INSEE සිමෙන්ති සමාගම නියෝජනය කරමින් එහි විධායක උප-සභාපති හා අධ්‍යක්ෂ -විකුණුම්, අලෙවි හා නවෝත්පාදන යාන් කුනික් යන මහත්වරු මෙම අවබෝධතා ගිවිසුමට අත්සන් තැබූහ. උතුරු මැද පළාත් ආණ්ඩුකාර මහීපාල හේරත් මහතා ද, පළාත් සභාවේ නියෝජ්‍ය ප්‍රධාන ලේකම්, අධ්‍යක්ෂවරු, ප්‍රධාන ඉංජිනේරුවන්, ඉංජිනේරුවන් සහ තාක්ෂණික නිලධාරීන් ඇතුළු පිරිසක් ද එම අවස්ථාවට එක්ව සිටියහ.

ඒ අනුව INSEE සිමෙන්ති සමාගමේ කුසලතා සංවර්ධන වැඩසටහන හරහා ප්‍රතිලාභ ලබන හයවැනි පළාත් සභාව බවට උතුරුමැද පළාත් සභාව පත්විය. මෙසේ උතුරු මැද පළාත් ප්‍රධාන ලේකම් කාර්යාලය සමඟ සහයෝගයෙන්, මාස 6ක් ඇතුළත පළාත නියෝජනය කරන තාක්ෂණික නිලධාරීන් 200 දෙනෙකු පුහුණු කිරීමට INSEE සිමෙන්ති සමාගම අපේක්ෂා කරයි.

“යටිතල පහසුකම් සහ නාගරික සංවර්ධන ක්ෂේත්‍රයේ විශාල විභවතාවක් ඇති උතුරු මැද පළාතේ තාක්ෂණික නිලධාරීන් වෙනුවෙන්, අපගේ කුසලතා සංවර්ධන වැඩසටහන හඳුන්වාදීමට ලැබීම පිළිබඳව අපි මහත් සතුටට පත්වෙනවා. අපි ඉදිරියට යාමේදී දේශීය කර්මාන්තයේ පදනම ශක්තිමත් කරගැනීම අනිවාර්යයෙන්ම කළ යුතු දෙයක්. විශේෂයෙන්ම ඉදිකිරීම් කර්මාන්ත අංශයේ පෙරගමන්කරුවෙකු හැටියට අනාගත ප්‍රගතිය කරා යන ගමනේදී ඉදිකිරීම් ක්ෂේත්‍රයට සම්බන්ධ සෙසු පාර්ශ්වකරුවනුත් අප සමඟ ඉදිරියට ගෙනයාමේ වගකීමක් අප සතුයි“, යනුවෙන් මේ පිළිබඳ අදහස් දක්වමින්  යාන් කුනික් මහතා ප්‍රකාශ කළේය.

රජයේ ප්‍රසම්පාදන, ඉදිකිරීම් අමුද්‍රව්‍යවල තත්ත්ව පාලනය, පරීක්ෂණ කටයුතු, ඉදිකිරීම් කළමනාකාරීත්වය, ආරක්ෂණය, සිමෙන්ති සහ කොන්ක්‍රීට් භාවිතය මෙන්ම හරිත ඉදිකිරීම් ආදී ක්‍රියාවලීන්හි නිරතව සිටින තාක්ෂණික නිලධාරීන්ගේ කුසලතා වැඩිදියුණු කිරීම සහ දැනුම වර්ධනය කිරීම හරහා, දේශීය ඉදිකිරීම් කර්මාන්තයේ උන්නතිය වෙනුවෙන්, INSEE සිමෙන්ති සමාගම මෙම වැඩසටහන ක්‍රියාවට නංවයි.

The post උතුරු මැද පළාත් සභාවේ තාක්ෂණික නිලධාරීන්ගේ කුසලතා සංවර්ධනයට INSEE සිමෙන්ති සමාගමේ සහාය ලබාදෙයි appeared first on Adaderana Biz Sinhala | Sri Lanka Business News.

Source From biz.adaderana
Author: Biz Editor
#SriLanka #News #lka