ශ්‍රී ලංකාවේ සහල් ක්ෂේත්‍රය නංවාලීමට එක්සත් ජාතීන්ගේ සහාය

එක්සත් ජාතීන්ගේ ආහාර හා කෘෂිකර්ම සංවිධානය (FAO), ශ්‍රී ලංකාවේ කෘෂිකර්ම දෙපාර්තමේන්තුව සහ මහවැලි අධිකාරිය (MASL) සමඟ සහයෝගයෙන්, 2021-2022 දී අඛණ්ඩව කන්න දෙකක දුර්වල අස්වැන්න හේතුවෙන් ආහාර සුරක්ෂිතතාවයට ඇතිවූ තර්ජනයට පිළියම් යෙදීම පිණිස, යුරෝපා සංගමයේ (EU) අරමුදල්වල සහාය  ඇතිව තීරණාත්මක පියවර ගනිමින් සිටී. 2022 දී වී නිෂ්පාදනයේ 40% කට ආසන්න පහත වැටීමක් සමඟ, ශ්‍රී ලංකාවේ සහල් ආශ්‍රිත පරිසර පද්ධතිය අවදානමට ලක්විය හැකි අතර කඩිනම් අවධානයක් අවශ්‍ය වේ.

මෙම ගැටලුව  මැඩලීම සඳහා, FAO විසින් යුරෝපීය සංගමයෙන් (EU) යුරෝ මිලියන 4ක අරමුදල් ඇතිව RiceUP නමින් නව්‍ය ව්‍යාපෘතියක් ආරම්භ කර ඇත. මෙම ව්‍යාපෘතියේ කොටසක් ලෙස, FAO සහ එහි හවුල්කරුවන් විසින් දිස්ත්‍රික්ක හතරක: (අම්පාර, බදුල්ල, හම්බන්තොට සහ පොළොන්නරුව), කෘෂිකර්ම ව්‍යාප්ති නිලධාරීන් (AEOs) සඳහා ඒකාබද්ධ ශාක පෝෂක කළමනාකරණය (IPNM) පිළිබඳ පුහුණු වැඩසටහන් පවත්වනු ලබයි.

AEOවරුන් (කෘෂිකර්ම ව්‍යාප්ති නිලධාරීන්) IPNM පිළිබඳව පුහුණු කිරීම මඟින් ඔවුන්ගේ අසල දිස්ත්‍රික්කවල වී ගොවීන් සමඟ කෘෂිකර්මාන්තයේ යහ භාවිතයන් බෙදා ගැනීමට අවශ්‍ය කුසලතා සහ දැනුමෙන් ඔවුන් සන්නද්ධ කෙරෙනු  ඇත. මෙම නිලධාරීන්, පාංශු කළමනාකරණය සහ රසායනික යැපීම අඩු කරමින් භෝග අස්වැන්න ඉහළ නැංවීම සඳහා කාබනික සහ රසායනික පොහොර ප්‍රශස්ත ලෙස භාවිතා කිරීම කෙරෙහි අවධානය යොමු කරන IPNM භාවිතයන් ක්‍රියාත්මක කිරීම සඳහා මාර්ගෝපදේශ සපයනු ලබන ,ගොවීන් හට මූලික වශයෙන් සම්බන්ධ විය හැකි ස්ථානය ලෙස කටයුතු කරනු ඇත.

කෘෂිකර්ම ව්‍යාප්ති නිලධාරීන් (AEOs) සඳහා IPNM භාවිතයන් පිළිබඳ මූලික පුහුණු සැසිය අද දින බතලේගොඩ සහල් පර්යේෂණ හා සංවර්ධන ආයතනයේදී ආරම්භ විය. තෝරාගත් දිස්ත්‍රික්කවලින් AEOවරුන් 300ක් පුහුණු කිරීම ඉලක්ක කර ගනිමින් මෙම සැසිය පුහුණු වැඩසටහන් පහකින් යුත් සැසි මාලාවක ආරම්භය සනිටුහන් කරයි. ජාත්‍යන්තර සහ ජාතික උපදේශකවරුන්, කෘෂිකර්ම දෙපාර්තමේන්තුව, MASL සහ පේරාදෙණිය විශ්වවිද්‍යාලය සමඟ සහයෝගයෙන් සකස් කරන ලද පුහුණු අත්පොත, මෙම පුහුණු සැසිවල අත්තිවාරම ලෙස ක්‍රියා කරයි.

IPNM යනු පසෙහි ගුණාත්මක බව සහතික කරන, හායනය වළක්වන සහ පරිසරය ආරක්ෂා කරමින් බෝග ඵලදායිතාව උපරිමය දක්වා ගෙන එන  තිරසාර භූමි කළමනාකරණ පිළිවෙතකි. FAO විසින් IPNM හඳුන්වාදීමත් ,  ඒ සමගම තෝරාගත් දිස්ත්‍රික්කවල කුඩා වතු හිමියන්ට යූරියා පොහොර ලබාදීමත්, අත්‍යවශ්‍ය පොහොර සපයා ගැනීමේදී සහ ආහාර සුරක්ෂිතතාව පවත්වා ගැනීමේදී   කුඩා වතු ගොවීන් මුහුණ දෙන අභියෝගවලට පිළියමකි.IPNM වෙත යොමු වීමෙන් සහ යූරියා පොහොර වෙත  යොමු වීමෙන්, කුඩා වී ගොවීන්ට පිරිවැය අඩුකර ඵලදායිතාව වැඩිදියුණු කරගත හැකිවන අතර, එමඟින් වඩාත් හොඳින් ලාභ ඉපැයීමටත් හදිසි තත්ත්වයන්ට ඔරොත්තු දීමේ  හැකියාවත් උදාවේ.

පොහොර සහ ගුණාත්මක බීජ සුරක්ෂිත හා කාර්යක්ෂම භාවිතය ඇතුළු තිරසාර කෘෂි පිළිවෙත් ක්‍රියාවට නැංවීම තුළින් RiceUP, ශ්‍රී ලංකාවේ වී ගොවිතැන් ක්ෂේත්‍රයේ ඵලදායිතාව, ආහාර සුරක්ෂිතතාව සහ ජීවනෝපායන් ඉහළ නැංවීම අරමුණු කරයි. FAO සිය හවුල්කරුවන් සමඟ එක්ව, ශ්‍රී ලංකාවේ කෘෂිකාර්මික ක්ෂේත්‍රයේ දිගුකාලීන තිරසාරභාවය සහ ප්‍රත්‍යස්ථිතිය සහතික කිරීමට කැපවී සිටී.

The post ශ්‍රී ලංකාවේ සහල් ක්ෂේත්‍රය නංවාලීමට එක්සත් ජාතීන්ගේ සහාය appeared first on Adaderana Biz Sinhala | Sri Lanka Business News.