විභාග දෙපාර්තමේන්තුව පැවැත්වූ නීති ප්‍රවේශ විභාගය නීති විද්‍යාලය පවත්වන්නේ ඇයිදැයි විමසයි

මෙතෙක් කාලයක් විභාග දෙපාර්තමේන්තුව විසින් පවත්වන ලද නීති ප්‍රවේශ විභාගය මෙවර නීති විද්‍යාලය මගින් පවත්වන්නේ ඇයිදැයි යන්න පිළිබඳව අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ පිළිබඳ අමාත්‍ය උපදේශක කාරක සභාවේදී පසුගියදා අවධානය යොමු විය.

අමාත්‍ය ආචාර්ය විජයදාස රාජපක්ෂ මහතාගේ සභාපතීත්වෙයන් පැවති මෙම රැස්වීමේදී ඒ මහතා ප්‍රකාශ කළේ මේ සම්බන්ධයෙන් කරුණු විමසා නීති අධ්‍යයන සභාව වෙත ලිඛිතව කරුණු ඉදිරිපත් කරන බවයි.

2013 අංක 2 දරන අපරාධ නඩු විධාන සංග්‍රහය (විශේෂ විධිවිධාන) පනත යටතේ අධිකරණ, බන්ධනාගාර කටයුතු සහ ආණ්ඩුක්‍රම ප්‍රතිසංස්කරණ අමාත්‍යවරයා විසින්, අංක 2317/28 දරන අතිවිශේෂ ගැසට් පත්‍රයේ ප්‍රකාශයට පත්කළ නියෝගය සහ අමාත්‍යාංශය යටතේ ඇති ආයතනවලට අදාළ වාර්ෂික වාර්තා හයක් කාරක සභාවේදී සලකා බලා අනුමත කරන ලදී.

තවද, ඉංග්‍රීසි භාෂාවෙන් නීති විද්‍යාල විභාග පැවැත්වීමට අදාළව නීති අධ්‍යාපන කවුන්සිලය විසින් පනවන ලද,  2020 දෙසැම්බර් 30 වැනි දින අංක 2208/13 දරන අතිවිශේෂ ගැසට් පත්‍රයේ ප්‍රකාශයට පත් කර තිබූ යෝජනාව පාර්ලිමේන්තුවේදී පසුගියදා පරාජයට පත්වීම පිළිබඳවද මෙහිදී අවධානය යොමු විය.

ඒ අනුව, ශ්‍රී ලංකා නීති විද්‍යාලයේ ඉංග්‍රීසි මාධ්‍යයෙන් විභාග පැවැත්වීමේ යෝජනා ඇතුළත් එකී ගැසට් පත්‍රය පාර්ලිමේන්තුවේදී පරාජයට පත් වීමේදී, එම ගැසට් පත්‍රයේ ඇතුළත් අනෙකුත් යෝජනා ද ඒ සමඟම පරාජය වීම පිළිබඳව මෙහිදී අවධානය යොමු විය.

නීති විද්‍යාලයේ මෙම තීරණවල ප්‍රතිඵලයක් ලෙස අප්‍රේල් මස අවසානයේ විභාගයට පෙනී සිටීමට නියමිත සිසුන්ට බලවත් අසාධාරණයක් සිදුවන බව ද කමිටුව වැඩිදුරටත් පෙන්වා දුන්නේය.

එමෙන්ම ඉංග්‍රීසි මාධ්‍යයෙන් පමණක් විභාග පැවැත්වීමේ නීතිය හේතුවෙන් අයදුම් නොකළ සිසුන්ට විභාග සඳහා අයදුම් කිරීමට අවස්ථාව ලබාදීමේ හැකියාව සොයා බලන ලෙස කාරක සභික මන්ත්‍රීවරයන් ඉල්ලා සිටියහ. ඒ සදහා ඔවුන්ට සැලකිය යුතු කාලයක් ලබාදිය යුතු බව ද මන්ත්‍රීවරයන් පෙන්වා දුන්හ.

අමාත්‍ය ආචාර්ය විජයදාස රාජපක්ෂ මහතා සඳහන් කළේ සංස්ථාගත නීති අධ්‍යපන සභා පනත ප්‍රකාරව අමාත්‍යවරයාට ප්‍රතිපත්තිමය මඟ පෙන්වීම ලබා දීමට බලය තිබුණද අධ්‍යයන කටයුතු සම්බන්ධයෙන් තීරණ ගනු ලබන්නේ ස්වාධීන ආයතනයක් ලෙස ක්‍රියාත්මක වන නීති අධ්‍යයන සභාව  බවයි.  කෙසේ වෙතත්, ඉදිරිපත් වූ ඉල්ලීම් සලකා බලා අමාත්‍යවරයා ප්‍රකාශ කළේ ඉහත සඳහන් නීතිරීති හේතුවෙන් අයදුම් කිරීමෙන් වැළකී සිටින සිසුන්ට ඉදිරි විභාග සඳහා අයදුම් කිරීමට ඉඩ සලසන ලෙස නීති අධ්‍යාපන සභාවෙන් ඉල්ලා සිටින බවයි.

විපක්ෂ නායක සජිත් ප්‍රේමදාස, රාජ්‍ය අමාත්‍යවරුන් වන අනුරාධ ජයරත්න, සිසිර ජයකොඩි, අශෝක ප්‍රියන්ත, පාර්ලිමේන්තු මන්ත්‍රීවරුන් වන රවුෆ් හකීම්, එම්. ඒ. සුමන්තිරන්, චන්දිම වීරක්කොඩි, ප්‍රේමලාල් ජයසේකර, චාල්ස් නිර්මලනාදන්, අසංක නවරත්න, වීරසුමන වීරසිංහ, ගෙවිඳු කුමාරතුංග, ප්‍රේම්නාත් සී. දොලවත්ත, මහාචාර්ය චරිත් හේරත්, වෛද්‍ය උපුල් ගලප්පත්ති යන මහත්වරු පැවැත් වූ කාරක සභා රැස්වීමට සහභාගි වූහ.

The post විභාග දෙපාර්තමේන්තුව පැවැත්වූ නීති ප්‍රවේශ විභාගය නීති විද්‍යාලය පවත්වන්නේ ඇයිදැයි විමසයි appeared first on Adaderana Biz Sinhala | Sri Lanka Business News.