ධම්මිකගෙන් කොටස් වෙළෙඳපොළට තවත් තල්ලුවක්

මෙරට ප්‍රධානතම වාණිජ බැංකුවක් වන සම්පත් බැංකුව සහ තවත් ප්‍රමුඛ පෙළේ මූල්‍ය සමාගමක් වන එල් බී ෆිනෑන්ස් යන සමාගම් විසින් කොටස් අනුබෙදුම් (sub division) සිදුකරනු ලබන බව අද (27) දින නිවේදනය කර සිටී.

මේ අනුව සම්පත් බැංකුවේ දැනට පවතින සෑම සාමාන්‍ය කොටසක්ම කොටස් 3 ක් බවට පරිවර්තනය වන අතර ඒ අනුව සමාගමේ දැනට පවතින 381,457,985 ක්වූ මුළු කොටස් සංඛ්‍යාව, කොටස් 1,144,373,955 ක් බවට පරිවර්තනය වනු ඇත.

මේ අතර එල් බී ෆිනෑන්ස් සමාගමේ දැනට පවතින කොටසක්, තවත් කොටස් 4 ක් බවට අනුබෙදුමකට ලක්කරන බව අද උදෑසන නිවේදනය කිරීමත් සමඟම එම සමාගමේ කොටසක මිල අද දිනය තුළ දී රු. 232.50 සිට රු. 320.50 ක් දක්වා රු. 88.00 ක දැවැන්ත මිල ඉහළ යාමක් වාර්තා කළේය. එල් බී ෆිනෑන්ස් සමාගමේ කොටස් අනුබෙදුමත් සමඟින් එහි දැනට තිබෙන 138,514,284 ක්වූ මුළු කොටස් ප්‍රමාණය, කොටස් 554,057,136 ක් බවට පරිවර්තනය වීමට නියමිතය.

මෙම කොටස් අනුබෙදුම් හරහා සමාගම් හි ප්‍රකාශිත ප්‍රාග්ධනයේ වෙනසක් සිදුනොවන අතර පවතින කොටස් ප්‍රමාණය ඉහළ යාමෙන් කොටස් ද්‍රවශීලතාවයේ වැඩිවීමක් සිදුවේ. එය වැඩි ගනුදෙනු ප්‍රමාණයක් ජනිත කරලීමට සමත්වන කරුණකි.

සම්පත් බැංකුව හා එල් බී ෆිනෑන්ස්  යනු මෙරට ප්‍රකෝටිපති ව්‍යාපාරික, ධම්මික පෙරේරා මහතා බහුතර කොටස් හිමිකාරීත්වය දරන වැලිබල් වන් සමූහයේ අනුබද්ධිත සමාගම් දෙකකි. සම්පත් බැංකුවේ කොටස් ප්‍රග්ධනයෙන් 14.95% ක් හා එල් බී ෆිනෑන්ස් සමාගමේ කොටස් ප්‍රාග්ධනයෙන් 51.75% ක් වැලිබල් වන් පීඑල්සී සතුව පවතී.

ධම්මික පෙරේරා පාලක කොටස් හිමිකාරීත්වය දරන හේලීස් සමූහයේ සමාගම් 14ක කොටස් අනුබෙදුම් මීට පෙර නිවේදනය කරනු ලැබීය. එම සමාගම් 14 සහ ඒවායේ කොටස් බෙදී යන ආකාරය පහත පරිදි වේ.

HAYLEYS PLC – 1 ට 10ක්,

DIPPED PRODUCTS PLC – 1 ට 10 ක්

ALUMEX PLC – 1 ට 2 ක්

REGNIS(LANKA) PLC – 1ට 2 ක්

SINGER (SRI LANKA) PLC – 1 ට 3ක්

HAYCARB PLC – 1 ට 10 ක්

SINGER INDUSTRIES (CEYLON) PLC – 1 ට 2 ක්

TALAWAKELLE TEA ESTATES PLC 1ට 2 ක්

HAYLEYS FABRIC PLC – 1ට 2 ක්

KELANI VALLEY PLANTATIONS PLC – 1 ට 2ක්

AMAYA LEISURE PLC – 1 ට 2 ක්

HAYLEYS FIBRE PLC – 1 ට 3 ක්

UNISYST ENGINEERING PLC – 1 ට 2 ක්

THE KINGSBURY PLC – 1 ට ‍2 ක්

The post ධම්මිකගෙන් කොටස් වෙළෙඳපොළට තවත් තල්ලුවක් appeared first on Adaderana Biz Sinhala | Sri Lanka Business News.