ජූනි 30 විශේෂ බැංකු නිවාඩුවට හේතුව මෙන්න. මහ බැංකු අධිපති හෙළිකරයි

එළඹෙන ජූනි 30 වන දින විශේෂ බැංකු නිවාඩු දිනයක් ‌ලෙසින් ප්‍රකාශයට පත් කිරීමට අග්‍රාමාත්‍ය සහ රාජ්‍ය පරිපාලන, ස්වදේශ කටයුතු පළාත් සභා හා පළාත් පාලන අමාත්‍ය දිනේෂ් ගුණවර්ධන මහතා පසුගිය දා කටයුතු කරන ලදී.‍

කෙසේවෙතත් මෙම විශේෂ බැංකු නිවාඩුවට හේතුව කුමක්ද යන වග කිසිවකුත් මේ දක්වා හෙළිදරව් කර නොතිබිණ.

ජූනි 29 වන දා (බ්‍රහස්පතින්දා) සහ ජූලි 03 වන දා (සඳුදා) රජයේ නිවාඩු දින වන බැවින් ජූනි 30 (සිකුරාදා) දින විශේෂ බැංකු නිවාඩු දිනයක් ලෙසින් ප්‍රකාශයට පත් කිරීමත් සමඟම, එකදිගට දින 5ක් බැංකු වසා දැමෙනු ඇත. මෙම තීරණය බොහෝ පාර්ශවවලට කුතුහලයක් ඇති කළ කාරණයක් විය.

මේ අතර අද (25) පස්වරුවේ ශ්‍රී ලංකා මහ බැංකු අධිපති ආචාර්ය නන්දලාල් වීරසිංහ මහතා විශේෂ මාධ්‍ය හමුවක් කැඳවමින් කියා සිටියේ, දේශීය ණය ප්‍රශස්ථකරණ වැඩපිළිවෙල සම්පූර්ණයෙන් ක්‍රියාත්මක කිරීම සඳහා යම් කාලපරාසයක් අවශ්‍ය වීම හේතුවෙන් මෙලෙස ජූනි 30 දින විශේෂ බැංකු නිවාඩු දිනයක් ප්‍රකාශයට පත්කරනු ලැබූ බවයි. ඒ අනුව එකදිගට දින 5 ක කාලයක් බැංකු නිවාඩු දින වශයෙන් ගැනෙන බවත්, එම කාලය තුළ දී දේශීය ණය ප්‍රශස්ථකරණ සම්පූර්ණ ක්‍රියාවලියම අවසන් කිරීමට හැකිවෙතැයි රජය බලාපොරොත්තු වන බවත් මහ බැංකු අධිපතිවරයා මෙහිදී පැවසීය.

මෙහිදී වැඩිදුරටත් අදහස් දැක්වූ මහ බැංකු අධිපති ආචාර්ය නන්දලාල් වීරසිංහ මහතා,

“රජය සහ මුදල් අමාත්‍යාංශය සාකච්ඡා කරලා මේ මාසේ 30 වැනි සිකුරාදා බැංකු නිවාඩු දිනයක් වශයෙන් ප්‍රකාශ කිරීමට ප්‍රධාන වශයෙන් හේතුව වුණේ, අපි හැමෝම දන්නවා දේශීය ණය ප්‍රශස්තකරණය, Domestic Debt Optimization කියන ඒ වැඩපිළිවෙල පසුගිය දවස්වල විශේෂයෙන් මුදල් අමාත්‍යාංශය සහ මහ බැංකුව සාකච්ඡා කරලා අවසන් අදියරකට ඇවිල්ලා තියෙනවා. ඒක ක්‍රියාත්මක කිරීම සඳහා විශේෂයෙන් අවශ්‍ය වෙනවා යම්කිසි කාලපරාසයක් සම්පූර්ණයෙන් ක්‍රියාත්මක කිරීමට. ඒ ක්‍රියාත්මක කිරීමේ දී කැබිනට් මණ්ඩලයේ අනුමැතිය ලබා ගැනීම, පාර්ලිමේන්තුවට ඉදිරිපත් කිරීම, ඉන්පසු පාර්ලිමේන්තුවේ අදාල කමිටු, මුදල් කාරක සභාව සහ අනෙකුත් අදාළ කමිටුවලට සාකච්ඡා කිරීමට කාලයක් අවශ්‍ය වෙනවා.”

“මේ අවස්ථාවේ දී ජූනි 30 සිකුරාදා බැංකු නිවාඩු දිනයක් ප්‍රකාශයට පත් කළාම, එකදිගට දවස් පහක, යම්කිසි ආකාරයක වෙළෙඳපොළවල් වසා දැමීමේ කාලය තුළ, මේ සම්පූර්ණ ක්‍රියාවලියම අවසන් කිරීමට හැකිවෙයි කියලා රජය බලාපොරොත්තු වෙන නිසා තමයි ඒ නිවාඩු දිනය ප්‍රකාශයට පත් කරලා තියෙන්නේ.”

“ඒක ඒ හේතුව නිසා මිසක් වෙන කිසිම හේතුවක් නිසා නෙමෙයි. කිසිම ආකාරයක බැංකුවලට, ගනුදෙනුවලට, විශේෂයෙන් සාමාන්‍ය නිවාඩු දවසක සිදුකරන බැංකු ගනුදෙනු, ATM ගනුදෙනු, අන්තර්ජාල බැංකු ගනුදෙනු, ඒවාට කිසිම බාධාවක් නැහැ.”

 

The post ජූනි 30 විශේෂ බැංකු නිවාඩුවට හේතුව මෙන්න. මහ බැංකු අධිපති හෙළිකරයි appeared first on Adaderana Biz Sinhala | Sri Lanka Business News.