ඒ අනුව පූර්ව ගනුදෙනු දිනයට සාපේක්ෂව සියලු කොටස් මිල දර්ශකය 1.08% කින් හා S&P SL20 දර්ශකය 2.42% කින් අද දින ඉහළ යන ලදී. එහිදී සියලු කොටස් මිල දර්ශකය ඒකක 89.60 කින් ඉහළ ගොස් ඒකක 8,422.97 ක් ලෙසත් S&P SL20 දර්ශකය ඒකක 66.01 කින් ඉහළ ගොස් ඒකක 2,794.15 ක් ලෙසත් දිනය අවසානයේ දී වාර්තා විය.
රු. බිලියන 3.33 ක ගනුදෙනු පිරිවැටුමක් අද දින වාර්තා වූ අතර මෙහි ඇති විශේෂත්වය වන්නේ එයින් රු. බිලියන 1.52 ක වටිනාකමක් ලංකා IOC සමාගමේ කොටස් ගනුදෙනුවලින් පමණක් වාර්තා වී තිබීමයි.
මීට අමතරව දෛනික පිරිවැටුමට ඉහළ දායකත්වයක් ලබා දුන් සෙසු සමාගම් අතර එක්ස්පෝලංකා හෝල්ඩිංග්ස් රු. මිලියන 319.28 ක්, ජෝන් කීල්ස් හෝල්ඩිංග්ස් රු. මිලියන 199 ක්, LOLC හෝල්ඩිංග්ස් රු. මිලියන 132 ක් හා මෙල්ස්ටාකෝප් රු. මිලියන 111 ක් ලෙසින් පෙරමුණේ විය.
අද දින පිරිවැටුමෙන් රු. බිලියන 3.24 ක් දේශීය මිල දී ගැනීම් ලෙසත්, රු. බිලියන 3.17 ක් දේශීය විකිණුම් ලෙසත් වාර්තා වූ අතර විදෙස් ආයෝජකයින්ගේ උදාසීන දායකත්වය යළිත් වරක් පෙන්නුම් කරමින් විදේශීය මිල දී ගැනීම් රු. මිලියන 93 ක් හා විදේශීය විකිණුම් රු. මිලියන 155.46 ක් ලෙසින් දිනය තුළ වාර්තා වී තිබුණි.
දිනය තුළ කැපී පෙනෙන කරුණ වූයේ ලංකා IOC සමාගමේ කොටස් මිල පෙර දිනයට වඩා 16.15% කින් වැඩි වී තිබීමයි. එහිදී එම සමාගමේ කොටසක අවසාන ගනුදෙනු මිල රු. 131.25 ක් ලෙසින් වාර්තා වී තිබුණි. අද පෙරවරුවේ දී ලංකා IOC සමාගම විසින් කොළඹ කොටස් වෙළෙඳපොළ වෙත නිවේදනයක් නිකුත් කරමින් කියා සිටියේ නව ඉන්ධන පිරවුම්හල් 50 ක් විවෘත කිරීම සඳහා බලශක්ති අමාත්‍යවරයාගේ අනුමැතිය ලැබී තිබුණු බවයි. මීට අමතරව පසුගිය සිකුරාදා (05) ලංකා IOC සමාගම සිය නවතම මූල්‍ය වාර්තා ප්‍රකාශයට පත්කරනු ලැබූ අතර ඒ අනුව 2022/23 මූල්‍ය වර්ෂයේ පළමු කාර්තුව වෙනුවෙන් රු. බිලියන 9.9 ක ශුද්ධ ලාභයක් වාර්තා කිරීමට සමාගම සමත්ව තිබුණි. මෙම තත්ත්වය තුළ ලංකා IOC සමාගමේ කොටස් ගනුදෙනු අද දිනයේ දී ඉහළ සක්‍රීය ස්වභාවයක් ගන්නා ලදී.
අද දින සියලු කොටස් මිල දර්ශකයේ වර්ධනය සඳහා LOLC, ලංකා IOC, ෂෙව්රොන් ලුබ්රිකන්ට්ස්, මෙල්ස්ටාකෝප් සහ එයිට්කන් ස්පෙන්ස් යන සමාගම් ඉහළ දායකත්වයක් ලබා දී තිබුණි.
The post කොටස් වෙළෙඳපොළ 1% කින් ඉහළට. ආයෝජකයින්ගේ වැඩි අවධානය ලංකා IOC වෙත appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka