කොටස් වෙළෙඳපොළ වැටි වැටී නැගිටියි

අද (10) දිනයේ දී කොළඹ කොටස් වෙළෙඳපොළ මිල දර්ශකවල ඉහළ උච්ඡාවචනයන් දන්කට ලැබුණු නමුත් දිනයේ ගනුදෙනු අවසානයේ දී සියලු කොටස් මිල දර්ශකය ඒකක 56.21ක සහ S&P SL20 දර්ශකය ඒකක 22.50ක වර්ධනයන් වාර්තා කිරීමට සමත්වුණි.

ඒ අනුව දිනයේ ගනුදෙනු අවසානයේ දී සියලු කොටස් මිල දර්ශකය ඒකක 13,774.96 ක් සහ S&P SL20 දර්ශකය ඒකක 4,113.42 ක් ලෙසින් සටහන්ව තිබුණි.

මෙය මෙතෙක් ඉතිහාසයේ වාර්තා වී ඇති ඉහළම දර්ශක අගයයන් වේ.

අද දිනය අතරවාරයේ දී සියලු කොටස් මිල දර්ශකය පෙර දිනයට වඩා පහළ මට්ටමකට ද වරක් පැමිණි නමුත් ගනුදෙනු අවසානය වන විට එය යළිත් වරක් ධනාත්මක අගයයකින් අවසන් වීම විශේෂත්වයකි.

අද දිනයේ සියලු කොටස් මිල දර්ශකයේ ඉහළ යාමට ප්‍රධාන වශයෙන් LOLC සමූහයේ සමාගම් කිහිපයකයම කොටස් මිල ගණන් ඉහළ යාම් විශාල වශයෙන් දායක වී තිබුණි.  එහිදී වැඩිම දායකත්වය LOLC හෝල්ඩිංග්ස් වෙතින් ලැබී තිබුණු අතර බ්‍රවුන්ස් ඉන්වෙස්ට්මන්ට්ස් සහ LOLC ෆයිනෑන්ස් යන සමාගම්වලින් ද ලැබී තිබුණේ ඉහළ දායකත්වයකි. මීට අමතරව ජෝන් කීල්ස් හෝල්ඩිංග්ස් සහ CTC යන සමාගම්වල කොටස් මිල ඉහළ යාම් ද සියලු කොටස් මිල දර්ශකයේ වර්ධනයට වැඩි දායකත්වයක් ලබා දී තිබුණි.

රු. බිලියන 1.30 ක ගනුදෙනු පිරිවැටුමක් අද දින වාර්තා විය.

 

 

The post කොටස් වෙළෙඳපොළ වැටි වැටී නැගිටියි appeared first on Adaderana Biz Sinhala | Sri Lanka Business News.