කොටස් වෙළෙඳපොළ අදත් සුපිරි පිම්මක් පනී

කොළඹ කොටස් වෙළෙඳපොළ මිල දර්ශක අඛණ්ඩව සිව්වන වරටත් අද (15) දිනයේ දී ඉහළ ගිය අතර එහිදී සියලු කොටස් මිල දර්ශකය (ASPI) දිනය තුළ ඒකක 183.55 ක කැපීපෙනෙන වර්ධනයක් වාර්තා කිරීමට සමත්විය. S&P SL20 දර්ශකය දිනය තුළ ඒකක 61.60 කින් ඉහළ ගිය අතර දිනයේ ගනුදෙනු අවසානයේ දී මෙම දර්ශක දෙක පිළිවෙලින් ඒකක 16,314.79 ක් හා ඒකක 4,795.63 ක් ලෙසින් සටහන් වුණි.

ඊයේ (14) දිනයේ දීද සියලු කොටස් මිල දර්ශකයේ ඒකක 215ක වර්ධනයක් වාර්තා වී තිබුණි.

අද දින සියලු කොටස් මිල දර්ශකයේ වර්ධනයට සමාගම් 138ක කොටස් මිල ඉහළ යාම් ධනාත්මක දායකත්වයක් ලබාදුන් අතර එහිදී මෙල්ස්ටාකෝප්, සම්පත් බැංකුව, කොමර්ෂල් බැංකුව, එයිට්කන් ස්පෙන්ස් සහ හේලීස් යන සමාගම් කැපීපෙනෙුණි.

අද දින ගනුදෙනු පිරිවැටුම රු. බිලියන 4.55 කි. ඒ සඳහා වැඩිම දායකත්වය Lanka Realty Investments PLC වෙතින් ලැබී තිබුණු අතර රු. මිලියන 467ක් ලෙසින් එම අගය සටහන් විය. මීට අමතරව ජෝන් කීල්ස් හෝල්ඩිංග්ස් හි ගිවිසාගනු ලැබූ හා වෙළෙඳපොළ ගනුදෙනු හරහා රු. මිලියන 470 ක පිරිවැටුමක් ජනනය වී තිබුණි. LOLC හෝල්ඩිංග්ස් (රු. මිලියන 280) හා කෝමර්ෂල් බැංකුව (රු. මිලියන 248), දෛනික පිරිවැටුමට අද දිනයේ දී ඉහළ දායකත්වයක් ලබා දුන් සෙසු සමාගම් වේ.

අද දින දේශීය මිල දී ගැනීම් රු. බිලියන 3.79 ක් හා දේශීය විකිණුම් රු. බිලියන 3.70 ක් ලෙසින් වාර්තා වූ අතර විදේශීය මිල දී ගැනීම් රු. මිලියන 758 ක් හා විදේශීය විකිණුම් රු. මිලියන 855 ක් ලෙසින් සටහන් විය.

 

The post කොටස් වෙළෙඳපොළ අදත් සුපිරි පිම්මක් පනී appeared first on Adaderana Biz Sinhala | Sri Lanka Business News.