හිටපු ජනපතිට එල්ල වන චෝදනා මත ආණ්ඩුවත් අපහසුතාවයට

අප්‍රේල් 21 පාස්කු ඉරු දින ප්‍රහාරය සම්බන්ධයෙන් සොයා බැලීමට පත් කර තිබෙන විශේෂ ජනාධිපති කොමිසන් සභාව හමුවේ එවකට සිටි ජනාධිපති මෛත්‍රීපාල සිරිසේන මහතාට එරෙහිව එල්ල වන චෝදනා මත පොදුජන පෙරමුණු ආණ්ඩුව ද යම් අපහසුතාවයකට පත්ව තිබෙන බව දැනගන්නට තිබේ.

ඒ මෛත්‍රිපාල සිරිසේන මහතා වත්මන් පොදුජන පෙරමුණු රජයේ මන්ත්‍රීවරයෙකු ලෙස කටයුතු කරන නිසාය.

මෙම චෝදනා එජාපය කළේ නම් එය දේශපාලන වශයෙන් තිබෙන එදිරිවාදීකම් මත කරන ලද බව අනුමාන කළ හැකි මුත් එම චෝදනා ඔහු විසින් පත් කළ එවකට සිටි ආරක්ෂක ලේකම්වරයා වන හේමසිරි ප්‍රනාන්දු මහතා විසින් කිරීම මත යම් සත්‍යතාවයක් තිබෙන බවට බහුතර ජනතාව තුළ විශ්වාසයක් ගොඩ නැගී ඇති බව ආණ්ඩුවේ ස්ථාවරය වේ.

පාස්කු ප්‍රහාරය සම්බන්ධයෙන් හිටපු ආරක්ෂක ලේකම්වරයා තමාට එල්ල කරන චෝදනා අසත්‍ය බවට හිටපු ජනපතිගේ මාධ්‍ය ඒකකය නිවේදනයක් නිකුත් කලද පොදුජන පෙරමුණ හෝ ඔහු නියෝජනය කරන ශ්‍රීලනිපය මේ සම්බන්ධයෙන් කිසිදු නිල නිවේදනයක් නිකුත් නොකිරීමට ප්‍රවේසම් වී තිබේ.