මිනුවන්ගොඩ පොකුරෙන් හමුවන ආසාදිතයින්ගේ වෛරස ප්‍රමාණය වැඩි බව වසංගත රෝග විද්‍යා අංශයේ ප්‍රධානී, විශේෂඥ වෛද්‍ය සුදත් සමරවීර මහතා පවසයි.
කොළඹ දී පැවති මාධ්‍ය හමුවක දී ඔහු පැවසුවේ, “මෙරටින් මීට පෙර හමු වූ කොවිඩ් පොකුරුවල PCR පරීක්ෂණ සිදු කිරීමේදී ඔවුන්ගේ තිබුණු වෛරස් ප්‍රමාණය තිබුණේ පහළ මට්ටමක. නමුත් මෙතනදී හමුවන රෝගීන්ගේ වෛරස් ප්‍රමාණය වැඩියි. එතන තියෙන අවධානම තමයි මේ වෛරස් ප්‍රමාණය වැඩි නම් තවත් කෙනෙකුට පැතිරෙන්න තියෙන අවධානමත් වැඩිවීමයි. බස් එකේ ගිහින් තවත් අයට බෝ වුණාද කියන එක අපි දන්නේ නෑ.”
අද දිනයේදී (07) තවත් කොවිඩ් -19 ආසාදිතයන් 196 දෙනකු හඳුනාගැනීමත් සමඟ මිනුවන්ගොඩ කොවිඩ් පොකුරේ සමස්ථ ආසාදිතයන් ගණන 1028 දක්වා ඉහළ ගියේය.
ඒ අනුව, මෙම නව ආසාදිත පොකුර මෙතෙක් වාර්තා වූ වැඩිම ආසාදිත පොකුර වන නාවික හමුදා පොකුර ද ඉක්මවා ගොස් තිබේ. නාවික හමුදා පොකුරේ අසාදිතයින් ගණන 950කි.
අද(07) පස්වරුවේ හඳුනාගත් ආසාදිතයන් හය දෙනාගෙන් සිව්දෙනෙකු මිනුවන්ගොඩ අදාළ කර්මාන්ත ශාලාවේ සේවකයන් වන අතර තවත් අයෙක් බ්‍රැන්ඩික්ස් ආයතනයේ වැලිසර ශාඛාවේ සේවකයෙකි.
අනෙක් කාන්තාව කටුනායක ගුවන් තොටුපලේ සනීපාරක්ෂක අංශයේ සේවිකාවකි.
වැලිසර සේවකයා සහ ගුවන්තොටුපල සනීපාරක්ෂක අංශයේ සේවිකාව මිනුවන්ගොඩ බ්‍රැන්ඩික්ස් කර්මාන්ත ශාලාවේ සේවකයන්ගේ ආශ්‍රිතයන් බව සෞඛ්‍ය අංශ අනාවරණ කළහ.
The post මිනුවන්ගොඩ පොකුරෙන් හමුවන ආසාදිතයින්ගේ වෛරස ප්‍රමාණය වැඩියි – විශේෂඥ වෛද්‍ය සුදත් සමරවීර appeared first on ColomboXnews.
Source From Colomboxnews
Author: Kamal Dhammika
#SriLanka #News #lka