පාස්කු ප්‍රහාරය ගැන මහින්ද – චන්ද්‍රිකා ඇතුළු ප්‍රභූවරුන් 268කට කලින්ම දැනුම් දුන්නා – හිටපු නියෝජ්‍ය පොලිස්පති ජනාධිපති කොමිසම හමුවේ කියයි.

පාස්කු ප්‍රහාරය සම්බන්ධයෙන් පූර්ව අනතුරු ඇඟවීමෙ ලිපි මෙරට ප්‍රභූවරුන් 268 දෙනෙකුගේ ආරක්ෂක ප්‍රධානීන්ට යවා තිබූ බව කොමිසම හමුත් සාක්ෂි ලබාදෙමින් හිටපු නියෝජ්‍ය පොලිස්පති ප්‍රියලාල් දසනායක මහතා සඳහන් කළේය. ප්‍රභූ ආරක්ෂක අංශය, අධිකරණ ආරක්ෂක අංශය, තානාපති ආරක්ෂක අංශය, හිටපු ජනාධිපතිනි චන්ද්‍රිකා කුමාරතුංග මහත්මියගේ ආරක්ෂක අංශය හා හිටපු ජනාධිපති මහින්ද රාජපක්ෂ මහතාගේ ආරක්ෂක අංශය 2018 වසරෙන් පසු තමන් යටතේ පැවති බවද ඔහු පැවසීහ.

ඇතැම් ප්‍රභූවරුන් විසින් ප්‍රහාරයෙන් පසු හෙළි නොකරන ලෙස දැනුම් දී තිබූ බවත් පාස්කු ප්‍රහාරය පිළිබඳ විමර්ශනය කෙරෙන ජනාධිපති කොමිසම හමුවේ අනාවරණ වුණා.

ඒ එවක විශේෂ ආරක්ෂක දිසාව භාරව සිටි නියෝජ්‍ය පොලිස්පති ප්‍රියලාල් දසනායක මහතා ඊයේ සාක්ෂි ලබාදුන් අවස්ථාවේදීයී. කොමිසම හමුවේ සාක්ෂි ලබා දීම සඳහා කැඳවා තිබුණේ විශේෂ ආරක්ෂක දිසාව භාරව සිට මේ වන විට විශ්‍රාම ගොස් සිටින හිටපු නියෝජ්‍ය පොලිස්පති ප්‍රියලාල් දසනායක මහතායි.

ප්‍රහාරයක් එල්ල විය හැකි බවට තොරතුරක් ඔබ වෙත ලැබුණේදැයි කොමිසම මෙහිදී හිටපු නියෝජ්‍ය පොලිස්පති ප්‍රියලාල් දසනායක මහතාගෙන් විමසුවා.

සාක්ෂිකරු එහිදී සදහන් කළේ 2019.04.10 දින රාජ්‍ය බුද්ධි ප්‍රධානියා විසින් පොලිස්පතිවරයාට එවූ ලිපිය පොලිස්පති පූජිත් ජයසුන්දර විසින් තමන්ට ද එවා තිබූ බවයි.

එම ලිපිය අනුව තමන් යටතේ ඇති ආරක්ෂක අංශ පහේ අධ්‍යක්ෂවරුන් අමතා දැනුවත් කර පසු අවස්ථා කිහිපයකදී ඒ පිළිබඳව වැඩිදුර සාකච්ඡා පැවැත්වූ බව සාක්ෂිකරු මෙහිදී සදහන් කළා.

තානාපති ආරක්ෂක අංශය ඔබ යටතේ පැවති බැවින් ලිපියෙහි සඳහන් ඉලක්ක ගත ස්ථානයක් ලෙස හදුන්වා තිබූ ඉන්දීය මහා කොමසාරිස් කාර්යාලයට ආරක්ෂාව සැලසුවේදැයි කොමිසම මෙහිදී සාක්ෂිකරුගෙන් විමසුවා.

ඔහු එහිදී සඳහන් කළේ, තානාපති ආරක්ෂක අංශ අධ්‍යක්ෂවරයා හරහා ඒ වනවිට ලබාදී තිබූ ආරක්ෂාවට අමතරව නිල වාහනයක් සමඟ පරීක්ෂණ නිලධාරියකු ඇතුළු නිලධාරීන් පස් දෙනෙකු ඉන්දීය මහා කොමසාරිස් කාර්යාලයේ ඇතුළත සහ පිටත රාජකාරි සඳහා යෙදවූ බවයි.

ඊට අමතරව කොල්ලුපිටිය පොලිස් ස්ථානයේ නිලධාරීන් කිහිපදෙනෙක් මහමාර්ගයේ ආරක්ෂාවට යොදවා තිබූ බවද ඔහු වැඩිදුරටත් සදහන් කළා.

මුල් තොරතුරට අමතරව තවත් තොරතුරු ලැබුණේදැයි කොමිසම විමසූ අතර ඊට පිළිතුරු දෙමින් සාක්ෂිකරු සදහන් කළේ එවැනි කිසිදු තොරතුරක් නොලැබුණු බවයි.

ඔබ විසින් අත්සන් කර අධ්‍යක්ෂවරුන් පස් දෙනා වෙත යොමු කළ ලිපිය ප්‍රහාරයෙන් පසු අන්තර්ජාලයේ සහ මාධ්‍යවල හුවමාරු වූ බව මතකදැයි කොමිසම සාක්ෂිකරුගෙන් විමසා සිටියා.

ඔහු එහිදී සඳහන් කළේ, එම ලිපිය අන්තර්ජාලයේ හා මාධ්‍යවල හුවමාරු වූ ආකාරය තමන් දුටු නමුත් එය එලෙස පිටතට ගියේ කෙලෙසදැයි තමන් නොදන්නා බවයි.

කෙසේවෙතත් තමන් යටතේ පැවති ප්‍රභූ ආරක්ෂක අංශයේ අධ්‍යක්ෂ පොලිස් අධිකාරී කිත්සිරි අපෝන්සු හරහා මෙරට ප්‍රභූවරුන් 268 දෙනෙකුගේ ආරක්ෂක අංශ පාස්කු ප්‍රහාරය සම්බන්ධයෙන් ලද අනතුරු ඇඟවීමේ ලිපිය පිළිබඳ දැනුවත් කළ බව ද විශේෂ ආරක්ෂක දිසාව භාරව සිටි නියෝජ්‍ය පොලිස්පති ප්‍රියලාල් දසනායක මහතා මෙහිදී කොමිසමට අනාවරණය කළා.

එලෙස දැනුවත් කළ ලිපියක් මාධ්‍ය වෙත නිකුත් වන්නට ඇතැයි තමන් සිතන බවද ඔහු වැඩිදුරත් සඳහන් කළා.

කොමිසම මෙහිදී ප්‍රශ්න කළේ, ප්‍රහාරය පිළිබඳ එම ප්‍රභූවරුන්ට ඔවුන්ගේ ආරක්ෂකයින් දන්වා තිබුණේද යන්නයි.

ඇතැම් ප්‍රභූවරුන්ට දැනුම් දී තිබුණත් ඔවුන්ට එය දැනුම් දුන් බව හෙළි නොකරන ලෙස ප්‍රහාරයෙන් පසුව ආරක්ෂක නිලධාරීන්ට උපදෙස් ලබාදී තිබූ බව සාක්ෂිකරු මෙහිදී කොමිසමට හෙළි කළා.

එමෙන්ම බදුල්ල දිස්ත්‍රික්කයේ හිටපු පාර්ලිමේන්තු මන්ත්‍රීවරයකුගේ පියෙක් ප්‍රහාරයක් සම්බන්ධයෙන් අනතුරක් ඇති නිසා පල්ලිවලට නොයන ලෙසද ආරක්ෂක නිලධාරීන්ටද පවසා තිබූ බවද සාක්ෂිකරු මෙහිදී වැඩිදුරටත් සඳහන් කළා.

The post පාස්කු ප්‍රහාරය ගැන මහින්ද – චන්ද්‍රිකා ඇතුළු ප්‍රභූවරුන් 268කට කලින්ම දැනුම් දුන්නා – හිටපු නියෝජ්‍ය පොලිස්පති ජනාධිපති කොමිසම හමුවේ කියයි. appeared first on ColomboXnews.

Source From Colomboxnews
Author: Kamal Dhammika
#SriLanka #News #lka