අප්‍රේල් 21 ප්‍රහාරයෙන් පසුව මිනුවන්ගොඩ ප්‍රදේශයේ ඇතිවූ නොසන්සුන්කාරී සිදුවීම්වලට පිවිතුරු හෙළ උරුමයේ නියෝජ්‍ය නායක මධුමාධව අරවින්ද සෘජුව සම්බන්දවී ඇතැයි විමර්ශනවලදී අනාවරණය වූ බව විමර්ශන නිලධාරීන් පාස්කු ප්‍රහාරය සම්බන්ධයෙන් විමර්ශනය කරන ජනාධිපති පරීක්ෂණ කොමිෂන් සභාව හමුවේ ප්‍රකාශකර තිබේ.
විමර්ශන නිලධාරීන් ඒ බව සඳහන් කළේ පාස්කු ප්‍රහාරයෙන් පසු පසුගිය වසරේ මැයි 13 වනදා මිනුවන්ගොඩ ප්‍රදේශයේ ඇතිවු නොසන්සුන්කාරී තත්ත්වය සම්බන්ධයෙන් ගම්පහ කොට්ඨාස භාර ජ්‍යෙෂ්ඨ පොලිස් අධිකාරී රොෂාන් විජේසිංහ, ජ්‍යෙෂ්ඨ පොලිස් අධිකාරී චන්ද්‍ර දීප්ත ලියනගේ සහ ප්‍රධාන පොලිස් පරීක්ෂක කේ. ආර්. ඒ. ප්‍රියන්ත යන විමර්ශන නිලධාරීන්ගෙන් කළ සාක්ෂි විමසීමේදීය.
එහිදි මුලින්ම සාක්ෂි ලබාදුන්නේ එවකට ගම්පහ කොට්ඨාසය භාර ජ්‍යෙෂ්ඨ පොලිස් අධිකාරී රොෂාන් විජේසිංහ මහතායි.
“පාස්කු ප්‍රහාරයෙන් පසු මැයි මස 13 වන දින මා සමඟ එවකට බස්නාහිර උතුරු දිසාව භාරව කටයුතු කළ නියෝජ්‍ය පොලිස්පති දේශබන්දු තෙන්නකෝන් මහතාට නිට්ටඹුව තිහාරිය ප්‍රදේශයේ මුස්ලීම් පල්ලියක සර්වාගමික නායකයින්ගේ හමුවකට සහභාගි වෙමින් සිටියදි මිනුවන්ගොඩ ප්‍රදේශයේ වෙළදසැල් කිහිපයකට ප්‍රහාරයක් එල්ල වී ඇති බව දැනගන්නට ලැබුණා. ඊටපස්සෙ මිනුවන්ගොඩ ප්‍රදේශයට ළගාවනවිටත් මිනුවන්ගොඩ ෆවුස් හෝටලයට සහ ගල්ඔලුව හන්දියේ නිවාස දෙකකට යතුරුපැදි කිහිපයකින් පැමිණි මුහුණු ආවරණය කරගත් කණ්ඩායමක් ප්‍රහාරයක් එල්ල කර තිබුණා. ඒ සිද්ධිය සමග මිනුවන්ගොඩ නගරයේ 1500 – 2000 ක පමණ පිරිසක් කළහාකාරි ලෙස හැසිරුණා. ප්‍රමාණවත් නිලධාරින් සංඛාවක් නොසිටීම නිසා පොලීසියට සහ ආරක්ෂක අංශවලට තත්ත්වය පාලනය කර ගැනීමට නොහැකි වුණා. පහරදීම්වලදි මිනුවන්ගොඩ නගරයේ මුස්ලීම් ජාතිකයින්ගේ වෙළදසැල්ද ඇතුළුව වෙළදසැල් 24 ක් ගිනි තබා විනාශ කර තිබුණා. එම ප්‍රදේශයේ කර්මාන්ත ශාලාවකටත් ගිනිතබා තිබුණා. මිනුවන්ගොඩ ෆවුස් හෝටලයට එල්ල කළ පළමු ප්‍රහාරය මුහුණු ආවරණය කරගත් යතුරු පැදිවලින් පැමිණි කණ්ඩායමක් සිදු කරලා තිබුණ නිසා ජනතාව මුස්ලීම් ජාතිකයන්ට විරුද්ධව කළහාකාරි ලෙස හැසිරීමත් එක්ක මෙය සංවිධානාත්මකව සිදු කළ ක්‍රියාවක් බවට සැකයක් මතු වුණා.” යනුවෙන් විජේසිංහ මහතා සාක්ෂි ලබා දුන්නේය.
වැඩිදුරටත් සාක්ෂි ලබාදෙමින් ඔහු සඳහන් කළේ එම සිදුවීමට දින 5කට පමණ පෙර ප්‍රදේශයේ විහාරස්ථානයක පැවැති රැස්වීමකටද මධුමාධව අරවින්ද මහතා සම්බන්ධ වී ඇති බව විමර්ශනවල දී හෙළි වූ බවයි.
මෙම ගිනි තැබීමේ සහ පහරදීමේ සිදුවීම් පිළිබද කිසියම් දේශපාලන පක්ෂයක හෝ සංවිධානයක මෙහෙයවීමක් ඇති බව විමර්ශනයෙන් හෙළිදරව් වී ඇතිද යන්න රජයේ ජ්‍යෙෂ්ඨ අධිනීතිඥවරිය කළ ප්‍රශ්න කිරීමට පිළිතුරු දෙමින් ස්කයිප් තාක්ෂණය ඔස්සේ සම්බන්ධ වෙමින් ජ්‍යෙෂ්ඨ පොලිස් අධිකාරි චන්දන දීප්ත ලියනගේ මහතා කොමිසම හමුවේ පැවසුවේ,
“2019 මැයි 13 මිනුවන්ගොඩ නගරයේ නොසන්සුන්තාවය ඇතිවෙන්න කළින් වෑගොව්ව, ගල්ඔලුව ප්‍රදේශයේ ශ්‍රී සුබද්‍රාරාම විහාරයේ යම් සිදුවීමක් වී තිබුණා. විහාරයේ කුඩා සාමනේර නමකට මුස්ලීම් ජාතිකයෙක් පහරදීමක් කළා කියලා පොලීසියට පැමිණිල්ලක් ලැබුණා. ඒ සිදුවීම මුල්කරගෙන විහාරස්ථානයේ ගම්වාසින් එකතුකරලා රැස්වීමක් තිබිලා තියෙනවා. ඒ රැස්වීම සංවිධානය කරලා තියෙන්නේ ජගත් නැමැති පුද්ගලයෙක්. ජගත් නැමැත්තා මදුමාධව අරවින්ද කියන පිවිතුරු හෙළ උරුමයේ සාමාජිකයාගේ සමීපතමයෙක්. ඒ රැස්වීමට ඇවිත් මදුමාධව කියලා තියෙනවා ‘මේ වගේ සිද්ධිවලට එරෙහිව නැගි සිටින්න ඕනේ කියලා’. ඊට සතියකට පස්සෙ තමයි මිනුවන්ගොඩ නගරයේ ඔය නොසන්සුන්තාවය හටගෙන තියෙන්නේ. පරික්ෂණවලදි අනාවරණය වුණා මදුමාධව අරවින්ද ඔය මිනුවන්ගොඩ ප්‍රදේශයේ නොසන්සුන්තාවය ඇතිවුණ අවස්ථාවේ ඒ ප්‍රදේශයේ රැදී සිටියා කියලා. පසුව අනාවරණය වුණා මුස්ලීම් ජාතිකයෙක් සාමනේර නමකට පහර දුන්නා කියන එක ගොතපු කතාවක් කියලා.” යනුවෙනි.
ජ්‍යෙෂ්ඨ පොලිස් අධිකාරීවරයා වැඩිදුරටත් සඳහන් කළේ අදාළ නොසන්සුන්කාරී වාතාවරණය ඇති වූ දිනයේ අවස්ථා දෙකකදී මධුමාධව අරවින්ද සහ මෙම සිද්ධියට සම්බන්ධ ප්‍රධාන සැකකරුවෙකු ලෙස සැලකෙන ජගත් නැමැති පුද්ගලයා අතර දුරකථන සංවාද සිදුවී ඇති බව දුරකථන විශ්ලේෂණ වාර්තාවලින් අනාවරණය වූ බවයි.
අනතුරුව එවකට මිනුවන්ගොඩ පොලිස් ස්ථානාධිපති ප්‍රධාන පොලිස් පරීක්ෂක කේ. ආර්. ඒ. ප්‍රියන්ත මහතා කොමිසම හමුවේ සාක්ෂි ලබා දුන්නේය.
තමන්ට මුස්ලිම් ජාතිකයෙකු පහර දුන්නේ යැයි සාමණේර හිමියන් ප්‍රකාශ කර ඇත්තේ අසත්‍යයක් බවත්, මධුමාධව අරවින්දගේ උපදෙස් මත ජගත් නැමැති පුද්ගලයාගේ ඉල්ලීමට සාමණේර හිමියන් විසින් මෙම අසත්‍ය ප්‍රකාශය සිදු කර ඇති බවටත් විමර්ශනවලදී පසුව අනාවරණය වූ බව පොලිස් ස්ථානාධිපතිවරයා සඳහන් කරන ලදී.
මිනුවන්ගොඩ පොලිස් ස්ථානාධිපතිවරයා පැවසුවේ සාමණේර හිමියන් විසින් සිදු කළ පැමිණිල්ල පිළිබඳව විමර්ශනය කිරීමට අදාළ විහාරස්ථානයට තමන්ගිය අවස්ථාවේදී මධුමාධව අරවින්ද මහතා ද එම විහාරස්ථානයේ රැඳී සිටි බවයි.
පසුව මධුමාධව අරවින්ද මහතා තමාගේ දුරකථන අංකයද ඉල්ලා සිටි බවත්, සාමනේර හිමියන්ට සිදුවී ඇති සිදුවීම සම්බන්ධයෙන් සොයා බලන ලෙසත් තමාගෙන් ඉල්ලීමක්ද සිදුකළ බව ප්‍රධාන පොලිස් පරීක්ෂකවරයා කොමිසම හමුවේ කියාසිටියේය.
මෙහිදී ඔහු පැවසුවේ මිනුවන්ගොඩ ප්‍රදේශයේ නොසන්සුන්කාරී වාතාවරණය ඇති වීමට ආසන්න දින කිහිපයේම ප්‍රදේශය ආශ්‍රිතව සිදුවීම් කෙරෙහි මධුමාධව අරවින්ද මහතා දැඩි උනන්දුවෙන් අවධානය යොමු කර ඇති බව විමර්ශනවලදී අනාවරණය වූ බවයි.
එම නොසන්සුන්කාරී වාතාවරණයෙන් දී ගිනි ගැනීමට ලක් වූ කඩ පෙළ පැවැති ප්‍රදේශය ආශ්‍රිතව ද මධුමාධව අරවින්ද මහතා සංචාරය කර ඇති බවත් විමර්ශනවලදී හෙළි වී තිබේ.
තවදුරටත් ඒ සම්බන්ධයෙන් සාක්ෂි දෙමින් ස්ථානාධිපතිවරයා සදහන් කළේ සිද්ධිය සම්බන්ධයෙන් අත්අඩංගුවට ගැනීමට සිටි මධුමාධව අරවින්ද ඔහු සමග පැමිණ සිටි තවත් පුද්ගලයන් දෙදෙනෙකු,ජගත් සහ නුවන් යන සැකකරුවන් පසුව ඔවුන් අත් අඩංගුවට ගැනීම වැළැක්වීමේ නියෝගයක් ඉදිරිපත් කරන්නැයි ඉල්ලමින් අධිකරණයෙන් ඉල්ලීමක් කර තිබුණු බවයි.
නොසන්සුන්කාරී වාතාවරණය හමුවේ ගිනි තබා තිබූ විනාශ කර තිබූ වෙළෙඳසැල් මිනුවන්ගොඩ නගර සභාවට අයත් බදු පදනම ඔස්සේ ලබාදී තිබූ එහෙත් ඉවත් කිරීමේ නියෝග යටතේ පැවති වෙළෙඳ සැල් බවද අනාවරණය විය.
අදාළ සිද්ධියට පෙර අවස්ථා කිහිපයකදීම එම වෙළඳසැල් පවත්වාගෙන ගිය වෙළඳුන් විසින් තමන්ට අත්තනෝමතික ලෙස මිනුවන්ගොඩ නගර සභාවේ සභාපති නිල් ජයසේකර මහතා විසින් ඉවත් වීමේ නියෝග නිකුත් කර ඇති බව පොලීසියට පැමිණිලි ඉදිරිපත් කර තිබූ බවත් මිනුවන්ගොඩ හිටපු පොලිස් ස්ථානාධිපතිවරයා සඳහන් කළේය.
මේ අතර මිනුවන්ගොඩ නගර සභාවට අයත් ජල බවුසරය ගින්නෙන් විනාශ වූ වෙළඳසැල් ආශ්‍රිත ගිනි නිවීමේ කටයුතු සඳහා යොදා ගැනීමට හැකියාවක් නොලැබුන බවත්, රියදුරු නොමැති වීම හමුවේ එය ප්‍රමාද වී පැමිණීම ඊට හේතු වූ බවත් හෙළි වී තිබේ.
මේ සම්බන්ධයෙන් වැඩිදුරටත් සාක්ෂි ලබාදෙමින් මිනුවන්ගොඩ හිටපු පොලිස් ස්ථානාධිපතිවරයා සඳහන් කළේ එදින සඳුදා දිනයක් වුවත් අදාළ බවුසරයේ රියදුරු හෝ නිසි බලධාරියෙකු මේ සම්බන්ධයෙන් දැනුවත් කිරීමට නගර සභාව තුළ රැඳී නොසිටි බවයි.
අප මෙම සිදුවීම 2019 වර්ෂයේ “මිනුවන්ගොඩ ගැටුමට නායකත්වය දුන්නේ ගෝඨාගේ කල්ලියේ මධුමාධව අරවින්ද“ ලෙස ඉතා නිවැරදිව වාර්තා කල අතර මේ වනවිට ඒ බව පරීක්ෂණ හරහාද සනාථ වී ඇත.
ආශ්‍රිත පුවත් – මිනුවන්ගොඩ ගැටුමට නායකත්වය දුන්නේ ගෝඨාගේ කල්ලියේ මධුමාධව අරවින්ද – (VIDEO)
The post පාස්කු ප්‍රහාරයෙන් පසු මිනුවන්ගොඩ නගරයේ කඩ ගිනි තැබීම මධුමාධව අරවින්දගේ වැඩක්.. මිනුවන්ගොඩ ගිනි තැබූ හැටි කොමිසමේදී හෙළිවෙයි appeared first on ColomboXnews.
Source From Colomboxnews
Author: Kamal Dhammika
#SriLanka #News #lka