“ජොනී ඇමතිගේ නම සවුත්තු වෙන නිසයි බාර වෙන්නේ..අපි ජනපතිට ඡන්දෙ දාපු මිනිස්සු” – සැඟව සිටි මීගමුව බන්ධනාගාර ලොක්කා අල්ලන විටම කී කතා මෙන්න

අධිකරණය මගින් වරෙන්තු නිකුත් කර තිබියදී දින 11ක් පුරා පොලිස් ඇසට වැලි ගසමින් සැඟවී සිටි මීගමුව බන්ධනාගාරයේ හිටපු අධිකාරි අනුරුද්ධ සම්පායෝ කුරුණෑගල පොලිසිය වෙත ඊයේ (02) දහවල් භාරවීමෙන් අපරාධ පරීක්ෂණ දෙපාර්තමේන්තුවේ නිලධාරීන් දීර්ඝ ලෙස ප්‍රශ්න කර ප්‍රකාශ සටහන් කර ගැනීමෙන් අනතුරුව අද (03 වැනිදා) දින මීගමුව මහෙස්ත්‍රාත් අධිකරණය වෙත ඉදිරිපත් කිරීමට නියමිතයි.

මීගමුව බන්ධනාගාර ගත රැඳවූවන්ට සැප පහසුකම් සැලසීමේ චෝදනා යටතේ, වැඩතහනම් කර තිබෙන මීගමුව බන්ධනාගාරයේ හිටපු අධිකාරි අනුරුද්ධ සම්පායෝ, ප්‍රධාන ජේලර්වරුන් වන සරත් බණ්ඩාර, නිශාන්ත සේනාරත්න සහ ජේලර් කාලිංග කළුඅග්ගල යන සිවුදෙනා අත්අඩංගුවට ගැනීමට වරෙන්තු ලබාගන්නා ලෙස නීතිපති දප්පුල ද ලිවේරා පොලිසියට ඉකුත් මස 21 වැනිදා උපදෙස් ලබාදී තිබුණා.

ඒ අනුව අපරාධ පරීක්ෂණ දෙපාර්තමේන්තුවේ සහකාර පොලිස් අධිකාරි මෙරිල් රන්ජන් ළමාහේවා ඇතුළු නිලධාරීන් කණ්ඩායමක් මීගමුව මහෙස්ත්‍රාත් අධිකරණය වෙත කරුණු වාර්තා කර තිබුණා.

ඒ අනුව මීගමුව වැඩබලන මහෙස්ත්‍රාත් ඉන්දික සිල්වා, සැකකාර අනුරුද්ධ සම්පායෝ ඇතුළු බන්ධනාගාර නිලධාරීන් සිව්දෙනා වහාම අත්අඩංගුවට ගෙන අධිකරණය වෙත ඉදිරිපත් කරන ලෙස දන්වමින් ඉකුත් මස 22 වැනිදා වරෙන්තු නිකුත් කළා.

එලෙස වරෙන්තු නිකුත් කර සිටි ප්‍රධාන ජේලර්වරුන් දෙදෙනා සහ ජේලවර්වරයා පොලිසියට සහ අධිකරණයට භාර වූ නමුත් අනුරුද්ධ සම්පායෝ ඊයේ (02 ) වනතුරු පොලිසිය මගහරිමින් සැඟවී සිටියා.

මෙලෙස දින ගණනාවක් යනතුරු පොලිසිය මගහරිමින් සැඟව සිටි මීගමුව බන්ධනාගාරයේ හිටපු අධිකාරි අනුරුද්ධ සම්පායෝ, අත්අඩංගුවට ගැනීමට නොහැකිවීම සම්බන්ධයෙන් නියෝජ්‍ය සොලිස්ටර් ජනරාල් දිලීප පීරිස්, මීගමුව මහෙස්ත්‍රාත් අධිකරණයේදී පොලිසියේ ක්‍රියා කලාපය දැඩි දෝෂ දර්ශනයට ලක්කළා.

පොලිසිය විසින් අත්අඩංගුවට ගන්නා අවස්ථාවේදී මීගමුව මූලස්ථාන පොලිස් පරීක්ෂකවරයා ඉදිරිපිටදී අනුරුද්ධ සම්පායෝ මෙසේ පවසා තිබෙනවා

‘‘පොලිස්පතිවරයා නිසා තමයි මම භාර වෙන්නේ. මට මෙච්චර නීතිපති දෙපාර්තමේන්තුව ගැහුවට රවි කරුණානායක හැංගිලා හිටියා, රාජිත සේනාරත්න හැංගිලා හිටියා. මේ සම්පූර්ණ වැරදි වැඩක් මට කරන්නෙ. ​ජොනී ඇමැතිතුමාගේ නම සවුත්තු කරනවා. ඒ නිසයි මම භාර වෙන්නේ.’’

‘‘මම භාර වෙන්නේ නැතිව හිටියේ ඇපිල් කෝට් තීන්දුව එනතුරුයි. ඒ ගොල්ලන්ට හැංගිලා ඉන්න පුළුවන්නම් ඇයි අපිට බැරි. ගිය ආණ්ඩුවත් අපිට ප්‍රශ්න දැම්මා. මේ ආණ්ඩුවත් ප්‍රශ්න දානවා. ඇයි මෙහෙම කරන්නේ’’

‘‘ජනාධිපතිතුමනි, අපි ඔබතුමාට කියන්නේ අපි ඔබතුමාට ඡන්දෙ දාපු මිනිස්සු. අගමැතිතුමනි, අපි ඡන්දෙ දාපු මිනිස්සු. අපිව බේරගන්න’’

The post “ජොනී ඇමතිගේ නම සවුත්තු වෙන නිසයි බාර වෙන්නේ..අපි ජනපතිට ඡන්දෙ දාපු මිනිස්සු” – සැඟව සිටි මීගමුව බන්ධනාගාර ලොක්කා අල්ලන විටම කී කතා මෙන්න appeared first on ColomboXnews.