ඡන්දෙට කලින් ශ්‍රීලනිපයට දීපු පොරොන්දු ආණ්ඩුව විසින් අද වනවිට කඩකරලා

මහමැතිවරණයට සහ ජනාධිපතිවරණයට පෙර ශ්‍රී ලංකා පොදුජන පෙරමුණ ශ්‍රී ලංකා නිදහස් පක්ෂයට ලබාදුන් පොරොන්දු අද වනවිට ජනාධිපතිවරයා ප්‍රමුඛ ආණ්ඩුව විසින් කඩකර ඇති හෙයින් ශ්‍රීලනිපය තුළ කළකිරීමක් පවතින බව එම පක්ෂයේ ජ්‍යේෂ්ඨ උපසභාපති මහාචාර්ය රෝහණ ලක්ෂ්මන් පියදාස මහතා පවසයි.

මහාචාර්ය රෝහණ ලක්ෂ්මන් පියදාස මහතා මේ බව පැවසුවේ පෙරේදා (10) පැවති මාධ්‍ය හමුවක් අමතමිනි.  

“ශ්‍රී ලංකා නිදහස් පක්ෂයේ යම් ආකාරයක පුංචි කළකිරීම් තියෙනවා මේ වෙලාවෙ. අපි මැතිවරණයට ඉස්සෙල්ලා ගහපු ගිවිසුම් ඒ ආකාරයෙන්ම ඉෂ්ඨ වෙලාද කියන කාරණය අද ප්‍රශ්නයක්. 

අපට කිව්වා තුනෙන් එකක් දෙනවා කියලා අපේක්ෂකයෝ, පොදු ලකුණකින් ඉල්ලනවායි කිව්වා, ජාතික ලැයිස්තුවෙන් මෙච්චර ප්‍රමාණයක් දෙනවැයි කිව්වා …. මේ ඔක්කොම දේවල් අද වෙනකොට බිඳවැටිලා. අද මේ වෙනකොට සමහර ඇමතිවරු අපේ පාක්ෂිකයො ගියාම ඕගොල්ලන් ශ්‍රී ලංකාකාරයො කියලා ඒ අයට සේවා කටයුතු සපයලා දෙන්නෙ නෑ. 

ඒවගේම මේ මෑත කාලයෙදි අපි දැක්කා පාස්කු ඉරිදා ප්‍රශ්නය පදනම් කරගෙන වැරදි කරනවා නම් හිටපු ජනාධිපතිතුමා හිරේ දාන්න ඕනෙ, අත් අඩංගුවට ගන්න ඕනෙ, දඬුවම් කරන්න ඕනෙ කියනවා. අපි සන්ධානයක් තුළ ඉන්නෙ. සන්ධානයක් තුළ ඉන්නවා නම් සන්ධානයට සාධාරණත්වය ඉෂ්ඨ වෙන්න ඕනෙ. 

නමුත් පෙරළා අපට සැලකීමේදී ඒ කාරණා අපට ඉෂ්ඨ නොවුණාය කියලා අපි මේ වෙලාවෙ ආණ්ඩුවත් එක්ක ලොකු හැප්පීමකට යන්නෙ නෑ. අපි ඉවසීමෙන් කටයුතු කරනවා” යනුවෙනුයි ඒ මහතා සඳහන් කළේ. 

The post ඡන්දෙට කලින් ශ්‍රීලනිපයට දීපු පොරොන්දු ආණ්ඩුව විසින් අද වනවිට කඩකරලා appeared first on ColomboXnews.