ගාල්ල බස් නැවතුමේ සිටි කාන්තාවක් පැහැර ගනී – කාන්තාව පොරබදා ත්‍රිරෝද රථය කුණු ඇළට පෙරළේ

ගාල්ල, බස්නැවතුම්පළ අසල සිටි කාන්තාවක ඊයේ (27) රාත්‍රී පැහැරගෙන රැගෙන යමින් තිබූ ත්‍රිරෝද රථයක් කුණු ඇළට පෙරළී තිබෙනවා.

අදාළ කාන්තාව ඊයේ (27) රාත්‍රී 11.00ට පමණ තම සැමියා එනතුරු ගාල්ල බස් නැවතුම්පොළ ඉදිරිපිට ඇති බුදු පිළිමය අසළ රැඳී සිට ඇති බව සඳහන්.

ඒ අතරතුර එම ස්ථානයට පැමිණි ත්‍රිරෝද රථයක් අදාළ කාන්තාව බලහත්කාරයෙන් ත්‍රීරෝද රථයට නංවාගෙන, වේගයෙන් ධාවනය කර තිබුණා.

එහිදී එම කාන්තාව ත්‍රීරෝද රථ රියැදුරා සමග පොර බදා ඇති අතර එම අවස්ථාවේදී රථය පාලනය කර ගත නොහැකිව ත්‍රිරෝද රථය ගාල්ල, හැව්ලොක් පාර අසල කුණු ඇළට පෙරළී ඇති බව වාර්තා වනවා.

සිද්ධිය සැලවූ වහා ම එම ස්ථානයට ගාල්ල පොලිස් අපරාධ විමර්ශන අංශයේ නිලධාරීන් පිරිසක් පැමිණ ඇති අතර එහිදී ත්‍රිරෝද රථයේ පැමිණි බව කියන පුද්ගලයන් දෙදෙනකු අත්අඩංගුවට ගත්තා.

සැකකරුවන් පෝද්දල ප්‍රදේශයේ පදිංචිකරුවන් වන අතර ඉන් එක් සැකකරුවෙකු 30 හැවිරිදි විවාහක අයෙකු බවත් අනෙක් සැකකරු 26 හැවිරිදි අවිවාහක අයෙකු බවත් පොලිසිය පවසනවා.

පැහැර ගැනීමට ලක්වුණු කාන්තාව 23 හැවිරිදි ගාල්ල, වක්වැල්ල පාරේ පදිංචි දෙදරු මවකි.

අදාළ කාන්තාවගේ සැමියා සපත්තු මහන්නෙකු වන අතර ඇය තම සැමියා රේස් ඔට්ටු පොළකට ගොස් ආපසු පැමිණෙන තුරු බලා සිටින අතරතුර පැහැර ගැනීමට ලක්ව ඇති බව පොලිසිය පවනවා.

සිද්ධිය සම්බන්ධයෙන් ගාල්ල පොලිස් අපරාධ විමර්ශන අංශය වැඩිදුර විමර්ශන සිදු කරනවා.

The post ගාල්ල බස් නැවතුමේ සිටි කාන්තාවක් පැහැර ගනී – කාන්තාව පොරබදා ත්‍රිරෝද රථය කුණු ඇළට පෙරළේ appeared first on ColomboXnews.