අලි සබ්‍රි කෝප වී පාර්ලිමේන්තුවේ යකා නටයි – ‘හැසිරීම බිංදුවයි…ඔන්න වියත්මගේ හැටි‘ විපක්ෂයෙන් චෝදනා..!

විපක්ෂයෙහි මන්ත්‍රීවරයකු පැවසූ සුළු කරුණකින් අධික ලෙස කෝපයට පත්වූ අධිකරණ අමාත්‍ය මොහොමඩ් අලි සබ්‍රි මහතා පාලනයකින් තොරව කෑ කෝ ගසමින් පාර්ලිමේන්තු සභාගර්භය තුළ තම බලය පෙන්වමින් හැසිරුණු ආකාරය ඊයේ (25) දැක ගැනීමට ලැබිණි. 

සමගි ජන බලවේගයෙහි පාර්ලිමේන්තු මන්ත්‍රී චමින්ද විජේසිරි මහතා යොමුකළ ප්‍රශ්නයකට අලි සබ්‍රි මහතා පිළිතුරු දීමෙන් අනතුරුව ඒ පිළිබඳ තම අදහස් පළකරමින් විජේසිරි මහතා “මෙතුමා පළවෙනි ප්‍රශ්නෙට උත්තරේ දුන්නා. ඒක දන්නවායි කියලා. ඉතිං ඒ දන්නා ප්‍රමාණය මේකද කියන කාරණය පිළිබඳ මම අහන්න හැදුවෙ. අපි බලාපොරොත්තු වෙනවා හොඳ බුද්ධිමත් ජනාධිපති නීතීඥයෙක් හැටියට එයාලට දඬුවම් දේවි කියලා. මොකද අපි පැවතිච්චි ආණ්ඩුව තුළත් ගරු කථානායකතුමනි, ඒ ආණ්ඩුවෙ වැරදිවලට දඬුවම් දෙන්න කියලා අපි කෑගැහුවා. අපි බලමුකො මේ අපේ ටයි කෝට් දාගෙන ඉන්න ගරු ඇමතිතුමා ඒ ආණ්ඩුවටත් මේ ආණ්ඩුවටත් සලකන හැටි 20 ආවාට පස්සෙ” යනුවෙන් පැවසීය. 

ඒ මොහොතේ “ටයි කෝට්” යන වචන දෙක නිසා අධික ලෙස කෝපයට පත්වූ අධිකරණ ඇමතිවරයා “ඇයි ඔබතුමා වගේ අඳින්න ඕනෙද මම ? ඔබතුමාගේ අවසරය අරගෙන ඔබතුමා විදියට අඳින්න ඕනෙද ? මම අවශ්‍ය දේ මම අඳිනවා. ඔබතුමා කියන්න ඕනෙ නෑ මට අඳින්න ඕනෙ දේ. මම අඳින්නෙ මේ …. මේ …. අධිකරණයට අවශ්‍ය ආකාරයට. ඔබතුමාට මොකටද අවශ්‍ය ආකාරයට මම අඳින්න ඕනෙ ? ඔබතුමා කවුද ? ජාතිවාදය අවුස්සන්න එපා මෙතන. නිකම් බොරුවට. මොනවද ඔය ප්‍රශ්න ? මොකක්ද ප්‍රශ්නෙ තේරුම ? අධිකරණයේ පවතින නඩු පිළිබඳ අපෙන් ප්‍රශ්න අහන්නෙ ? ඔබතුමාට ජාතිවාදය අවුස්සන්නද ඕනෙ වෙලා තියෙන්නෙ. කතා කරන්න එපා ඕගොල්ලො සහජීවනය පිළිබඳව. තනිකරම වැරදියි ඔය” යනාදී වශයෙන් තර්ජනාත්මකව ඇඟිලි දිගුකරමින් මහ හඬින් ප්‍රකාශ කළේය. 

කථානායකවරයා මේ අවස්ථාවේදී සුපුරුදු පරිදි සිනහවෙමින් සිටි අතර විපක්ෂ මන්ත්‍රීවරුන් “මේක උසාවිය නෙවෙයි” “ඔන්න වියත්මගේ හැටි, ලැජ්ජයි” කියමින් ඊට ප්‍රතිචාර දැක්වූහ.

සමගි ජන බලවේගයේ තුෂාර ඉඳුනිල් මන්ත්‍රීවරයා නැඟී සිට “පාර්ලිමේන්තුවේ මන්ත්‍රීවරයකුට තියන අයිතියක් තමයි ප්‍රශ්න අහන එක. එතකොට ඇමතිවරයෙකුට තියෙන වගකීමක් තමයි බොහොම බුද්ධිමත් ආකාරයට පරිණතව ඒකට උත්තර දෙන එක. මේ පාර්ලිමේන්තු ඉතිහාසයෙහි හා හා පුරා කියලා මුලින්ම පාර්ලිමේන්තු ආපු ඇමතිවරයෙක් අද මේ කෝපවෙලා බොහොම ආවේගශීලීව මේ විදියට මොකද්ද මේ හැසිරෙන්නෙ ? මේ සම්පූර්ණයෙන් මෙහෙම කෝපවෙලා ? මේ වියත්මගද මේ ? මේ ගොල්ලන්ට කරුණාකරලා අර මූලික පුහුණුව දෙන්න, යවන්න මොන්ටිසෝරියට. පාර්ලිමේන්තුවෙ තියෙන මූලික පුහුණුව දෙන්න මේ ගොල්ලොන්ට” යනුවෙන් කථානායකවරයාගෙන් ඉල්ලා සිටියේය.

මෙම ප්‍රශ්නයට ආණ්ඩු පක්ෂයේ ප්‍රධාන සංවිධායක ජොන්ස්ටන් ප්‍රනාන්දු මහතා ද ගැටුම්කාරී ස්ථාවරයක නොසිට මැදිහත් වූ අතර අවසානයේ මොහොමඩ් අලි සබ්‍රි මහතා චමින්ද විජේසිරි මහතාගෙන් සමාව ඉල්ලා සිටියේය.

The post අලි සබ්‍රි කෝප වී පාර්ලිමේන්තුවේ යකා නටයි – ‘හැසිරීම බිංදුවයි…ඔන්න වියත්මගේ හැටි‘ විපක්ෂයෙන් චෝදනා..! appeared first on ColomboXnews.