කොරෝනා ආසාදිත සිසුවකු ලන්ඩන් ඕලෙවල් ලියන්න ඇවිත්. | මාමාට නිරෝධායන පනත යටතේ නඩු.

කොරෝනා ආසාදිත 14 හැවිරිදි සිසුවකු කොළඹ බණ්ඩාරනායක සම්මන්ත්‍රණ ශාලාවේ පැවැති ලන්ඩන් ඕලෙවල් විභාගයට පෙනී සිටීම සඳහා එම දරුවා විභාග මධ්‍යස්ථානයට රැගෙන ඔහුගේ මාමාට එරෙහිව නිරෝධායන පනත යටතේ නඩු පැවැරූ බව කහතුඩුව සෞඛ්‍ය වෛද්‍ය නිලධාරි කාර්යාලය කියයි.

මෙම සිසුවාට මෙන්ම ඔහුගේ පියාට,මවට සහ සහෝදරියට ද කොරෝනා ආසාදනය වී ඇති බවට හඳුනාගෙන තිබියදීත් මේ ආකාරයට විභාගයට පෙනී සිටිම විශාල වරදක් බව ද සෞඛ්‍ය අංශ කියයි.

මත්තේගොඩ පදිංචි මෙම දරුවා වස්කඩුව ප්‍රදේශයේ පදිංචි තම මාමා සමග යතුරු පැදියකින් විභාග මධ්‍යස්ථානයට පැමිණ ඇතැයි ද සිදු කළ පරික්ෂණවලින් තහවුරු වී ඇත.

මෙම සිසුවා විභාගයට පෙනී සිටීමෙන් අනතුරුව නිවෙසට ගොස් ඇත. මෙම සිසුවාට කොරෝනා ආසාදනය වී ඇති බවට දන්නා වෙනත් සිදුවකු ඒ සම්බන්ධයෙන් නිවෙසට ගොස් තම පියට දැනුම් දීමෙන් පසු කළ දැනුම් දීමටකට අනුව ආසාදිත දරුවා විභාගයට පෙනී සිටි බවට තහවුරු කරගෙන ඇත.

කෙසේ වුවද ඉකුත් සිකුරාද සිට මෙම විභාගය දින නියමයක් නොමැතිව නැවැත්වීමට කේම්බ්‍රිජ් ජාත්‍යාන්තර අධ්‍යාපන ආයතනය තීරණය කර තිබුණි.