‘හොරු අල්ලන්න එපා’ – විශේෂ මහාධිකරණ පිහිටුවීමේ පනතට එරෙහිව දිනේෂ් ශ්‍රේෂ්ඨාධිකරණයට යයි

 ගොඩගැසී ඇති නඩු කඩිනමින් විභාගකොට තීන්දු ලබාදීම සදහා ස්ථිර ත්‍රිපුද්ගල මහාධිකරණ පිහිටුවීම ඇතුළුව කාරනා ගණනාවක් වෙනුවෙන් රජය විසින් පාර්ලිමේන්තුවට ඉදිරිපත් කර ඇති “අධිකරණ සංවිධාන සංශෝධන පනත් කෙටුම්පත” ආණ්ඩුක්‍රම ව්‍යවස්ථාවට පටහැනි යැයි ප්‍රකාශ කරන මෙන් ඉල්ලා ශ්‍රේෂ්ඨාධිකරණයට පෙත්සමක් ඉදිරිපත් කර ඇති බව වාර්තා වෙයි. මහින්ද පිලේ පාර්ලිමේන්තු මන්ත්‍රී දිනේෂ් ගුණවර්ධන මහතා විසින් අදාළ පෙත්සම ඉදිරිපත් කර ඇති අතර එහි වගඋත්තරකරු ලෙස නීතිපතිවරයා නම් කර ඇත.

පසුගිය රාජපක්ෂ කළු දශකයේ වංචා දුෂණ සම්බන්දයෙන් මෙම පිහිටුවනු ලබන අධිකරණය මගින් කඩිනමින් නඩු අසා තීන්දු තීරණ  ලබාදෙනු අතැයි බියට පත්වී ඇති මහින්ද පිල මෙසේ අධිකරන ක්‍රියාමාර්ගයක් හරහා එය වලක්වා ගැනීමට උත්සහ කරමින් සිටී.

මෙම අධිකරණ සංවිධාන (සංශෝධන) පනත් කෙටුම්පත පාර්ලිමේන්තුවට ඉදිරිපත් කරනු ලැබුවේ පසුගිය 6 වනදාය. ඒ 1978 අංක 2 දරන අධිකරණ සංවිධාන පනතින් 12 වැනි වගන්තියට තවත් අලුත් වගන්ති තුනක් ඇතුළත් කිරීම මඟින් පනත සංශෝධනය කරමින්ය.

අදාළ සංශෝධන යටතේ පිහිටුවනු ලබන ස්ථිර ත්‍රිපුද්ගල මහාධිකරණය ශ්‍රී ලංකා ජනරජයේ මහාධිකරණයේ විනිශ්චයකාරවරයන් අතුරින් අධිකරණ සේවා කොමිෂන් සභාව විසින් නම් කරනු ලබන, එකවර විනිශ්චය සභාරූඪවන විනිශ්චයකාරවරයන් තිදෙනකුගෙන් සමන්විත වනු ඇත. ඉන් එක් විනිශ්චයකාරවරයකු එම අධිකරණයේ සභාපතිවරයා ලෙස අධිකරණ සේවා කොමිෂන් සභාව විසින් නම් කරනු ලබයි.

අලුතින් පිහිටුවනු ලබන ස්ථිර ත්‍රිපුද්ගල මහාධිකරණයක් ඉදිරියෙහි ඇති නඩු විභාගයක්, නීතිපතිවරයා විසින් හෝ අල්ලස් හෝ දූෂණ වැළැක්වීමේ අධ්‍යක්ෂ ජනරාල්වරයා විසින් ඉදිරිපත් කරනු ලබන අධිචෝදනා පත්‍රයක් මත පවත්වනු ලැබිය යුතු අතර එම නඩු ඉක්මනින් පවත්වා අවසන් කරනු ලැබිය යුතු බවද පනතෙහි සඳහන් වෙයි.

එම නඩු දිනපතා විභාග කළ යුතු බවත් නඩු විභාග වන දිනයක නිශ්චිත නීතිඥවරයකුට වෙනත් අධිකරණයක හෝ විනිශ්චයාධිකාරයක පෙනී සිටීමට යොදාගෙන තිබීම හෝ යම් හේතුවක් මත ස්ථිර ත්‍රිපුද්ගල මහාධිකරණය ඉදිරියේ පෙනී සිටීමට නොහැකිවීම, නඩු විභාගය ආරම්භ කරන දිනය කල් දැමීමට හේතුවක් නොවිය යුතු බවද පනතෙහි දක්වා ඇත.

එසේම ඊට අනුව ස්ථිර ත්‍රිපුද්ගල මහාධිකරණයේ පවත්වන ලද නඩු විභාගයකදී ප්‍රකාශයට පත්කරන ලද තීන්දුවක් සම්බන්ධයෙන් වන අභියාචනයක් එම නඩු තීන්දුව ප්‍රකාශයට පත් කරන ලද දිනයේ සිට දින 28ක් ඇතුළත ශ්‍රේෂ්ඨාධිකරණය වෙත ඉදිරිපත් කළ යුතු වෙයි. අග්‍රවිනිශ්චයකාරවරයා විසින් නම් කරනු ලබන ශ්‍රේෂ්ඨාධිකරණයේ විනිශ්චයකාරවරයන් පස් දෙනකුට නොඅඩු සංඛ්‍යාවකින් යුත් විනිශ්චය පීඨයක් මඟින් එම අභියාචනය විභාග කළ යුතු බවත්, අග්‍රවිනිශ්චයකාරවරයා විසින් එම විනිශ්චය පීඨයට තමාවම නම් කරනු ලැබීම නීත්‍යනුකූල වන බවද එම පනතෙහි සඳහන් වන අතර එම අභියාචන ඉක්මනින් විභාග කර අවසන් කළ යුතු බවට වගන්තියක්ද පනතට ඇතුළත් කර ඇත.

තවද අධිකරණ ඇමැතිවරයා විසින් ස්ථිර ත්‍රිපුද්ගල මහාධිකරණ පිහිටුවන ස්ථාන දැක්වීම අධිකරණ සේවා කොමිෂන් සභාවෙන් විමසා සිදුකළ යුතු අතර ඇමැතිවරයා විසින් ගැසට් පත්‍රයේ පළ කරනු ලබන නියමයක් මඟින්, ස්ථිර ත්‍රිපුද්ගල මහාධිකරණ සංඛ්‍යාව වැඩි කිරීමේදීත්, අධිකරණ සේවා කොමිෂන් සභාව විමසිය යුතුව ඇතැයි පනතෙහි දක්වා ඇත.

සොරකම, දේපළ වංක ලෙස ව්‍යවහරණය කිරීම, යම් තැනැත්තකුගේ මරණය සිදුවන වේලෙහි ඔහු සන්තකයේ තිබූ දේපළ වංක ලෙස ව්‍යවහරණය කිරීම, සාපරාධී විශ්වාසභාරය කඩ කිරීම, රජයේ සේවකයකු විසින් හෝ බැංකුකරුවකු, වෙළෙන්දකු හෝ නියෝජිතවරයකු විසින් කරනු ලබන සාපරාධී විශ්වාසභාරය කඩ කිරීම, සොරකම් කරන ලද දේපළ වංක ලෙස භාර ගැනීම, කූට ලේඛන සෑදීම, අසත්‍ය “ලේඛනයක් සෑදීම, අධිකරණයක වාර්තාවක් හෝ ආණ්ඩුවේ උප්පැන්න නාම “ලේඛනයක් ආදිය කූට ලෙස සෑදීම, අගනා සුරැකුම්පතක් හෝ අන්තිම කැමැති පත්‍රයක් කූට ලෙස සෑදීම, කූට ලෙස සාදනු ලැබූ “ලේඛනයක් නිර්ව්‍යාජ ලේඛනයක් ලෙස පාවිච්චි කිරීම, ගිණුම් වරදවා දැක්වීම, මුදල් විශුද්ධිකරණ වරද, අධිකරණ නිලධාරීන් හා පාර්ලිමේන්තු මන්ත්‍රිවරයන් සම්බන්ධයෙන් වූ අල්ලස්, රජයේ සේවකයන් සම්මුඛ සාකච්ඡා කිරීම සඳහා පාර්ලිමේන්තු මන්ත්‍රිවරයෙක් විසින් තුටු පඬුරු භාරගැනීම, පොලිස් නිලධරයන්, සාම නිලධරයන් සහ වෙනත් රජයේ සේවකයන් සම්බන්ධයෙන් වූ අල්ලස් ඇතුළු වගන්ති 57ක් යටතේ සඳහන් වන වැරැදි 68ක් සම්බන්ධයෙන්ද, තවත් පනත් කිහිපයක් යටතේ වන වැරැදි සම්බන්ධයෙන්ද ස්ථිර ත්‍රිපුද්ගල මහාධිකරණයන්හි නඩු පැවැරීමට නව පනත් සංශෝධන මඟින් විධිවිධාන සලසා ඇත.

එසේම ශ්‍රී ලංකාවේ පුරවැසියකු විසින් ශ්‍රී ලංකාවේ දේශසීමාවෙන් පිටත ස්ථානයකදීද කවරවූ වර්ගයක යම් නැවක හෝ යම් ගුවන් යානයක එබඳු යම් නැවක හෝ ගුවන්යානයක් සම්බන්ධයෙන් සිදුකරන ලද වරදක් සම්බන්ධයෙන් වන අධිකරණ බලය ස්ථිර ත්‍රිපුද්ගල මහාධිකරණයට තිබිය යුතු බවට වගන්තියක්ද පනතට ඇතුළත්ය.

The post ‘හොරු අල්ලන්න එපා’ – විශේෂ මහාධිකරණ පිහිටුවීමේ පනතට එරෙහිව දිනේෂ් ශ්‍රේෂ්ඨාධිකරණයට යයි appeared first on ColomboXnews.





Source From Colomboxnews
Author: Kamal Dhammika
#SriLanka #News #lka

Powered by WPeMatico